صرخات محبوسة

#صرخات_محبوسه 1 و 2 بعد ما طلعت من غرفة المحقق الي وجهلي تهمة التخطيط لقتل زوجي بالتعاون مع عشيقي وجماعته مشيت والشرطيه گايدتني .. دخلتني للسجن وانسدت الباب عليه جنت عايشه وموعايشه يمكن هنا أمن الي اكثر من البره لان الكل متوعدلي اهلي واهل زوجي يردون يشربون من دمي اخذتلي كتر وكعدت بي الدمع نشف بعيوني وبداخلي صرخات محبوسه اخاف اطلعها .. بقيت كاعده والدنيا بعيني ظلمه ومية فكره ابالي عن مصيري وعن الطريقه الي راح اموت بيها بيد اهلي او اهل زوجي لو انعدم او انحكم مؤبد وابقى طول عمري محبوسه بقيت كاعده .. ماامنتبهه لاي شي .. ومر كدام عيني شريط حياتي كله ورجعت بيه ذكرياتي لليوم المشؤؤم الي اللتقيت بي احمد وصار جزء من حياتي اشبه دخول احمد لحياتي الجانت هادئه مثل الاعصار القوي دخل وتغير كل شي اني زهراء عمري24سنه جنت متزوجه من حسام اكبر مني بثلاث سنوات .. وحاليا ارملته والمتهمه بقتله بالتعاون مع احمد .. اني من عائله متوسطة الحال اخت لاخوين اثنين بس بعد وفاة ابويه شويه الحاله ضاكت .. وكمل عليها وفاة اخويه وترك وراه 3جهال ومره يتيمه ملها احد اضطر اخويه الخ ان يتزوجها وصار يعيل بدل العائله الوحده اثنين واني وامي جنت طالبة معهد طبي مرحله ثانيه شفت الحال مايسمح اكمل ويراد الي مصرف واخوي مااعنده يادوب يصرف ع نسوانه وجهاله وامي هالمره المريضه تريد منه علاجات واطباء وغيرها ... حسيت ع روحي وكعدت بالبيت وماكملت المعهد تقدم الخطبتي حسام من طرف بيت عمتي وتزوجنا جان كلي امل اعيش ويا بسعاده .. بس لو ندري الدنيه شضامه النه يمكن نكدر نغير من حياتنا بس حسام جان نظرته للمراه نظره دونيه عنده المره للخدمه وبس وحتى جان ميطلع ويايه ابد يكول اني مااطلع ويا مره عيب ...! واذا اريد اروح لاهلي عمتي توديني ابقى ساعه ساعتين وارجع اضوج كلما اروح اشوف امي نسوان اخوي يشكن بوجهي الفكر ياماعدنه وحسره علينه اللكمه .. اني اشوف امي واروح ولا مره اكلت عدهم بعد مرور سنه ع زواجي وماصار طفل جان الملل ماخذ جزء من حياتي .. حسام ولامهتم الي ابد طبعه اناني يهتم بنفسه وبس طبات طلعات وسهر وسفر والماركات الي يشتريهن مايحرم نفسه من شي ابد .. فكرت بيني وبين نفسي افتح ويا موضوع الدوام بلكي يخليني ارجع ادرس .. واكمل المرحله الاخيره من المعهد اجه من الدوام تلكيته وصبيت اله غدا خلص وغسل وطب للغرفه يريد ينام واني اباوعله وماتجرئت اكوله للعصر هو كعد وطب سبح ووظل يبدل ويغني كلت اي هي الفرصه المناسبه اشو اشوفه شويه مرفرش وفرحان يريد يطلع اني جنت كاعده ع الجربايه .. كتله حسام حبيبي ممكن طلب كال :شتردين تره فلوس ماعندي وماانطي ولاتكليلي وديني لاهلي روحي وي امي وحتى فلوس ت**ي ماعندي هياته بيت اهلج بعد شارعين روحي مشي وي امي واحجي من الاخير شرايده تأخرت تحسرت كلش هبط معنوياتي شراح اكله هذا كتله بطلت مااريد شي كال احسن ودار وجهه ع المرايه كمل سد دكم قميصه وفتح الدولاب مالته بالمفتاح اخذ منه عطر ورش منه ورجعه وقفل الدولاب واخذ المفتاح وطلع طبعا يقفل الدولاب لان يضم بي عطوراته الغاليه عن لااخلي منها اني ماجنت احس بي زوج ابد الزوج الي ممكن ان يكون الي صديق وحبيب ويمكن مرات يكون اب حنون .. لا جان ويايه مثل السيد وخادمه .. ومجبوره اتحمل كل شي بقيت حابسه دموعي كبريائي كدام نفسي ميسمح انزلها كلشي بداخلي محبوس احلامي رغباتي ضحكي ودموعي ... سمعت صوت عمتي يم الباب تصيحني لج عيني زهراء يلا كومي لفي الكبه راح تجينه اللهام هي وعيالها يتباركون الرقيه ويتعشون يمنه كتلها صار عمه .. اللهام هي حماتي ومن تجي لازم عيالهه وياهه اما رقيه هي مرت حماي الكبير مصارلها هواي من جايبه ولد جانت الساعه 4ونص والجو كلش حار . طلعت من الغرفه رحت للمطبخ شفت عمتي كاعده بالكاع وبيدها استكان الجاي وتشرب وبصفها كاعد ابن حماي كتلها هاا عمه وين الكبه اللفها كالت اكلج بالاول خبزي.. لو هاا خلي الخبز گبل المغرب حتى ياكلوا حار اطيب خوش عمه لعد وين الكبه اللفها اي غير تسوين الحشو وتحضرين البرغل اني عبالي هي حاضره بس اللفها طلعت لازم اسويها من البدايه كتلها خوش عمه تشكلت وسويت البرغل والحشو ولفيتها وي وكاحة حمودي كوه اشتغلت واذا اگله اكعد صير عاقل تطلعلي عمتي من وين ماكان تكولي خطيه امه نفسه لاتسمعج تنقهر زين اني منو يحس بقهري بعدها اجت حماتي ووياهه عمتها وحمواتهه اثنين وحده متزوجه وياهه جهالهه ووحده لا وزوجات حماهه اثنين وجهالهم رحت سلمت عليهم وكعدت يمهم طبت رقيه زوجة حماي وسلمت عليهم وخلت ابنها بحظنهم كلهم انقهرت اني لان لان كلما اكوللها خلي اشيله متقبل ياتگول مامحفظ وياتكول نايم وتطللعلها حجج والها 15يوم جايبه مااشلته ابد .. ظليت ماادخل الغرفتها ومعليه بيها رغم اسمع اشكال كلام من عمتي تكول ليش مترحين يمها اكوللها عمه منشوله خاف اعدي الطفل الزغير وابقه اتحجج لحتى مااروح وانهان وانقهر بقينه كاعدين بالصاله جان تسألني اللهام هاا زهراء ماكو شي بالطريق كتلها والله انت كلما تشوفيني تسأليني هذا السؤال وهو نفس الجواب ماكو شي للاسف رقيه حضنت ابنها ظلت تحرك بشفايفها عود تقرا ايات ومنا حمات اللهام ظلت تسولفلي عن طبيبه زينه تنصحني اروح الها ومنا عمتي تأشرلي وتسويلي حركات كومي خبزي عود احس روحي صدعت .. ترخصت منهم ورحت اتشكلت وخبزت طلعت روحي من الحر احس معت وكعدت اسفط بالخبز بالمطبخ طبت رقيه كالت اكلج زهراء ناوشيني وصلت خبز لحمودي جنت كلش مقهوره منها ليش هيج تسوي بيه وتحسسني بأن اني بي نقص لو احسدها ع نعمة الخلفه ومنا طاگه روحي من حسام ومن الشغل ومن الحجي ومنها هي بالذات وتصرفاتها حاجتني مرتين غلست عليها وماحاجيتها جانت شايله ابنها الزغير وعود مابيدها تدنك لان الخبز جنت اسفطه بالكاع وابنها الثاني يريد خبزه كملت تسفيط الخبز وكمت طلعت من المطبخ وهي ظلت صافنه عليه .. كملت باقي الشغل كله وصبينه العشا وكعدنه كلنا سوا لان هم اقاربهم مو غرب جان حسام يحجي وياهم ويضحك ويسولف اكول بكلبي لعد شبيك يمي .. 24ساعه كالب الخلقه كملنا الاكل وغسلت المواعين وراحوا بعدها .. طبيت لغرفه بعد ماشلت المواعين الباقيه بالصاله ونضفتهه شفت حسام متمدد ع الجربايه وبيده التليفون رحت كعدت يمه كتله حسام مارد عليه صافن بالتليفون كتله مرتين حسام كال بحديه ها ها مو جاي اسمعج ماتحجين مسحت جبيني وتن*دت كتله حمات اللهام تكول اكو طبيبه زينه خلي اروح الها اشوف ليش ماجاي يصير عندي طفل كام من مكانه كال وليش ماتحبلين هيج لو بس انه حظي مرتي اوديها للاطباء واخسر فلوس يله تحبل انت لو بيج خير جان حبلتي من ليلتها هي النسوان كلها تحبل بدون طبيبه بس انت سدي الموضوع هذا من الاخير ماكو روحه للدكتوره .. سكتت مااعندي غير السكوت يوم ثاني كلش اجوي اهل رقيه من بغداد .. امها وابوها وخالتها واخواتها وجهالهم .. وبقوا يومين وانكلب البيت هوسه واني احس ابد ماالي قيمه ابيناتهم .. بعد اليومين راحوا خابرت على زوجة اخويه اريد احاجي امي حاجيتهه كالت تعبانه كلش كتلهه العصر اجي اشوفج رحت على عمتي كتلهه عمه اريد اروح لامي اشوفها تعبانه ومريضه كالت ماتشوفين رقيه استوهه جايبه ووحدهه ميصير اطلع واعوفها مااكدر اروح وياج خليهه للجمعه وسام هنا يبقى يمهه كتلهه خوش عمه ورحت للغرفه كلش ضجت طكت روحي انتظر حسام يرجع واكله يوديني ظليت بحيره خطيه امي خاف يصير عليهه شي واني مشايفتهه نوب كتلهه العصر اجيج وحسام يجي بالليل خلي اخابره بلكي الله يهدي ويجي يوديني ... خابرته يدك ميجاوب هي عادته اذا طالع واخابره ولو اموت ميجاوبني تعبت كلش وبداخلي اغلي تعمدت اكعد بالغرفه ومااطلع اسوي العشا طبكت الباب وتغطيت حتى وجهي غطيته وتصنعت النوم طبت عمتي عليه ظلت تصيحني زهراء زهراء يلا كومي سوي العشا غلست ولاجني اسمعها ختولي شصار اذا ودتني لامي شكو عليها رقيه بالله وهي عمتي شون لزگه مثل لزگة جونسون ولاتستسلم كون توعيني جتي وكفت على راسي وبيدهه ع كتفي وتوعيني زهراء ماازهراء من احتركت زهراء ان شاءالله لو اموت هم كون توعيني كمت كتلها هاا عمه ياعيني كومي سوي العشا رقيه خطيه نفسه وترضع ولازم تتعشا وكت نفضت الفراش من عليه بقوه وكمت كتلهه اي عمه افتهمت جايه رحت للمطبخ وتشكلت ولفيت شالي على راسي وبديت اشتغل وفكري وبالي يم امي وبعيني دمعة قهر لشويه اجت رقيه هي وابنهه الصغير يمي تحجي ويايه وتجاملني لشويه طبت عمتي كالتلهه يمه رقاوي مو زين عليكم انت والطفل روحوا ارتاحوا .. طلعت رقيه وبقيت وحدي اهز بيدي طبت عمتي سوت نفسها مشاف*ني كتلها الله يخليلج رقيه والجهال عمه كالت ان شاءالله يصير عدج واداريج بس احسها ممقتنعه بالكلام يمكن اكثر شي هي مقتنعه بي ان اني عاگر ... كملت العشا وكترته .. صار المغرب وصليت ورحت رديت للمطبخ وصبيت العشا دزيت عبوسي ابن وسام الجبير يفرش السفره ماقبل عمره 8بس هيج نحيس كلش خبيث وابد مو مطيع رحت اني فرشتها .. وكعدنا ع العشا وحسام ماكو .. بينما جنه نتعشه وسام كال وينه حسام اشو ماكو كتله بعده مااجه ههههه اشو هالايام هواي يتأخر اخاف متزوج . جاوبته عمتي هو اول وتالي يتزوج . تحسرت اني وعوجت حلكي كمت من الاكل ورحت غسلت كعدت بالغرفه واكيد هسه تجي عمتي تكولي كومي لمي السفره وغسلي المواعين .. قبل لاتكولي طلعت اروح اغسلهن .. بطلعتي شفت حسام جاي ديصعد الدرج صحتله حسام حسام كال هااا موداادكلك ليش متجاوبني دخلي اروح اشوف الطيور والله بطرانه انت وخلاني وصعد ماادري منو البطران بينه .. صعدت وراه ابدي اتعارك ويا واشعلهه للضالين موتني هو واهله صعدت وراه شفته يم قفص الطيور عنده اشكال اشكال هو من نوع يعشق الح*****ت . جان كاعد بالارض ومخلي الحمامه ويلعب وياهه ويتمعن بيها باوعتله يحظي لو خالقني الله حمامه ولاهالضيم ع الاقل تكدر تطير تهج وتعيش وين ماجان بس اني محبوسه باوعتله تمنيت اتمنيت يعاملني مثل الحمامه ظليت صافنه عليه شال راسه ظل يباوعلي كال تعاي شوفي مدري شبيها كوكي مبينه مالهه خلك كلت اسليمه كون كال ها كتله حسام ياحمامه ياكوكي وموكي مو اشتعل جد جدي بكبره اليوم 3الاف مره اتصل بيك متجاوب شتردين بالله حسام امي مريضه اريد اروح اشوفها كوم وديني هسا يعني هي سنه انت عايشه ويايه وتعرفين كلش زين اني مااطلع وي نسوان ليش مكلتي لامي تاخذج كلتلهه مقبلت تكول رقيه تبقى وحدهه والمطلوب هسه شنو هسه هياتهه سيارتك وديني اشوفها ساعة زمان وارجع الدنيا ليل ومحد عود يشوفنا اكلج انه جاي تعبان واريد ارتاح طبب الحمامه بالقفص وخلاني ونزل قبل شوي جوه ردت اتعارك ويا بس شفتهه متسوه واكيد راح اطلع اني الغلطانه احب اعيش بهدوء بعيد عن المشاكل والعركه لان اني الخسرانه هنا نزلت وللمطبخ كبل شفت الموعين مغسوله بس المطبخ مبهذل ونص ممغسوله المواعين تشكلت اغسلهم وارتب وانضف خلصت كل شي .. ورحت للغرفه شفته نايم وبسابع نومه هزيت بيدي وبداخلي اعصار بين قلق على امي وغضب على كل الموجودين هنا احس نفسي ضايعه ورطت نفسي بهالزواج لو باقيه بيت اهلي يم امي اداريهه احسن يمكن الله يف*جهه واكمل دراستي كعدت ع الكاع واحس بخوف من صدك خفت هالمره . اثر بيه كلام عمتي ووسام خاف هذا يتزوج عليه لو يطلكني وتدمر حياتي .. يمكن اني صدك عاگر ومااخلف ومية فكره اجت ابالي شون راح اتطلك والناس تحجي عليه واخوي حالته مو زينه شون راح انعيش ويمكن بعد محد يتزوجني وبين هالكم الهائل من التفكير والقلق والاحساس بالضياع نمت جوه وع صوت حسام يكعد بيه كعدت الفجر وسويت اله ريوك ورجعت نمت بعد ماطلع هو .. حسام واخو وسام عدهم سيارات حمل جبيره .. يعني حالتهم زينه بس حسام بخيل عليه چريم وي نفسه وطيوره وامه وخواته نمت ساعتين وكعدت ساعه 8 رحت للحمام وغسلت وجهي وكبل للمطبخ طبت عمتي كتلهه صباح الخير صباح النور خو مازعلانه البارحه من حجي وسام هو بس وسام الحجه كلت بكلبي وجاوبتهه لاعمه ماصار شي كالت احنه رايحين للمستوصف وحمودي وعبوسي نايمين بلكي تديرين بالج عليهم كتلهه صار عمه راحوا .. رحت للمطبخ خليت الجاي ع النار والبيض هم خليته بالمي حتى ينسلك. ورحت رتبت الغرفه وراها كعدوا الجهال وخليت الهم ريوك عباس ميريد بيض مسلوك كليتله بيضه وحمودي ميريد بيض ابد كتله تريد جبن كال لا اريد طماطه كلي كمت كصصت الطماطه وكليتها خليتهه كدامه اكل لكمه منها كال مطيبه بيبي تسويهه اطيب هفف احتاريت ويا لاتجي هسه عمتي وتكول ماريكته كعد بصف الكاونتر عود زعلان ومطنكر رحت كعدت يمه كتله زين شون تريدها انت اني اشويها الك ميحجي ساكت متعلم ع الدلع دروح عفته وكمت ع الشغل خليت اللحم ع النار ورحت غسلت المواعين وراها نصيت ع نار اللحم ورحت اكنس الهول بين شغل والجهال كل شويه يتعاركون طارت الصبحيه وحتى من دوختهم نسيت وضع امي وصارت ساعه 11يلا جوي عمتي و رقيه خذت جهالهه وطبت للغرفه واجت عمتي تعبانه كلش انطيتها مي وظلت تحجي كالت اليوم حر موت كلش كتلهه اي تاخرتوا كالت رقيه طبت للسوك واشترت شغلات وتاخرنا وراها طبت رقيه كالت حمودي ميت جوع يكول ممتريك كتلهه اي مقبل ياكل لابيض ولاجبن وكليت اله طماطه يكول مطيبه اي حتى اني من اسويهه يكول مطيبه يريدهه اله من ايد بيبيته هو سمع راح العمتي كلالهه يله بيبي كومي سويلي كلتله خوش كمت وهي تعبانه كامت كلت اله وراها اجه وسام وتغدينا كلنا سوه واني بالي يم امي شون مارحت من البارحه كلتلهه عود اجي خلصنا الغدا ورحت اغسل مواعين اجه حسام كتله تريد غده اي صبي قابل وين متغدي وي ال---- كتله عيب كدامك الجهال ليش تغلط بدون ميجاوب صعد فوك .. وصبيت اله غدا ورحت اله للسطح حتى اصيحه جان يم القفص مال الطيور صحتله يلا حسام تعال تغده كال هسه جاي والهسه صارت ساعه يلا نزل كعد دياكل بالمطبخ كال شنو هي بارد الاكل كتله اذا انت تاخرت فوك شسويلك شنو تحاسبيني وعليمن احاسبك هسه اكوم احمي كعدي مااريد حتى هي ماتدبريهه هو شنو ماادبرها بهالاثناء جتي عمتي كالت شبيكم حسكم طالع مو الجهال نايمين اني احمي الاكل روحي انت خاف مابيج عرفت من كلامها تقصد اني متعاجزه ومااريد احمي اله بس شسويلهه مره جبيره خو مااتطاول عليهه سكتت ورحت للغرفه وعفتهم يحجون كل الي ابالي يحجون عليه خاف امه توزه عليه ويتركني ويتزوج كمت بدلت ولبست شي حلو ومغري ومكيجت طب للغرفه وراح تمدد ع الجربايه رحت اله ونمت على ايده ظل يضحك كمت من يمه شبيك كتله كال ماكو كتله تضحك عليه كال تعااي زهوري مشتاقلج طالعه حلوه ورحت يمه بعد ماخلصنا كمت رحت يم المرايه ابوع الروحي المكياج سايح والدنيا حر انتجيت ع الثلاجه بصف ميز التواليت باوعتله نايم غافي وافكر بضحكته عليه يمكن يقصد حتى لو شكد مااعدل وارتب وينام ويايه ميصير عندي طفل مرات احس مااحبه ماكو شي يخليني احبه لايهتم بيه ولايحسسني بحب ولايسوي اي شي الي بس هيج معتبرته زوج وبس الزوج المفروض يكون الي كل شي بس هو ولا شي للعصر كالعاده بدل ويريد يطلع كتله وديني لامي عفيه والله قلبي نار عليها اكلج ليش ماتكولين لاخوج يجي عليج هو انت تدري بخويه من تزوجت الهسه تليفون ماشاله يسال عليه بعد يجي كال خلي امي توديج سكتت كلت بكلبي اذا اكللهه هسه تتحجج برقيه كلت اصبر للجمعه شسوي لعد .. واشوف حجتها شنو وبيوم الجمعه كعد وسام بالبيت يم رقيه بدلت وكلت العمتي ودتني لبيت اهلي طبيت شفت امي جانت تعبانه خطيه بوستهه وكعدت يمها وعمتي جانت مشتريه فواكه الهم بس كلش استحيت ماعدي ولافلس اخلي بيدهه رغم رجلي خير من الله شغله كبل لانطلع حضنتها وبوستهه خلت بيدي فلوس خطيه تدري بحسام بخيل كتلهه يمه المن هي وانت منيلج كالت عندي وعندج خير راتب ابوج واخوج الحمدلله خير خلي هي الجم فلس تفيدج ضميهن الدنيا ماتتأمن ييمه وخاف كل شي يصير تصرف امي هذا خلاني احس على نفسي انه لازم مااكعد واسكت لازم اشوفلي شغله خايفه من حسام بيوم وليله يشمرني رجعت للبيت وبس افكر ماكو شي متملكني غير التفكير .. مرت الايام ونفس الحال اسمع من الحجي اشكال الوان على مود الحمل ومن صدك تاخرنه حاولت اشغل روحي باي شي ظليت اض*ب ابر للنسوان بالبيت وفد يوم صدفه سمعت رقيه تكول العمتي اذا طلعتي يم الجيران ساليهن اذا يردن مكينتي مال الخياطه بعد مااخيط مابيه ووسام مايقبل يكول اني ماقصر اريد ابيعها واشتري وحده ازغر منها بالنسبه الرقيه خياطه محترفه وعدهه زبائن هواي يحبن خياطها لان ترتيب مو شون ماجان خليت الفكره ابالي كلت اخيط اتعلم ميرادلهه شي ولاهالكعده على الاقل اروح للدكتوره افحص بلكي اتعالج ويصير عندي طفل. واخلص من الحجي اجه حسام بليل بعد العشا رحت يمه كتله حسام اريد فلوس شلج بيهن ماعندي شنو ماعندك معقوله المن تشتغل لعد اصرف ع الگـ---- بعد المن اشتغل حسام موطكت روحييييي شبيج طكت روحج شو ماكله شاربه ونايمه شبيج يعني انت هيج الحياة عندك بس اكل ونوم وشرب يمعوووووود ماعندي فلوس مو عندج ذهب بيعي وصرفي منه حاط عينك على ذهبي هو شعدي غيره هذا هو ماعندي شي اني شفت الحجي ويا مامنه فايده سكتت شسوي يوم ثاني رحت الرقيه كتلهه ام عباس اني اريد المكينه بس ماعندي فلوس وتدريني مااطلع من البيت هاج هذا محبسي ذهب بيعي وشوفي شكد يصير وشكد تطالبيني بعد اسدهن ان شاءالله كالت لا يمعوده مابينه فلوس اخذيهه بلاش شلي بيهه لاخيه انت تردين تبيعيهه من الاول مايصير لاانت هم مامقصره من اطلع كله تدارين جهالي خيه احنه اهل وهذا واجب ميخالف اخذيهه واي شي تحتاجينه اني اعلمج عليه ومحبسج هذا ردي عيب موقف رقيه خجلني وتشكرت منها وبنفس الوقت تشكرت من ربي ودعيت الله يساعدني .. مرت الايام وخليت روحي بالخياطه وتعلمتهه بمساعده من رقيه وظليت اخيط الي والي يجي يشوف خياطي وظلت الناس تجيبلي قطعها واخيطها وصارت مهنتي مرت ايام خليت روحي بشغلي وحسام هو طبعه متغير عمتي زادت بالحجي وتريد تزوجه عليه جنت اهمل نفسي ومن ارجع اباوع الروحي بالمرايه احس كبرت هوايه والوقت ديمشي ومر على زواجي سنتين من كثر الحجي اقتنعت بان اني ميصير عدي اطفال واني عاكر واني مثل ميكول حسام مره ناقصه ومو كامله ونسيت شغلة المراجعه وماراجعت طبيبه لان حسام ميقبل غلست اني من يمي بفد يوم بالليل جنت بالغرفه وحسام بعد ماجاي طلعت من الغرفه سمعت صوت بالهول عمتي وحسام اسمعها تكوله شون بنيه تكمه تجنن الله مكملهه من كل شي بس ارجع من الزياره اروح اخطبهه الك بلكي تخلفلك .. وهو بس يضحك اني وكفت بمكاني والدموع تجري ورحت للغرفه زدت بجي وكفت وره الباب ولزمت بطني وابجي بحركه واوجه اسئله لنفسي ولجسمي ليش يااجسمي ترفض امومتي ليش تمنعني من ان اكون ام .. حسيت بخطوات حسام صوب الغرفه مسحت دمعي وتكترت ع صفحه وكفت بصف ميز التواليت طب كتله هاا تريد تتزوج وكف يفتح بدگم القميص .. يباوعلي ومبتسم كال اي وشكو بيهه شنو شكو بيهه شناقصني بشنو مقصره وياك تحجي صدك اي شدعوه عليك واذا وديتني للدكتوره افحص اشوف منين السبب مني لو منك انه مابيه شي رجال ومامني عيب مايحتاج افحص وهي اخواني كدامج وسام سواهم تلاثه وحازم سطرهم سته مو شرط يمعود اكو رياجيل تصير عدهم مشاكل نسبتهم تنزل وع العلاج يصير كلشي تمام مو شرط اني مااخلف ماكو هيج شي امي تكول السبب من النسوان .. وامي جبيره ومن اهل كبل وتفتهم يااهل كبل يااهل اول دور اول تحول والعلم تقدم وكلشي تغير لا توديني للطبيبه انه اروح ويا رقيه وعندي فلوس لاتطيني باعي زهراء اذا رحتي اطلكج ثقي بالله اطلكج روحه للدكتوره ماكو واريد انام عندج شي بي خير تعاي يمي ماعدج خليني انخمد سكتت عنه وبقيت كاعده ع كرسي بصف مكينتي مال خياطه وهو تمدد ولزم موبايله واني كعدت ابجي ب**ت وحبست كلشي بداخلي ودموعي تنزل على خدي حاره تجويني شمسويه اني وهيج يصيرلي تعبت كلش تعبت ابودي اطلع كل صرخه محبوسه بداخلي .. وافزز العالم ع وجعي ليلتهه حقدت ع عمتي وكرهتهه ليش هيج تسوي ترضاهه لوحده من بناتهه .. لو هم راح تفرفر بيهن من دكتوره الدكتوره وماتدمر زواجهن يوم الثاني عمتي راحت للزياره وبنفس اليوم جانو رقيه ووسام يردون يطلعون كلت اروح يم امي شويه كم يوم هم ارتاح رحت على حسام كتله راح اخليهم يوصلوني بدربهم يم امي ابقى كم يوم كال روحي رحت تحضرت ولبست عبايتي وكعدت انتظرهم بعدهه اجوي وصلوني لبيت اخوي المرحوم لان امي هناك ترتاح عدهم تكول حتى جهاله كبالي واباوعلهم جن اشوفه لان يكولون الخلف مامات نزلت يم بيتهم وهم راحوا دكيت الباب طلعتلي بنت اخوي بوستهه ودخلت طبيت من باب المطبخ وجنطتي بيدي امي جانت كاعده بالارض وماده رجلهه نزلت عليهه بوستهه وحضنتها استغربت من جنطتي بيدي لان اني مااروح ابات عدهم ولا مره كالت خيرج يمه جنطتج وياج ماكو شي يمه جيت ارتاح يمج شوي ليش يمه شنو المضوجج تمنيت اتمدد بحظنهه واطلع كل ضيم البكلبي وشگد بي ظيم اريد اكوللهه يمه مامتهنيه مااحس الي قيمه مااحس عايشه گوميلي ييمه وداعتچ تعبان بس بشوفچ ابره وتبتسم عيني بس انتي الوحيده القادره بهالكون بتراب الچفن يحبيبه تشريني اسمعيني ييمه وگومي اترجاچ مامرجيه منچ هيچي تاذيني گوميلي آنه جيتچ ماأريد اعذار طشرني الوكت يايمه لميني خنگني الحجي وماحجيت لان خطيه باوعتلها تعبانه ومريضه مااريدهه تشيل همي خلي بحر حزني بداخلي احسن وخلي كلبي ساكت لايطلع ضيمه ويوجع احبابه واذا جان الحبيب ام فهذا اقدس حب بالدنيا حب نقي برئ بدون اي مصلحه من باوعت الها وشفت الضحكه بعيونها وفرحانه ببنيتهه الوحيده جايه يمها نسيت كل همي حمدت الله امي عايشه وتشم الهوا واجي اشوفها احس كل جروحي تبرا .. دقايق ودخلت علينه هناء كمت سلمت عليها ظلت تباوع الجنطتي حاولت ابين الهه ماكو شي جيت اشوف امي كعدت وكعدنا نسولف وهي ظلت تقصقص وتحجي على اخويه - ميجي اله كل 3_مره ومرات ميبات ومعلي بالمسواك وحاجيات البيت كله اني وحتى امه ميسال عليهه اكيد هي مرته ساحرته ومسويتله شي حتى ليمر علينه ومن هالحجي اني بس ساكته واي واي وامي تتحسر وتتافاف اخر شي كلتلهه كافي ريحته بالدنيا احسن يروح مثل ماذاك راح كالت اي اسمه رجال وعوجت حلگهه صار المغرب وسوت نفسهه محتاره شسوي عشا وظلت تحجي وتكول حيره العشا واني اليوم ممسوكه وماادري بيج تجين اني كتلهه يمعوده ملازم العشا قابل جايه اجربج اني جايه ابقى يم امي شويه لان ضوجه مجايه اكل او مماكله الحمدلله شبعانه لا يمعوده شون يصير هم لازم نضيفج سكتت عنها ورحت توضيت وطبيت لغرفة الجهال امي بيهه هناء طلعت الجيه من خشمي شكد تشكي بعد ماطلعت من الغرفه بقيت بيهه صليت وخلصت ورحت يم امي جانت تقرا قران ارتاحيت من شفتهه خلصت وسدته وخلته ع الصفحه ظلت تباوع الي عبالك قرت الحزن الي بعيوني .. كالت شبيج ييمه احسج مامرتاحه وكفت الدمعه بطارف عيني وماردتها تشوفها خليت راسي على رجليها وايديه على عيوني وبكل برائه وبدون تعقيد گتلهه يمه اريد طفل ... يتبع ..