The Man From Her Book (Filipino)

April 2013. Iginala ni Stef ang kanyang paningin sa buong kwarto. Labis ang kanyang panghihinayang nang mamataan sa sahig ang basag-basag na mga kagamitan; mula sa mga mamahaling figurine hanggang sa mga antigong vase. Bumaling naman siya sa life-sized mirror at muling nanginit ang kanyang mga mata nang mapansing suot-suot pa rin niya ang eleganteng wedding gown. Tunaw na rin ang mascara at nakakalat na sa pisngi ang kanyang lipstick. Kalahating araw na ang nakararaan ngunit hanggang ngayo'y hirap pa rin siyang tanggapin na hindi sumipot sa kasal ang lalaking pinakamamahal. "Why did you do this to me, Greg?" bulong niya sa pagitan ng kanyang mga paghikbi. Durog man ang puso't kaluluwa, sumagi sa isipan niya ang magsulat. Kaya binuksan niya ang laptop at taimtim na nagtipa habang maya't maya ang pagpupunas ng kanyang mga luha. Pagkatapos makasulat ng limang pahina'y binigyan niya ito ng pamagat na Sanely In Love with You. Alas-tres ng madaling araw nang makaramdam siya ng pagod kaya nakatulog siya sa mesa. Kinabukasan, dumating sa kaniyang bahay si Tamara, ang ninang niya at isang beteranang manunulat. "I feel sorry for what happened, Stef." Ilang sandali pa'y nahagilap ng kanyang paningin ang mga papel na nagkalat sa mesa habang ang ibang pahina'y nakasaksak pa sa printer. Isa-isa niya itong pinulot, pinagsunod-sunod, at masusing binasa. Pagkatapos nito'y napataas ang mga kilay niya at sapilitang ginising ang natutulog na inaanak. "What Ninang?" ani Stef na naghihikab pa at nakahawak sa masakit niyang ulo. "This is perfect, Stef. You have to pass this manuscript to OneWord Publishing House!"