“MA’AM, nasa labas si Mr. Monterubio,” anunsiyo ni Violy.
Binalot ng kaba si Nicole. Hindi niya inaasahan si Art. Sa mga nagdaang linggo, hindi iilang beses na naisip niya ang mga posibleng senaryo ng kanilang paghaharap. Inisip din niya na siya ang lalapit dito, lalo na nang matuklasan niyang nagdadalang-tao siya.
Pero bawat senaryo, walang konklusyon dahil lagi na lang nanghinina ang loob niya na makaharap si Art. Madali lang ba niyang ipapaliwanag na hindi pala siya baog gayong siya mismo sa sarili, hindi kaagad napaniwalaan ang bagay na iyon?
Pero hindi rin niya inalis sa isip na makakaharap niya si Art. Una ay alam niyang darating din ang araw na magtatagpo ang landas nila. At kung buntis man siya o nakapanganak na, hindi naman niya balak itago ang anak niya, In fact, kakaibang say
