Umahon ang tuwa sa puso ko sa sinabing iyon ni Leon, pero kaagad ding nalusaw sa katotohanang niloloko lang niya ako. Baka trip na naman ako nitong asarin. Alam kasi niyang si Brayden ang iniyakan ko kanina.
Matabang akong napangiti. Hindi makapaniwala na ginagamit ni Leon ang pangalan ni Brayden para lang pagtripan ako. Palagi naman niya itong ginagawa, hindi na sana ako nagugulat pero sa totoo lang ay ganoong joke ang gusto kong paniwalaan.
"Umuwi ka na sa inyo, Leon. Pagod tayo pareho, kaya magpahinga na tayo," pahayag ko at saka siya tinalikuran.
"Hindi rin ako naniniwala noong una. Lintik kasi at tinanggap ko na ring patay siya, pero I swear! Totoo ang sinasabi ko!"
Saglit akong tumigil sa paglalakad. Natulala ako sa harapan ko at hindi na rin humihinga para lang mapakinggan ang k
