JEAN'S POV
KALALABAS ko pa lang galing airport nang patakbong parahin ang isang taxi na paparating. Agad akong sumakay pagkatigil nito sa harap ko.
"Manong, sa may Claveria Medical Hospital."
Hindi matapos-tapos ang kaba at pag-aalala ko nang mga sandaling 'yon. Kahit wala pa akong masyadong tulog ay agad akong nagpunta sa airport at bumili ng ticket para makauwi rito sa Cebu. At exactly 6 this morning ay nakalipad nga ako pauwi sa lugar namin. Bandang alas-tres ng madaling araw nang maka-receive ako ng text at tawag. Isinugod daw ang mama ko sa ospital sabi ng stepfather ko.
Pagkarinig ko niyon ay para akong robot na awtomatikong gumawa ng paraan para makauwi. Habang nasa biyahe kanina ay napapaiyak na ako. Na-stroke daw si Mama. Ngunit buti na lang at agad nilang naisugod sa ospital.
