Nickolas
Nasa labas sila ni Michael para mag-ihaw ng dala nito. Habang naghahanda ito ay kumuha siya ng isang beer at inabot niya rito saka siya nagbukas ng isa para sa kanya. Naalala niya last year abala rin sila ni Jay sa pag-iihaw dahil ang asawa naman nito ang nagluluto. Bukod kina Jay ay nandoon din ang ibang mga kamag-anak ng mga ito kaya masaya. Nang sabihin sa kanya ni Elizabeth na magkasama sila na mag-celebrate ay natuwa siya dahil hindi naman pala siya mag-isa na sasalubong sa bagong taon.
"Matagal na ba kayo ni Gem?" tanong niya kay Michael habang naglalagay ito ng karne sa ibabaw ng ihawan.
"Anniversary na namin next month, Pare," nakangiti na sabi nito saka umupo sa katapat niya na bangko.
"Kayo?" tanong naman nito.
"Three months from now pa," sagot niya saka uminom.
