Teach Me How to Die

Kabanata 9

Narinig ko ang biglang pagsigaw ni Ms. Velasco. Tila alingawngaw na nagmumula sa isang malawak na yungib. Naglaho ang mga kamay na kanina lang ay mahigpit na nakapulupot sa leeg ko. Habol ko ang paghinga. Marahan akong nagdilat ng mga mata. Nabungaran ko ang nakatayong si Layla sa hindi kalayuan hawak ang payong. May bakas ng dugo sa matulis na dulo nito.

"Y-You b***h!" nanlalaki ang mga mata na bulalas ni Ms. Velasco. Nakatayo ito sa isang sulok habang sapo ng nanginginig na kamay ang kaliwang balikat. Mistulan itong mabangis at mailap na hayop na nahuli sa isang patibong. Sumisirit sa mga daliri nito ang masaganang dugo na siya namang pumapatak sa aspaltong sahig. "Damn you, Castillo. S-Sinaksak mo 'ko gamit ang payong. Tampalasan kang ulupong ka!"

Bakas sa bilugang mukha ni Layla ang matinding takot. Nagpabalik-balik ang tingin nito kay Ms. Velasco at sa akin na tila ngayon lang nito kami nakita sa buong buhay nito.

"P-Papatayin mo si Miya," nangangatal na sagot ni Layla sabay atras. "Bakit mo papatayin si Miya? D-Demonya ka talaga, Dragon Lady!"

"Higit pa d'yan, Castillo. Higit pa d'yan!"

"Isusumbong ko kayo kay Papa. Pulis ang papa ko!"

"Siya nga?" Bahagyang napangisi si Ms. Velasco. "Makapagsusumbong ba ang patay?"

"Layla, sa likod mo!"

Bago pa makalingon si Layla ay matagumpay na itong nahawakan ni Mrs. Villarica sa magkabilang balikat.

"Bitawan mo 'ko!" Sinubukang hampasin ni Layla ng payong sa mukha si Mrs. Villarica pero agad na nakailag ang prinsipal.

Tiim-bagang na kinapitan ni Mrs. Villarica sa magkabilang dulo nito ang payong at buong giting na inilapat sa leeg ni Layla.

Namilipit sa sakit si Layla habang sinusubukang pigilan ang prinsipal sa ginagawang pananakal gamit ang payong. Nang makahanap ng tyempo, buong lakas nitong binunggo ang ulo sa nakangising mukha ni Mrs. Villarica.

"Pakialamerang bata!" angil ni Mrs. Villarica. Nagsimulang tumagas ang dugo mula sa natuklap na balat malapit sa ilong nito. Binitiwan nito ang payong at buong lakas na kinapitan sa balikat at baywang si Layla sabay buhat rito.

"Bitiwan mo ako!"

"As you wish."

Parang papel na itinapon ni Mrs. Villarica si Layla sa isang sulok. Tumama ang katawan nito sa ibabaw ng lamesa. Kasama nitong nahulog sa sahig ang lamesa maging ang mga nakabalot na regalo at mga plato.

"Layla!" Nanginginig ang mga kamay na gumapang ako patungo sa kinaroroonan ni Layla. Parang sasabog na bulkan ang leeg ko sa sobrang sakit. Pero hindi ko na ito ininda. Kailangan kong matulungan si Layla. Nakahandusay ito at walang malay. Gusto kong magsisigaw at umiyak. Bakit ginagawa sa amin ito nina Mrs. Villarica at Ms. Velasco? Ang gusto ko lang naman ay katarungan. Bakit kailangang umabot sa ganito ang lahat?

"b***h! Halika rito! Hindi pa ako tapos sa 'yo," narinig kong sigaw ni Ms. Velasco sa likuran ko. Binilisan ko ang paggapang. Halos makakabangon na ako nang marahas nitong hablutin ang buhok ko at isubsob ang mukha ko sa sahig. Naramdaman ko ang pagragasa ng dugo sa noo ko. Kasabay nito ang pagkahilo na ngayon ko lang naramdaman sa tanang buhay ko. Pakiramdam ko mabibiyak ang ulo ko. Gusto kong masuka.

"See? Antipasado? I told you you're gonna regret it," anas ni Ms. Velasco. Muli nitong pinulupot ang mga kamay sa leeg ko habang humahagikhik na parang baliw.

"B-Bitawan mo 'ko. Hayop ka," garalgal na sambit ko. Pinaghahampas ko ang sugat nito sa balikat.

Napasigaw si Ms. Velasco. Saglit nitong nabitiwan ang leeg ko. Bago pa ako makabangon ay muli ako nitong dinaganan sa tiyan at sinakal. Muling sumilay ang ngiti sa duguan nitong mukha.

"Katapusan mo na, Dragonslayer," nanggigigil na anas nito. Lalo nitong hinigpitan ang pagkakasakal sa leeg ko.

Muli kong kinalmot si Ms. Velasco. Tumuklap ang balat nito sa pisngi at rumagasa mula roon ang sariwang dugo. Kinuyom ko ang magkabila kong kamao at sinuntok ito sa mukha. Paulit-ulit. Pero kung sadyang matigas lang talaga ang mukha nito o mahina ang mga suntok ko, Diyos lang ang nakakaalam. Nanghihina na ako. Parang may apoy na tumutupok sa loob ng dibdib ko papuntang leeg at batok. Unti-unti nang nawawala ang pakiramdam ko. Ganito ba ang pakiramdam ng mamamatay na? Mamatay na ba ako? Ayoko pang mamatay!

Nahablot ng nanghihina kong kamay ang nakatapal na belo sa ulo ni Mrs. Velasco. Nalaglag ito sa sahig. Lumantad ang makintab nitong bumbunan na kasing gaspang ng bunot.

"Gagawin kong wig ang buhok mo, you little piece of dying shit."

Gamit ang natitira ko pang lakas, kinapkap ko ang bulsa ng uniform ko. Dumampi sa mga daliri ko ang hinahanap ko.

"Die! Die! DIE!" punum-puno ng kasiyahan na sigaw ni Ms. Velasco habang nakatingin sa akin. Nagtutuluan mula sa nakabukas na bibig nito ang magkahalong dugo at laway na siya namang pumapatak sa mukha ko. "Mamatay ka! Mamatay ka!"

Tinusok ko ng ballpen ang mukha ni Ms. Velasco. Nabasag ang kaliwang lens ng salamin ng dragon nang tumagos ang matulis na dulo ng ballpen. Bumaon ito sa mata nito.

"AAAAHHHHHH!"

Bumulwak mula sa mata ni Ms. Velasco ang masaganang dugo. Lumuwag ang pagkakahawak nito sa leeg ko. Pumapalahaw na sinalat ng mga kamay nito ang nagdurugong mata. Walang humpay ang paglabas ng maaanghang na mura mula sa nagdurugong bibig nito.

Wala akong sinayang na sandali. Agad kong sinipa sa tiyan si Ms. Velasco. Tumilapon ito ng ilang metro mula sa akin at nanggagalaiting nangisay sa sahig habang hawak pa rin ang nagdurugong mata.

Sinulyapan ko ang hawak kong ballpen. Tumutulo mula rito ang dugo ni Ms. Velasco.

"Ahhhhhh! Hayop kang bata ka. Pagbabayaran mo ang ginawa mo sa akin! Papatayin kitang demonyita ka! Ahhhhh!" sigaw ni Ms. Velasco. Panay ang pagtulo ng dugo sa napisak na mata nito. Nangangatog na napaluhod ito sa sahig at humagulhol na parang bata na inagawan ng paboritong laruan.

"Tingnan mo ang ginawa mo, Antipasado! Binulag mo ang isang mata ni Ms. Velasco, y-you little devil," naiiyak na bulalas ni Mrs. Villarica. Nasapo nito ang bibig habang nakasulyap sa humahagulhol pa ring si Ms. Velasco. May mga luhang tumulo sa magkabilang pisngi nito. "Paano mo ito nagawa sa kanya!"

Sinusubukan niya akong patayin kanina, gusto kong ipagsigawan, pero ungol lang ang lumabas sa bibig ko. Pakiramdam ko nahimay nang sobra ni Ms. Velasco ang leeg ko. Parang may mainit na sementong nakapasak sa lalamunan ko. Tumikhim ako sabay dura ng malagkit na dugo sa sahig. Medyo umiikot ang paningin ko. Gusto kong mahiga sa sahig. Palipasin ang pag-aalboroto ng ulo ko. Gusto kong magpahinga kahit saglit. Pero alam kong kapag ginawa ko ito at nahawakang muli ni Ms. Velasco, siguradong magiging permanente na ang pagpapahinga ko.

Pinilit ko ang sarili ko na makatayo.

"Antipasado!"

Tinapunan ko ng tingin si Mrs. Villarica. Nakatayo ito sa likod ng lamesa. Tahimik itong umiiyak habang nakatutok sa akin ang hawak na baril.