MALUNGKOT kong tinitigan ang singsing na suot. Kagabi pa lang ito ibinigay sa akin ni Luke, pero mukhang ibabalik ko na agad sa kaniya. Hindi ako mapalagay sa narinig ko kanina na sinabi ni daddy kay Tito Juanito. Kung kailan naman unti-unti na akong nakalalapit kay Luke, saka kami magkakahiwalay. Si daddy pa ngayon ang gustong humadlang sa kasal namin.
Kaninang umaga ay hindi ako kinausap ni daddy kahit pa nakita niya ako. Ramdam ko na may mali. Buong akala ko ay sesermonan niya ako. Pero hindi. Para na lang akong hangin sa paningin niya. At mas lalo iyong nagdudulot sa akin ng takot. Para bang wala na siyang amor sa akin. Hanggang ngayon nga ay hindi ako mapalagay…
Tumunog ang cellphone ko na siyang nagpabalik ng lumilipad kong isipan. Si Melody ang tumatawag. Kumusta na kaya sila ng d
