PAGPASOK NAMIN NG SILID NI DOS ay isinara nitong muli ang pintuan sa kanyang likuran, bago maingat akong inakay palapit sa malaki nitong kama at iniupo sa gilid niyon. Patiyad na naupo sa harapan ko at saka hinawakan ang mga kamay ko. Tumingala sa akin. Matiim na tumitig sa aking mga mata. Tila inaarok ang nasa kalooban ko.
Mataman naman akong nakatingin lang din dito. Hindi ako umiimik. Hinihintay ko na siya ang unang magsalita.
Inaasahan ko na uumpisahan na nito ang pagpapaliwanag sa akin kung sino ang mga kausap nito kanina. Bagaman parang may kutob na ako tungkol doon, gayon din, kung ano ang sadya ng mga ito, base na rin sa mga iniwang salita ni Dos sa ginang bago kami umalis doon, ay nais ko pa rin na sa kanya mismo manggaling ang buong kwento. Nais ko na siya ang magsabi sa akin n
