MATAGAL NANG INILIHIM ni Leo ang kanyang nakaraan kay Rita. Pati ang pagkakaroon niya ng anak kay Asuncion ay inilihim niya. Inabot nang mahigit dalawang dekada ang kanyang pagtatago at hindi niya akalain na sa isang iglap lang ay mawawala ang lahat ng paghihirap niya. Hindi niya mapigilang hindi sisihin ang sarili. Naging pabaya siya kung kaya natuklasan ng asawa ang kanyang matagal na inilihim.
Ang plano nila noon ni Asuncion ay ang pakasalan niya si Rita at paniwalain na ito ang kanyang mahal dahil sa pera. Gusto niyang magkaanak sa asawa pero hindi iyon nangyari dahil nagkaproblema sa ovary si Rita. Ang magiging anak niya sana rito ang kanyang gagamitin pero hindi nangyari.
Malaki na ang naging puhunan niya. Kinailangan niyang iwan ang kanyang mag-ina dahil sa kanilang mga ambisyon.
