GABING-GABI na nang magdesisyong bumalik sa Maynila sina Yu at Matt. Hindi pumayag si Matt na magkahiwalay silang bumiyahe. Iniwan na lang ni Matt ang kotse nito at nagpumilit imaneho ang sasakyan ni Yu. Ipapakuha na lang daw ni Matt ang sasakyan nito kapag maglilipat na si Aling Melai.
Mag-aala-una na nang sa wakas ay makarating sila sa condominium building niya. “Dalhin mo na lang itong sasakyan ko. Ipasauli mo na lang bukas. Wala naman akong trabaho bukas kaya hindi ko ito gagamitin,” sabi ni Yu kay Matt nang umibis siya ng kanyang kotse.
Hindi na nagulat si Yu nang bumaba rin si Matt ng sasakyan. Lumapit ito sa kanya at inilahad ang kamay. “Let me walk you to your door,” sabi nito. Walang pagdadalawang-isip na inabot niya iyon. Magkahawak-kamay silang naglakad patungo sa elevator.
“
