WALANG ibang tumatakbo sa isip niya kundi ang tanong na 'bakit'. Bakit ni isang beses ay wala siyang natanggap na kahit na anong tugon mula kay Terence buong magdamag?
Kasalukuyan siyang nasa loob ng sasakyan papunta sa kompanya nito upang pumasok sa trabaho at para na rin kausapin si Terence tungkol sa nangyari sa kanila noong isang gabi. Gusto niyang malaman kung ano na ang magiging kahihitnan ng magiging relasyon nila. Napuno ng pag-aalala at pagtataka ang isip niya na halos hindi na niya namalayan na tumigil na pala ang kotse at nakabukas na ang pinto niyon habang naghihintay ang driver na noo'y nakababa na pala upang alalayan siyang makalabas.
Agad siyang bumaba at nagpasalamat sa driver sa paghatid sa kanya. Sinamahan naman siya ng dalawang tauhan ni Terence sa paglakad hanggang sa
