TUMINGALA si Amira at nakita niya ang intesidad ng anyo ng kanyang tagapagligtas. Hindi rin nagugustuhan ni Francois ang nangyayari. Awtomatikong nagsilayo ang mga nakapalibot sa kanya. Animo’y nirerespeto ng mga ito ang presensiya ng binata. At noon lang niya narinig ang awtoridad sa boses nito. As if nobody would dare cross him.
“Sir Aklay, nalaman po kasi namin na gusto niyang ipasara ang Kanayama,” sabi ni Manong Tomas.
“Chef Aklay, nandoon po kayo!” anang si Brynette at itinaas pa ang kamay. Mas malakas na ang loob nito at di mangingimi na labanan siya. “Narinig ninyo na mas gusto na lang daw niyang ipasara ang kompanya.”
“Kaya po nagsama-sama kaming mga manggagawa dito para iprotesta siya. Kung mananatili siya sa Banal Mining Corporation at banta siya sa kabuhayan namin, mas
