Panay ang panunukso sa kanila ng mga kasama nila, lalo na si Aqua at si Yaya Rosing, tuwang tuwa ang mga ito na nakikitang pikon na pikon siya ngayon. Parang nananadya pa nga ang mga ito na ipinaririnig kay Raffa ang panunukso ng mga ito. Di na niya itinama ang mga haka haka ng mga ito nang makitang hinalikan siya sa pisngi ni Raffa pagkadating nila.
Halos mamilipit ito sa sakit nang suntokin niya ito sa sikmura sa labis na inis niya dito, di man lang nito naisip na maraming nakakita sa ginawa nitong paghalik sa kanya. Kinakabahan din siya na baka makarating sa kaalaman ni Ryon ang ginawang iyon ng lalaki. Oo nga at pumayag ang lalaki na ilihim nila ang lahat ng kaugnayan niya sa lalaki, ang tungkol sa kanilang pagkakakilala bago paman ang insidenteng iyon.
"Ayan na si Lover boy mo o."
