XXIII.
NANG MAKAPASOK sa silid na itinuro ni Kram ay hindi muna nahiga si Aryana. Kinuha niya mula sa case ang kanyang laptop at ipinasok ang mini-SD na kinuha mula sa kanyang opisina sa New York. Sa ngayon ay sarado ang New York branch ngunit open pa rin ang nasa Pennsylvania, na hawak ng isa sa mga kaibigang pinagkakatiwalaan niya.
Matamang pinanood ni Aryana ang laman ng SD, nakita niya kung paano nagsaya ng lubos si Jake nang malamang patay na siya at solo na nito ang New York branch. Galit ang naramdaman niya para sa itinuring na kapatid at matalik na kaibigan.
Pumatak ang kanyang luha sa pagkaalala sa mga panahong magkasama sila sa iisang bubong ng ilang taon hanggang sa ginawa niyang kasosyo ito sa New York branch bilang pasasalamat sa lahat ng tulong at pagaaruga nito sa kanya.
