NAITAKIP na lang ni Riri ang mga kamay niya sa bibig niya para pigilan ang malakas na paghikbi niya nang ipasok na sa emergency room ang duguan na si Stranger.
Hanggang ngayon, hindi pa rin niya makalimutan ang nangyari kanina. Tumakbo si Stranger at itinulak si Tita Sarah para hindi ito mahagip ng sasakyan. Pero dahil mabilis ang takbo ng kotse, hindi nagkaro'n ng pagkakataon si Stranger na mailigtas ang sarili nito.
Hindi pa rin mawala sa isipan niya ang imahen ng paghagis ng katawan ni Stranger sa salamin ng kotse hanggang sa nagpagulong-gulong ito sa kalsada. Sa tingin nga niya ay pareho na lang silang napasigaw ni Tita Sarah.
Nang lumapit si Riri kay Stranger, duguan na ito at walang malay. Tumawag naman agad ng ambulansiya si Tita Sarah. Sa kabutihang palad, mabilis 'yong dumating
