Three years ago…
Napabalikwas ng bangon si Ronan nang marinig niya ang padaing at pasigaw na tinig ng babae na nasa kabilang kwarto. Hindi ito nagsasalita mula nang iligtas niya pero kaya nitong maglabas ng boses kagaya rin ng ibang pipi na nakikita niya. Hindi niya alam kung ano ang nangyari rito ero isa lang ang sigurado niya, may kinakatakutan ito.
Pinuntahan niya ito at nakita niya ang naguguluhan nitong anyo. Ikaapat na gabi na ito na kasama niya sa iisang bahay. Binigyan niya ito ng kwarto para hindi ito matakot sa kaniya pero nakikita niya pa rin ang pagdududa sa mga mata nito para sa kaniya.
Huminga siya nang malalim, hindi niya maunawaan ang sarili kung bakit pinag-aaksayan niya pa ito ng panahon lalo na at marami itong psychological issues sa tingin niya.
“What happened?”
