Phišo - Puku Ya 4 Ya Kgokagano Ka Madi

Kgaolo ya 1Micah o be a ikhuditše mpeteng a tatilwe ka dipantetše a thoma go bonala bjalo ka setopo se tatilwe ka mašela. A palelwa ke go itshwara a myemyela Mdi. Tully a mo dikologa bjalo ka kgogo gomme ka dinako tše dingwe a šikinya hlogo ya gagwe. Le yena o be a sa ngongorege ka palo ya sebolaya sehlabi seo a mo hlabago ka sona letsogong la gagwe. O be a kgona go ipona ka seiponeng sa boaparelong go selaganya phapoši gomme a thoma go emiša ntšhi ya leihlo efela a akanya kgahlanong le seo ka ge go mo kwešitše bohloko ka bjako. Ba be ba šetše ba mo netefaleditše gore Anthony o hlokagetše efela a palelwa ke go itshwara a duma ge nkabe phiri ya mofetogi e phele gore a tle a tlaiše seota seo ka tsela yeo a mo tlaišitšego ka gona. Kanegelo yeo ba mmoditšego yona e kwagala bjalo ka lehu la ka pejana. Yena o be a ka se potlakiše seo. “Ke nagana gore bafotegi ba tla feleletša e le lehu la ka,” Mdi. Tully a hemelana ka boleta. Bafetogi… mangau le dikatse tša naga, ba na le lefelo le boleta ka pelong ya ka. O belegišitše yo mongwe le yo mongwe gomme o be a tlwaelane kudu le bommago bona. “Lebelela fela sebopego seo o ipaketšego sona.” Micah a ngota molomo a lebeletše seling a ekwa a tšewa ke lediitšane ge sefehlamoya sa seling se dikologa. “E be e se molato wa ka ge ke tla golegwa le go tlaišwa.” Mdi. Tully a mo phaphatha phatleng ka boleta ka ditlha tša menwana ya gagwe. “Ga ke kwane le seo Mosepela lefaufaung yo monnyane. Ge eba dikanegelo tšeo ke di kwelego ke nnete, o ile wa emeletšana le mofetogi wola wa phiri wa go tšhoša gomme ke ka fao a go golegilego.”ke “Ka fao o re ke ipaketše se?” Micah a botšiša, a hlokomologa dimyemyelo tša batho ba bangwe ka phapošing. “O se tsene bagolo ba gago ganong,” Mdi. Tully a boela morago ka tebelelo ye tiilego. “Ke be ke sa hlwa ke fetša. Bjalo ka ge ke boletše… o emeletšane le mpša yela ya mokautu gomme ke nyaka gore seo se be se swanetše go phethagala.” Micah a lebiša mahlo go Quinn yo a nago le myemyelo ya go re ‘ke go boditše’. O be a sa ikemišetša go lebalela buti wa gagwe. O ile a lemoša Quinn ka ga Anthony gomme a botšwa gore a se itapiše ka seo. O be a holofela gore buti wa gagwe o mogolo o thabile ka ge bjale a sa kgone go ema. “Emiša seo!” Mdi. Tully a rora gomme a mmetha godimo ga hlogo ya gagwe. Tiro yeo ya dira gore hlogo ya gagwe yeo e bego e opa e thome go opa gape gomme a tswalela mahlo a gagwe ka go a pinyeletša. “Hei, ke gobetše fa,” Micah a ngongorega. “O tla dira gore e galefe ge o tšwela pele ka ntwa ye ya bana ba thari, Mdi Tully a araba gomme a fa Quinn tebelelo ya go swana. “Ke swanetše go lletša mogala go setlogolo sa ka gomme ke mo tsebiše gore ke fa kae. Moratiwa wa batho o swanetše go ba a tshwenyegile ge ke se ka gae go araba mogala.” Mdi. Tully ga se a emele motho go mmontšha mo mogala o lego. Ga se lekga la mathomo leo a bilego ka legaeng la gaWilder. O ile a lahlegelwa ke kgato ge a lemoga Michael yo a bego a dutše setulong a homotše sekhutlwaneng sa go fifala ka phapošing. Go be go sa kgahliše ge vamphaya yeo ye botse e swabile le go nagana kudu. Ge lebati le tswalela ka morago ga gagwe, mahlo ka moka a boela morago go Micah. “Go a thabiša mafelelong ge o boile gae mo o swanetšego,” Steven a realo ka myemyelo ye boleta, a leka go uta ntlha ya gore o tshwenyegile. Le ge Micah a boile gae, se sengwe se be se mmotša gore ga se a tšwe kotsing. Micah o be a sehlefetše le mahlo a gagwe a phadima ka mo go sa mo kgahlego. Micah a mmušetša myemyelo efela a thoma go otsela, “Go bose kudu go ba ka ntle ga molete wola wa dihele.” “O be o tšwele tseleng ka nako ye,” Quinn a realo a eme kgauswi le lefasetere a selagantše matsogo a gagwe kgareng. “O ka be o hwile kua ntlong ya ka tlase ge nkabe re sa bona molaetša wo o rometšego Alicia.” Micah a lebelela go dikologa phapoši a nyaka sesi wa gagwe yo monnyane gomme a šunyalala. “Ge o bolela ka Alicia, o gokae? Ka nnete ke be ke holofela gore o tla ba fa.” “O ntlong ya mogwera wa gagwe go fihlela bothata bjo bo feta,” Kat a araba. A lebelela Quinn a ipotšiša gore o tla ema go fihla neng pele a lletša sesi wa bona mogala gore a boe gae. “Goreng a sa boa le rena go tšwa go Anthony?” Micah a botšiša. “Ke be ke nagana gore ka nnete o tla… a lebelela go Quinn gape, a bea molato go yena ka go se bonale ga Alicia ka ge a nyaka seo. Nick a šikinya hlogo efela ka gare ga gagwe o be a befetšwe. O ile a leka go se lebelele Michael ka ge a tseba gore vamphaya e phumotše megopolo ya bohle ntle le wa gagwe le wa Micah. “Mothaka, o swanetše go ba o bethantšhitše hlogo ya gago gantši… Alicia o be a se gona gaAnthony.” “Efela o be a le gona,” Micah a gapeletša. “Ke mmone ka mahlo a ka.” A lebelela Nick efela monna a emiša magetla le go šikinya hlogo. A lebelela sefahlego setee go ya go se sengwe gomme a lemoga gore ga go yo a tlago kgonthiša go ba gona ga Alicia kua ntlong ye kgolo. O ile a gopola ka ntlong ya ka tlase… a swere seatla sa gagwe. O be a lla gomme seo se tla mo ja go fihlela a mmona gape le go kgonthiša gore o gabotse. Ga a tsebe gore sa go kweša bohloko kudu ke sefe… go mmona a lla goba go nyaka a bolailwe. O ile a lebelela gape go dikologa gomme a lemoga gore monna yo a bego a na le Alicia le yena ga a gona mo lešabeng. A šutša, a boela morago mesamelong gomme a beakanya ka setu gore o tla hwetša gore mogwera yo Alicia a dulago le yena ke mang. O tla mo tsoma gomme a nyaka karabo go yena. “O swanetše go ba o lora,” Jewel a realo ka boleta. Micah a lebelela yo mosehlana wa botse gomme a šunyalala. “Ke wena mang?” “Yo ke Jewel Scott Wilder,” Steven a realo le go mo gokara ka matsogo a gagwe a mabotse go dikologa magetla a gagwe. Mdi. Tully o šetše a hlokometše dintho tša gagwe tša dipulete gomme letsogo la gagwe le ka sekgwagetšong gabjale. “Ke molekani wa ka.” “Jewel Scott wa Anthony?” Bjale Micah o be a hlakahlakane le go feta. “Ka monagong wa go gafa wa Anthony fela,” Steven a araba efela a palelwa ke go itshwara go gogela Jewel go yena ka tiiša. Micah a panyapanya mahlo gomme a lebelela Quinn go mo kgopela tiišetšo ge a bona Kat a gomaretše buti wa gagwe o mogolo. A hemelana, a ipotšiša gore Mdi. Tully o mo file selekanyi se sekaakang sa diokobatši ka gore o kare o lahlegelwa ke tlhaologanyo goba bohle e ba lahlegetše. A lebelela go motho o tee ka phapošing yo a tsebago gore o tšea gabotse, Warren. “Ke gogile Rip Van Winkle go ba se sengwe? Ke ra gore, ge ke tloga… Steven o be a sa ratane gomme Quinn o be a na le kgopolo ya tša marato go swana le Dean.” Warren a myemyela, “Go diragetše tše dintši mola o tlogago.” “Go lokile, ke dirile mogala wa ka,” Mdi. Tully a bega ge a boa. Gabotse ga se a lletša setlogolo sa gagwe le gatee. O boletše seo go ba fa lebakanyana la go ba noši le Micah pele a ba koba. “Gabjale… mang goba mang a tšwe gomme le dumelele katsana ye gore e robale.” Micah a rorela mokgekolo. “Ga se nna katsana.” “Moratiwa, katsana ya ka e ka go fenya ntweng ka seemo seo o lego go sona gabjale gape ke lefšega, o tšhaba le moriti wa gagwe,” Mdi. Tully a mo tsebiša. Ge a bolela, a tšea tšhwaana go tšwa ka lepokising la go se tlwaelege leo a tlilego le lona. “Ga ke na bonnete bja gore ke sa nyaka diokobatši tše dingwe,” Micah a hemelana. Go sa na le tše dintši tšeo a swanetšego go di tseba. Taba ya gore ga se a hlwa a bona Alicia ya mo dira gore a kwe bohloko le go feta marapo a go robega. “Ke ka fao o sego ngaka.” Mdi. Tully o be a thabišwa ke gore o sa na le tshegišo… ge a ka thoma go fola o ile go hloka seo. Micah a rora ka boleta ge tšhwaana e tsena legetleng la gagwe gomme a lebelela ka thoko. O hloile go tšea ditaelo go mang goba mang gomme seo a nyakago go se dira ke go tsoma sesi wa gagwe. Bohle ba tšwa ka phapošing ge e goga tšhwaana legetleng la gagwe. Mdi. Tully a ba bogela ge ba tloga gomme a retologela go Micah yo a šetšego a robetše. Lapa la gabo le be thabile ge a boile gae, efela nnete ke gore… o tshwenywa ke katse ya naga. Dikgobalo tša gagwe di be di le šoro gomme a makatšwa ke ge a sa phela. Dikhuru tša gagwe di be di pšhatlagantšwe ke dupulete, dithapa tša gagwe di robegile ka go bethwa ka mehla nako ye telele. Go bonala eke mokokotlo wa gagwe o hwiphilwe ka sefepi sa mohuta o mogwe. O be a sena meetse mmeleng, a na le phepompe, gomme o be a na le tshwaetšo yeo e phatlalalago moeleng wa gagwe wa madi. O be a kabe a mo file phenenseline ge nkabe e le motho, efela ka manyani… dithibelatwatši ga di dire phetogo go bao e sego batho. Le ge e le gore diphoofolo tša bafetogi di fola ka pela… ga go bolela gore ba ka se gobalele saruri… goba ba hlokofala. O tla mo tšea bjalo ka wa mahlatse ge a fola tshwaetšong ye. O ile a lebelela ka sekhutlwana sa leihlo la gagwe go Michael, yo a sa tlogago gomme a sa dutše le go se šuthe setulong sa gagwe. Mdi. Tully o ile a akanya go mo hlokomologa. O ile a nagana kudu ka Michael gomme ge a sa nyake tloga a ka se mo kobe. E be ele yo mongwe wa bao ba tlago go yena gantši go mo tlišetša bao ba gobetšego, efela e sego ka dikgobalo tša gagwe. Ka go hemelana, Mdi. Tully a paka ditlabakelo tša gagwe gomme a emelela. Ka go dumela ka hlogo gannyane ka thoko ga Michael, a tšwa ka phapošing ka setu. Michael o be a tseba gore ke nako ya gore a sepele… o be a nyaka gore pefelo ya gagwe e nyamelele. Alicia ke mathata, efela Damon o be a sa swanela go tla le yena magareng ga ntwa ya dithunya ka tsela yeo. O be a sa kgona go bona tebelelo ya gore ke wa ka sefahlegong sa Damon ge a mo gokara ka matsogo a gagwe go mo dikologa gomme a ipotšiša ge eba histori e ipeakanyetša go ipušeletša. Tebelelo ya gagwe ya retologela go seo se šetšego sa Micah le sebopego sa Alicia a lla ge a swere seatla sa buti wa gagwe, tša boa go yena go mo hlasela. Sebopego se sengwe sa selaganya monaganong wa gagwe… sebopego sa Dean a swere seatla sa gagwe gomme a se bea go Kane gore a se hlokofale. Magareng ga gagwe le Dean… kgobalo ya Kane e ile ya fola gona fao pele ga bona. Michael ga senke a nagana ka seo, efela o ile a bona Syn a dira dilo ka tsela yeo kgale. Go bile le nako ye nngwe ye itšego yeo e sa tlogego kgopolong ya Michael… kgalekgale gomme o nyakile a lebala ka seo. E be e le ka nako ya mesepelo ya bona ya maeto gomme ba gahlana le ngwana wa go gobala. O ile a myemyela ka boleta ge a gopola ka mo Damon le Kane ba ilego ba itshwara ka gona go mosetsana yowe yo monnyane. Leoto le lengwe la gagwe le be le robegile gomme a na le matetelo a madi a mmalwa ao a lego ka magato a go fapana a go fola. Ngwana o ile a gapeletša gore o no wa fela efela mathaka a tseba gore ga go selo lefelong leo seo se ka mo wišago gomme sa mo gobatša. Ge Damon a inamela tlase a kwatama ka pele ga mosetsana yo monnyane gomme a thoma go mo gapeletša gore a ba botše nnete, Syn o ile a mo kgorometša a re, “Ga o dire seo go ngwana wa go hloka bosodi.” Ba ile ba mo thuša go mmušetša ntlong ya gabo efela ka bjako ba dupelela poifo yeo e tšwago ngwaneng. Efela, o be a sa boife bona, e be e le poifo ya go ya gae yeo e dirilego gore pelo ya mosetsana e bethabethe ka maatla. Le ge ele gore ngwana ga se a bolele selo, Michael o tsebile gore ke batswadi ba gagwe bao ba rwelego maikarabelo a dikgobalo tša gagwe ka moka… e sego fela leoto la go robega. Syn ga se a bolele selo go ngwana ka seo gomme a mo phumola dikeledi. Efela, a mmotšiša ka bana babo gomme a araba ka gore ga a na bona. O ile a thoma go bolela ka makgolo wa gagwe yo a dulago dithabeng gomme mahlo a gagwe a phadima ka lerato la setlogolo. Ge a bolela, Syn a bea seatla sa gagwe leotong la go gobala la mosetsana thwii. Ge a fetša kanegelo ya gagwe, e be e se fela leoto la gagwe leo le fodilego eupša le matetelo a nyameletše gape. Ke ka fao Syn a ilego a tšhoša Michael. Ge Kane a kukela mosetsana ka matsogong a gagwe le go thoma go raloka le yena, Syn o ile a batamela kgauswi le Damon.