Nakaimpake na sa loob ng luggage ang lahat ng gamit ni Georgia. Ang passport, visa, flight ticket at importanteng dokumento ay nasa loob na na rin ng bag niya pati na rin ang kaniyang gamot sa sakit sa puso na ibinigay sa kaniya ng kaibigang doktora.
Tinawagan kasi siya ng eskwelahang papasukin niya na p’wede na siyang pumunta sa Central Saints Martins para raw makompleto niya na ang requirements na kailangan. Hindi niya lubos maisip na matatanggap talaga siya sa magandang eskwelahan na iyon na sikat sa London. Iyong iginuhit niyang mga damit ay talaga namang nagustuhan nila. Masayang-masaya siya ngayon pero hindi niya ipagkakaila na may isang parte ng katawan niya ang nalulungkot. Napabuntong-hininga siya, alam niya na kung bakit. Maiiwan kasi ang puso niya sa manhid na binatang doktor.
