Rylee
HUMINGA ako nang malalim bago pumasok sa loob ng mansyon. Umaga na ako nakauwi dahil hindi na naman ako tinigilan ni Oldie. Pakiramdam ko nga ay nanakit ang buong katawan ko. Grabe siya. Akala ko kapag matanda na medyo mahina na pero siya… No comment.
“Iha, mabuti naman at umuwi ka na,” salubong ni Yaya Merlinda sa akin at agad akong niyakap. “Sobra akong nag-alala sa ‘yo. Alam ko na malaki ka na pero huwag mo nang uulitin ‘yon. Ang daddy mo halos hindi alam kung ano ang gagawin mabuti na lang at nandiyan si Marla.”
Naipikit ko ang aking mga mata nang marinig ang pangalan niya. Inaamin ko na nagalit ako, totoo ‘yon. Ano ba dapat maging reaksyon kapag nalaman mo na niloko ka, pinagmukhang tanga? Ginantihan ko ang yakap ni Yaya Merlinda hanggang sa marinig ko ang boses ni Daddy.
