"Lumago lalo mga negosyo niya simula no'ng umalis ka."
Mahinang natawa si Vanessa. "Workaholic si Liam. Trabaho lang ang paraan niya para makalimot."
"At alak," dugtong ng dalaga. "Alam mo ba na ilang beses 'yong gumising na may matinding hangover? Minsan nga, susuray-suray pa 'yon habang papalapit sa akin, e."
Ilang araw na silang nagkikita ng dating nobya ni Liam. Madalas ay pinapasama niya ito sa pagbabantay sa mga kapatid niya. Pabalik-balik kasi ito sa ospital na malapit sa playground. Kaya naman kapag maayos ang pakiramdam nito ay naiisipan nitong magtungo roon at panoorin ang mga bata na maglaro.
"Mahilig pala siya sa mga bata, 'no?"
Mapait itong ngumiti. "Kasama na kasi 'yon sa mga plano namin dati. Magkaro'n ng anak. Pero..."
Pareho silang umimik. Hindi magawa ni Rian na ma
