Jarrah's Pov:
Muli akong tumingin sa oras. Alas cinco y medya na ng hapon.
Pagkaraan pa ng ilang minuto ay ang cellphone naman na nasa ibabaw ng study table ang sinulyapan ko. Naka-maximum ang volume ng message alert tone niyon para kung sakaling mag-text si Theo ay malalaman ko kaagad.
Ngunit hanggang ngayon ay wala. Kaninang umaga pa ang huling mensaheng natanggap ko mula sa kanya. Iyong sinabi n'yang mag-u-update s'ya sa akin sa break n'ya.
Ngunit dumaan na ang lunch break at oras ng meryenda kanina ay wala pa rin akong natatanggap na mensahe mula sa lalaki. Kanina pa ako nag-iisip ng kung anu-ano rito. Hindi ako mapalagay at nag-aalala talaga ako.
Ano na kaya ang nangyari sa kanya? May nakuha kaya s'yang impormasyon? O baka naman ay nahuli s'ya?
Isinara ko ang binabasang aklat.
