Seraphine Rose
“Uuwi ka na agad, Seraphine?”
Huminto kaming apat magkakaibigan sa tapat ng building at napatingin ako kay Syd dahil sa tanong niya sa akin.
“Oo, may pupuntahan kami ni Zach,” sagot ko naman.
“Lagi na lang kayo magkasama ng boyfriend mo. Wala ka ng oras sa amin,” nagtatampong sambit ni Syd.
Kinuha ko ang kamay niya at umirap naman siya sa akin. Gusto ko man sumama pero nakaplano na ang araw ko kasama si Zach. Ayokong hindi matuloy ‘to lalo na’t mga magulang ko pa naman ang pupuntahan naming dalawa.
“Babawi na lang ako sa susunod, Syd,” sagot ko naman.
“Bahala ka,” aniya.
“Tumigil ka na, Syd,” singit ni Lexi at binangga ang balikat ni Syd. “Kung ako ang may boyfriend na katulad ng boyfriend ni Seraphine, pababayaan ko na lang kayo. Sasama ko lagi sa boyfriend ko!”
