TINUNGO ni Ndrew ang kaniyang silid upang tingnan doon si Elaina at kausapin tungkol sa nangyari kanina sa kitchen.
Hindi pa umaalis si Adrain dahil masama raw ang pakiramdam nito, kaya naman doon pa rin niya pinananatili ang dalaga sa kaniyang silid.
Wala ito roon nang makapasok siya pero kaagad niya itong natanaw sa balcony pagbungad pa lang niya sa kaniyang silid dahil nakahawi ang makapal na kurtina sa glass-wall window.
Lumakad siya at lumabas sa glass-wall door patungo sa balcony. Narinig nito ang ingay niyon nang bumukas kaya naman kaagad itong lumingon.
"Akala ko umalis ka na," sabi nito bago binawi ang tingin at tumanaw sa malayo.
Lumakad siya palapit sa kinatatayuan ni Elaina at huminto sa tabi nito kalahating dipa lamang ang pagitan buhat dito.
Tumanaw rin siya sa malayo.
