نساء اليوم

الفصل الثامن عشر

مشكورين جدا على المرور والمتابعة ..هذا جزء ..بس علشان ما تعصبون علي...ندى في صدمه ..شلون عرف ؟؟الحين شلون بتدافع عن نفسها؟؟ فاطمه صار لها أقل من أسبوع ما كلمتها .. دقت عليها على البيت بسرعه ..ظل التيلفون يرن ويرن محد يشيله ..قلب ندى يدق مع رنات التيلفون ..نست أنها تشيك التاريخ اللي طرش فيه ناصر المسج ..وبسرعه بإيدين ترتجف شافت التاريخ ..هالتاريخ من أربع أيام ..ما شافت فيهم فاطمه ولا سمعت عنها خبر ..ترددت ..لكن مافي غير هالطريقه علشان تدافع عن نفسها .اتصلت في ناصر..وقلبها يدق بسرعه من الخوف ..ـــ ألو ..ناصر ..ناصر ـــ ندى ؟؟ولا أناديج هتان ؟؟شرايج اناديج غيوم .ندى ـــ ناصر انت عرفت؟؟ناصر ـــ اييه ..عرفت ..اختي فاطمه يت تعتذر لي عن اتصالها وعدم ردها علي واعتذرت لي لانج صكيت التيلفون في ويهي لان تلفونج انقطع ..لا ..وتدرين شالالإعتراف الكبير اللي اعترفته لي ؟؟ عن لعبه في يوم من الأيام كانت هي وبنت عمها يحاولون يلعبونها علي لكنهم تراجعوا ..أو بالأحرى هي تراجعت وانتي كملت اللعبه ..ندى انخرست ماقدرت تنطق بكلمه .. شتقول له ؟؟أنه رغم انها كانت لعبه لكنها كانت صادقه معاه؟؟بس وين كرامتها؟؟؟ وين كبرياءها ؟؟ناصر ـــ انت ساكته ليش؟؟لاني كشفتج؟؟ لان اكتشفت اني كنت لعبة عندج؟؟ اني كنت مسخرة تضحكين عليها وانا صادق معاج؟؟ اني فتحت قلبي لأكبر حقيرة في هالدنيا ؟ ندى انت شسويتي فيني؟ انت ذ*حتيني ذ*حتيني ..حسستيني اني ما اسوى بيزه.. انت اليوم خليتيني افقد الثقة في كل الناس وأولهم انا ..بسببج فقدت ثقتي بنفسي ..أكرهج ..أكرهج ..صكر التيلفون في ويهها ..وهي غارقه في دموعها ..كلامه اخترقها ما تقدر تتكلم لكن اصابعها اسعفتها وبدت تكتب المسجات ..ناصر على الناحية الثانية كان في غرفته ودموعه في عيونه ..هزه بالحيل خداع ندى له ..وصل مسج.((ناصر انا ماخدعتك . انا ما مثلت عليك ولا ضحكت عليك انا لو تراجع مسجاتي معاك كنت ابتعد عن أي محاولة منك لاقامة علاقة بيننا ..وآراءك احترمتها ))وصل مسج ثاني (مرتبط ا/2 وما ضحكت عليك . ناصر انا حتى ماسألتك ليش كرهتني ومتى حبيتني واتمنى انك تجاوبني الحين))ناصر تردد ..(( يوم قبلت الزواج بسيف هالكلب |))سكر ناصر جواله ..خلاص الأمور وصلت لحد مايرضي أحد ..منع فاطمه من انها تروح لندى ..وأخذ منها جوالها وفصل تلفون البيت .بس لين متى ؟؟؟ندى مالفت جواب سؤالها في مسج ناصر ..متى؟؟ناصر أنا ما حسيت بوجودك أبد في حياتي ..متى ؟؟الجواب يمكن عند فاطمه ..لا ..ناصر مايوصل للحد اللي يفضفض فيه لفاطمه .اتصلت في ناصر مرة ثانية ..وهالمرة هي اللي بتتكلم ..لكن لقت الجوال مغلق ..******************************** أحمد متوتر شلون قال جذي لدلال ..دلال ــ أحمد شدخل عبدالله صار لي ساعه اسألك ليش ما ترد ..عبدالله له يد في الم**رات؟؟أحمد أرجوك جاوبني أرجوك ..أحمد ماقدر يجاوبها ..سحب غترته ـــ أنا عندي دوام ..وطلع وتمت تلحق وراه ..سكوته يأكد كلامه ..دلال ـــ أحمد رد علي أحمد دخيلك ..في ذمتك قول لي ..أحمد حرام عليك أنا دلال اختك تخبي علي .. أحمد ..أحمد ..أحمد ركب سيارته وطلع ..وهو مرتبك ما يقدر يطالع حق دلال اللي فلتت منه كلمه ..بتدمر حياتها .رجعت دلال وهي متوتره ..ميه سؤال وسؤال ..الظنون استبدت فيها ..أمها ليش تكره عبدالله . عبدالله يمكن يكون في تايلند ..الم**رات ..فيصل ..أحمد وسكوته ..هو اللي زرع فيها هالشكوك ..يارب استر ..يا رب استر ..طلعت لغرفتها وقفلت الباب على نفسها ..طول الساعات اللي مرت وهي تدق على جوال أحمد لكنه مصكر جواله ..الساعه وحده ونص في الليل ..نزلت غرفة أحمد ,,لكنها مثل ما تركها .الظاهر عنده عمليه أو شي ..مرت غرفة أبوها وأمها ..كانوا نايمين ..طلعت مرة ثانية لغرفتها وتذكرت منى ..منى أنا نسيتها ..فتحت غرفة حمده وساره ..ولقت منى نايمه في سرير هند ..انقبض قلبها ..شالت منى وخذتها لغرفتها ونومتها على سريرها ..ورجعت غرفة البنات ورتبت سرير هند ..كانت صورتها بقرب السرير ..بملامحها الطيبة ..محد قرب من أغراض هند . كل شي على حطته ..كتبها ..ورسوماتها ..فتحت دلال خزانتها ..ملابسها وحياتها كلها في هالخزانه .دلال احتاجت انها تلهي نفسها بشي ..سحبت درج هند الخصوصي ..حطته على سرير هند وبدت تقلب فيه .لقت رسومات لهند ..وايد روعه ..وتوقيع هند بذ*ل اللوحات .بعدين لقت دفتر خاص لونه مشمشي ..ناعم ..فتحته ..وكانت فيه تو**يع من صديقات هند ..وجمل بسيطه ..دفتر ذكرى على طريقة هند ..زميلاتها كلهم من الفنانات ..ففي الصفحة المقابلة لهل الجمل رسمات غريبة بس حلوة ..حطت الدفتر على جنب ..ولقت دفتر ثاني ..مذكرات ..تواريخ ..وكتبت هند في كل تاريخ شالحدث المهم ..8-4-2002الثامن من ابريل ..ساره رجعت من المدرسة تصيح والسبب ؟انها بطيبتها وتصرفاتها مثل الملاك ينادونها البنات باللي على نياتها ..وهي زعلت من هالشي ..ساره..صدقيني هالأيام هالميزة مثل اللي يقول لج انت ملكة انسانة نبيلة ..ولان هالاشياء اندثرت من زمان فالناس تستقلها ..يعني نادرة الحدوث مب تقلل من قيمتها مثل ما انت فاهمة وانا افتخر انج تحملين هالصفة ..افتخر فيج لان ما لوثتج الدنيا بشرها وخبثها .كلمات هند كانت رائعة . ماقدرت دلال تمسك دموعها ..اختارت صفحة ثانية عشوائية ..30-4-2002اليوم شفتها أخيرا ..ختام ..أحب اسمها .هي من أرقى العائلات في المجتمع ..لا ..من أغنى العائلات ابوي قال لي انهم من عشرين سنة ما كان لهم صيت قوي لين ماصاروا من أغنى الناس .وهي بنت راقية ..لكنها قاسية . ورغم قساوتها فهي مهزوزة ..في شي ناقص في حياتها مثل كل أبناء وبنات الأغنياء هالزمن .يفتقدون أهلهم ..الأباء في صغرهم ..ماكانوا محرومين من شي . كانوا تحت رقابة أهلهم و ووسط اللمة العائلية والحب الأبوي ..فتربوا تربية صحيحة ومستقيمة ..لكنهم كانوا يعانون من شي واحد وهو الفقر ..ما كانوا يحصلون على الأشياء اللي يبونها ..فتعبوا ...واجتهدوا ..والحين اغرقوا نفسهم في الشغل والتعب ..علشان عيالهم مايحسون في اللي حسوا هم فيه من الفقر الحاجة ..الأباء يحققون رغباتهم الطفولية لأولادهم ..ناسين أهم شي ..وهو وجودهم في حياه أبناءهم ..ناسين الوسط العائلي واللمات الحلوة ...نسوا يربون أبناءهم التربية الصحيحة اللي هم تربوها ..أعمى عيونهم المال والفلوس وأن أبناءهم يحصلون على الأشياء اللي هم ما قدروا يحصلون عليها وهم صغار ..ونسوا أنهم يعطون أبناءهم من الأشياء اللي احصلوا عليها وهم صغار ..للأسف اذا الآباء ما تتداركوا هالغلطة بيروح كل تعبهم على الفاضي لأنه ما بيظل لهم هالأبناء ...كلام هند في شي وايد من الحقيقة . غيرت دلال الصفحة ..9-9-2002 اليوم عيد ميلادي .وعندي احساس أنه يوم خاص ..شكرا أحمد ..رغم بعدك أرسلت هديتك الغالية ..أعجبني وايد هالعطر ..بس عندي سؤال انتوا يالرجال ليش دايما العطور الغالية من أهم هداياكم اللي تهدونها للمرأة؟؟ العطر هذا غالي وايد ..أغلى من أني أستعمله ..بس خلينا نعيش ..وها الحين برش منه على هذي الصفحه ..شكرا حمده و ساره على الدباديب والشوكلاته اللي أعطيتوني اياهم .وايد روعه ..يا حلو يا سكر ..شكرا فيصل على الكيكة ..تعبت عمرك ..تعرفني عاشقة لكيكة المانجو .. صورتها علشان أحتفظ فيها كذكرى ..شكرا يوسف على البطاقه ..وايد روعه ..والهدية مب في قيمتها المادية بل في قيمتها المعنوية ..وأنا أسعدتني جدا ..شكرا دلال ..عدة الرسم اللي يبتيها لي ..صراحة أنا شفتها في مكتبة ويوم بغيت أشتريها صدمني سعرها ..فتراجعت ..وأسعدني انج كنت حاسه بالشغلة اللي افتقدها ,وهذي من صفاتج اللي أحبها طول عمرج حاسه باللي نحتاجه ..وماتقصرين علينا ..ما أقدر أنطر متى يي اليوم اللي فيه أنا وأنت نكون في بيت واحد في بيت عمي أنت مع جاسم وأنا مع عبدالرحمن..دلال ماقدرت تتحمل أنها تقرأ أي شي زيادة ..هلت دموعها ..رجعت الأغراض مكانها ..ماعدا مذكرا ت هند ..شالتها معاها الغرفة واحتفظت فيها ..********************** ندى سارحه في أفكارها ويا ناصر والهالات السود من تحت عيونها تقول أنها ما نامت أمس .دلال ويهها منخ*ف ومحتارة ..مانامت عدل ما قدرت تحط راسها إلا الساعة ثلاث الفير .وكل تفكيرها في عبدالله ..وعلاقته باللي يصير مع فيصل .الجازي ويهها شاحب والتعب الضيق باين على ويهها ..كل وحده في عالم ..وشاءت الصدف أن عالمهم ينتمي لمجرة وحدة ..مجرة الحيرة والحزن .رن جرس الحصة الثالثة ..قامت ندى ..واتجهت لحصتها ..طبعا الطالبات متعودين على اسلوب ندى المتسامح .فاول خمس دقايق ماكانوا منظمين وكانوا يتكلمون وايد ..ندى حاولت تمسك عمرها أنها ما تصارخ عليهم ..لكن كان كل بنتين مع بعض يتكلمون ..ولا معطين أي أهمية لوجود ندى ..اللي وقفت وهي صامدة وجهها كله غضب ..وقفة مستقيمة ..وملامحه وجهها تدل أنها ناوية على شر ..البنات انتبهوا على وقوفها بهالطريقة ..فشوي شوي بدت الأصوات تخف وبعدين الكل سكت ..منتظرين الأسوأ ..لحظات **ت كبيرة ..وجو متوتر ..البنات عيونهم منتصبة على ندى ..ولا نفس ..ولا حس ..هدوء عم المكان ..ندى بهدوء ـــ كم ضاع من الحصة وأنا واقفة هنا؟ خمس دقايق ؟ عشرة ؟ ليش لأني أعطيتكم ويهه ؟؟ لاني اعتبرتكم بنات آدميات محترمات؟؟ تمشون بالسياسة؟؟حذفت ندى الكتب اللي على الطاولة بعيد من قدامها ..وصارخت فيهم ـــ أنتوا بنات قليلات الأدب ..بعيدات كل البعد عن الإحترام والسياسة ..أنتوا ما تمشون إلا مثل الح*****ت بالصراخ والزعيق ..ليش قاعدين أنا قلت لكم اقعدوا؟؟ قوموا ..وقفوا كلكم ..وقفوا البنات ..وهم مرتعبات ..ندى ـــ درس اليوم مشروح ..روحوا البيت وفتحوا كتبكم اللي دايما تنسونها واقرؤه وادرسوا ..وبكره فيه اختبار .خذت نفس بعصبية ..وكملت ـــ ما أبي أشوف وجوهكم السنعة ..لفوا وقابلوا الحيط ..ولا تتحرك أي وحدة فيكم ولا أسمع أي حس ..سحبت ندى كرسي المدرسة وحطت على الطرف عند الدريشه ..وفتحت الدريشة ..وراحت وافتحت الباب ..علشان يكونون ف*جة لكل بنات المدرسة .اجلست على كرسيها وتمت تطالع من الدريشة . وتمت جذي لين آخر الحصة .********* الجازي ـــ شفيكم أشكالكم انت وندى يقول كأن في حد ميت ؟.دلال ما تقدر تصارح الجازي باللي في قلبها ..فردت على السؤال بسؤال .ـــ أنتي مو مفروض أنج تمتنين مثل باقي الحوامل..أشوف الع** يصير ليش ما تاكلين؟الجازي ـــ أبد ..بس مالي نفس ..دلال ـــ كلي علشان هالمخلوق اللي في بطنج ..ولا تبينه يطلع متخلف لها الدنيا من نقص الأكل ..أشك أنج تتنفسين كفاية .الجازي ـــ مالي نفس ..مالي نفس ..دلال ـــ أنا الحين بطلب من الكافيتريا سندويتشات وعصاير وبناكل لين نقول بس ..فل ..الجازي ـــ ماله داعي مالي نفس ..ما أشتهي ..دلال ـــ ولا أنا مالي نفس ولا أشتهي لكن ..بناكل .ورجعوا لسكوتهم .. لمدة دقايق ..الجازي ـــ شخبار سعاد ؟؟ متى بتطلع من المستشفى ؟دلال ـــ ما أدري ..آخر خبر سمعته عنها أنها أوكي صارت تتحسن ,,.ورجعوا لسكوتهم ..مافي موضوع يتكلمون فيه ..ومر الوقت بطيء ..ورن جرس الفسحه في ذات الوقت اللي وصلت فيه الطلبيه ..حطت دلال الأكل ودخلت ندى ..دلال ـــ تعالي كلي ..ندى ـــ مالي نفس ..دلال ـــ صرنا ثلاثة تعالي ..بنتغلب على هالمالي نفس وناكل غصب .جلسوا ثلاثتهم على الأكل ..وهمومهم اجلست معاهم ..ترددوا أنهم يمدون أيديهم ..دلال ـــ كلوا ..دلال نفسها مادمت يدها ..رغم الأكل شهي .. قامت الجازي ـــ ما قدر أبي أرجع ..لاعت جبدي ..وطلعت الجازي للحمام ..ندى ـــ وأنا ما أقدر ..ما أقدر ..قامت عن الأكل ..دلال ـــ وأنا مثلج بس بغيت الجازي تاكل ..شوفي ويهها شلون صاير ما فيه دم مو زين للجنين اللي في بطنها .ندى ـــ محد مرتاح ..محد مرتاح ..دلال ــ باخذ الأكل للبنات .وطلعت دلال شايله الأكل وأعطته لبنات كانوا متجمعين ..

احمد اليوم ما بين .دلال ناطرته على نار الساعة صارت ست المغرب ..دلال تنتقل من غرفة لغرفة ..فيصل مو موجود ولاسعد ولايوسف ..ابوها في بيت عمها من العصر ومنى مع حمده ..اتصلت في أحمد ..لكن للحين مسكر جواله .تمت نص ساعه وهي تلف وتدور في الحوش .دخل أحمد بسيارته ..ويوم شاف دلال توتر ..لكنه هدى نفسه ..وذكر الله ونزل ..دلال ـــ حمدالله على السلامة ..من أمس ما شفتك ..أحمد ــ أهلين ..عندي مناوبة والصبح أجريت عملية مستعجلة ..دلال ـــ أحمد ..ما أبي أتعبك فلا تعبني أنا على أعصابي من أمس ..أحمد ـــ أدري ,,أسف أنا غلطت ولمت عبدالله مع انه ماله يد في الموضوع .دلال ـــ لكنك قلت ..أحمد ـــ أدري أني قلت ..اعذريني ..عبدالله الشغلة الوحيده اللي تسبب فيها انه أخذ فيصل معاه لديوانية واحد من ربع ربعه ..وهناك التقى الحثالة اللي اعطوه هالسم .دلال ـــ مو معقول ما أصدقك ..|أحمد ـــ يعني أنا أكذب ؟؟؟ دلال ـــ لا محشوم ..بس ..لو هالشي صحيح كان قلته لي أمس ..موتميت تتهرب مني طول اليوم .أحمد ـــ دلال أنا كنت مختبص ومحتار بفيصل ما أعرف شفكر وشقول ..دلال صدقيني الكلام اللي قلته لج هو الصحيح ..دلال ـــ وفيصل ..شبتسوي معاه ؟؟أحمد ـــ أنت بس انسي كل اللي يصير ..وأنا بتكفل بالأمور من تحت لتحت ..وحاليا قدرت أمنع فيصل من هالسم ..بس لا تسألين لا تطور شي بقولج ..أنا من أمس تعبان وودي أنام ..عن اذنج ..راح عن دلال ..اللي ماصدقت ولا حرف من اللي قاله ..لكنها مالها يد غير انها تصدق هالشي . لازم تتفاءل مع ان قلبها يقول لها أن في أشياء ..بالأحرى مصايب هي ما تعرف عنها شي ..********في بيت محمد وكانت خلود معزومة على العشا عنده ...خلود ـــ دام خلصنا العشا ..خلينا نطالع تلفزيون .محمد ـــ اللي يسمعج تتكلمين يقول انتي المضيافة وراعية البيت .شيماءـــ البيت بيتها ..وأهلا فيها بأي وقت ...راااني ..تعالي شيلي السفرة ..يله نطالع التي في ..جلست شيماء وقربها خلود وبعدين محمد .محمد أخذ الريموت ..وبدا يقلب في قنوات الد ش .خلود ـــ فديتك محمد ..لا تحط اخبار .محمد ـــ ابي اشوف الموجز .خذت خلود الريموت من يده وحطت قناة عجمان كانت برامج هندية طالعه هالحزة ..شيماء ـــ لا ..ما احب الافلام الهنديه ..غيريه ..وخذت شيماء الريموت من يد خلود ..وحطته على ميلودي .وكانت نانسي عجرم تغني ياي ..قام محمد وجلس بقرب شيماء وخذ الريموت من يدها ــــ بنشوف برنامج الاتجاه المعا** على الجزيرة .وحط القناة على الجزيرة ..قامت خلود واخذت الريموت من يده ـــ البرنامج يطلع عشر ونص .وحطت القناة على امبسي تو ..وكان انجل .شيماء تاخذ الريموت من خلود ـــ بحطه على روتانا ..وكان كاظم ..دخلت دانة الصالة وانسدحت قدام التلفزبون ـــ حطوه على سبيس توون طلع توم وجيري .شيماء ما عاندت وحطت سبيس تون .كان طالع توم وجيري القديم (الأصلي) كانت حلقة توم مع الفأر القوي ..اللي يلبس قبعه مع ثوب اصفر مخطط بأخضر .كان شيماء تتابع مندمجة ..وتضحك وخلود تضحك ومحمد يطالعهم مستغرب ..وطالع الكرتون معاهم ..محمد طالع شيماء اللي كانت مندمجة مع الكرتون . .كانت لامة شعرها ومرخيته على ظهرها .. ليش الحب اللي في قلبه لها خف ؟؟ هو موجود ..لكن ..مو مثل قبل ..للحين كل ما يشوفها تهتز مشاعره معلنة عظمتها في قلبه ..لكنها ثواني وتخر ..تن*د ..لكن الشي المهم انها موجودة ..خلود ـــ بروح البيت الحين ..دانة تجين تباتين عندي نشوف ديزني شانل طول الليل ؟؟دانة ــ ايه..خلود ــ محمد تسمح؟محمد ـــ اسألي شيماء ..بالنسبة لي ما عندي مانع .شيماء ـــ معليش ..خليها تروح مع عمتها .بس بيجامتها فوق ..خلود ـــ خليس قاعده انا بجيبها .في غرفة الصغار؟هزت شيماء راسها ـــ تماما ..طلغت خلود وخذت البيجامة ونزلت وخذت الدانة وطلعت .محمد تم يقلب في قنوات التيلفزيون ..الساعة الحين حوالي تسع ..سارة نايمه ومها نايمه وراني راحت غرفتها تنام .محمد ـــ ملل ..شيماء ـــ قوم نام ..محمد ــ سارة انا ولا دانة انام الساعة تسع .تدرين ...البسي عباتج بنطلع ..شيما ارتبكت ..ـــ البيت ما اقدر اخليه فاضي والبنات ..محمد ـــ خلود للحين ما وصلت للبيت الحين اكلمها .وقام محمد واتصل بخلود اللي للحين ما دخلت باب البيت ..ورجعت لبيت شيماء ..محمد ـــ خلود بما انج بتسهرين طول الليل مع الدانة ..اسهري هنا واحنا بنطلع انا وشيماء ويمكن نتأخر ..شيماء ساكته ..هي نفسها ملانه ...شيماء البست عباة الكتف مع شيلة واسعة وتغشت ما تبرقعت ..وطلعت معاه ..وهم في السيارة ..محمد ـــ بتمين طول الوقت ساكته ؟؟شيماء ـــ احمد ربك اذا ما نمت في الطريق .محمد ــ ليش تنامين هذا موعد نومج الحين؟؟شيماء ـــ لا ..أنام الساعة احدعش ..محمد ـــ شيماء تكلمي عن أسبوعج هذا اللي راح شسويتي فيه؟شيماء ـــ يوم الأربعا اللي راح خذيت مها للتطعيم .. وشيكت عند الدكتور بالمرة البنات .. زرت عمتي ..أمك ..وتميت معاها يوم الخميس كله ..مرضت علي مها من التطعيم ..وكالعادة ركضت للدكتور اللي مل من شوفة ويههي ..خذيت راني للفحص الطبي ..اجراء شكلي أخاف على صحة البنات وراني تتفهم هالشي ..رحت السوق مع البنات ..خذتهم ليدتهم ام صالحة .. ..وأمس رحنا المول ..لعبنا شوي ..محمد ـــ كل هذا وأنا غايب عن الأحداث؟شيماء ـــ كنت اما نايم أو بره ..وين بتاخذني ؟؟ العشا ؟توني ماكله وشبعانة حدي ..محمد ـــ بآخذج الكورنيش ..تهضمين ..شيماء ـــ بحر في الليل ؟؟ تبي يني يدخل فيني ؟؟مو زين ..محمد ـــ من قال لج مو زين ؟؟من قص عليج ؟؟شيماء ـــ أمي قالت لي موزين وبعدين الجز بارد ..مافيني أطلع ..محمد ـــ لا ما عليج ..الجو حلو وما في أي ينانوة ..بعدين آخذج للسينما ونتمشى ..ونشرب كرك ونرجع البيت ..واوعدج قبل الساعة 12 تكونين في البيت ..مثل سندريلا ..شيماء ـــ لا على جذي بكون شيماء ريللا ..بس ياليت مافي سينما مالي خلق ..لو أبي كان قعدت في البيت .محمد ـــ طلباتج أوامر ..شيوم ريللا ..*************************** هاي سوري على التأخير الجزء بيكون بسيط ..وشكرا لكل الردود وأسعدني وايد تثبيت القصة ..فشكرا ..هذاالأسبوع الثاني من دون الجازي ..فهد اشتاق للجازي وايد .الجازي كانت مالية الدنيا عليه ..كانت تخفف الوجع بكلمتها الحلوة وابتسامتها الرائعة ..طالع للشقة اللي كانت مبهدلة ..وهو ما فيه حيل يقوم ويرتبها ..اتصل في واحد يعرفه في المانيا ..( فهد ما طلع من ألمانيا ..ولاغير دكتوره . بس غير رقم تلفون الشقة وطلب من الدكتور انه ما يقول لاحد انه للحين يتعالج عنده )فهد ـــ ألو ..علي موجود ؟؟ـــ لحظة .علي ـــ ألو ..فهد ـــ قوة أخوي علي ..علي ـــ فهد ؟؟معقول ؟؟ أهلين ..شخبارك ؟؟فهد ـــ الحمدالله انت شلونك؟علي ـــ بخير الله يسلمك ..وينك ما سنعنا عنك خبر من كم شهر ..فهد ــ تعرف المشاغل ...انت شلون دراستك؟؟علي ــ ابسط ياعم ..أنت اول واحد يسألني عن دراستي ..فهد ـــ ليش ؟؟؟وين الربع عنك؟؟علي ـــ من حسن حظك انك اتصلت على هالرقم اليوم ..بكره كنت بهد هالشقة وادور على شقة ثانية ..صاحبة الشقة لعوزتني ..تبيني أطلع وأنا مع هالكتب والمراجع وهالهيكل العظمي اللي يرافقني .. يله حطيت كل كتبي في السيارة والهيكل العظمي في السيت القدامي مسوي رعب في الشارع .فهد ـــ زين من اللي رد علي ؟؟علي ـــ هذا واحد يدرس معاي اسمه خليل ..يساعد في النقل .بس من سوء حظي انه ساكن مع أهله والا انتقلت معاه ..اوه سوري انت تعرفني هذار ..كان سؤالك شنو؟؟ اييه عن دراستي ..والله نجحت العام الللي راح وأناضل للبقاء في الكليه هالعام .فهد ـــ عاذرك من عرفتك وانت هالراديو يشتغل ..أقول .عندي لك حل ..لمشكلتك .علي ـــ حل ؟؟ لمشكلتي ؟؟ ناطر ايش ما تقول ..فهد ـــ تعال ..عندي لك شقة..علي ـــ قول والله؟؟ الحين أييك ..انطرني دقيزا ..بس لحظة ..عطني العنوان ..علي شاب كويتي يدرس الطب في المانيا تعرف عليه فهد في المستشفى أيام ما كان أخوه الله يرحمه يتعالج هناك ..فهد دق على علي علشان يوفر له حد يساعده ..*************** محمد ـــ لا تفكرين أني بنسى صالحة ..شيماء ـــ أدري انك ما بتنساها ..بس حرام انك تعاقب نفسك وانك تعيش حابس نفسك في حلقة اسمها صالحة ..صالحة نفسها ما بترضى . محمد ـــ شوفي هالياهل ..تهقين أمه قريبة من هنا؟؟طالعت شيماء يمين ..ــ أكي امه . محمد لا تغير الموضوع . أبيك تقاوم احساسك بالذنب تجاه اللي صار حق صالحة ..محمد ـــ شيماء ..ممكن تخلينا رايقيين ما نتكلم في هالموضوع؟؟ خلينا نروح لمكان ثاني ..شيماء ـــ الجو حلو ..محمد ــ ما كنت تبين البحر ..شاللي غير رايج؟شيماء ـــ ولا شي ..برايك نروح نشوف فيلم؟؟محمد ـــ لاء ..الظاهر الجو عاجبج ..خلينا نتمشى ..خلينا نتكلم وإلا تبينا نمشي وحنا ساكتين ؟.شيماء ـــ تكلم عن شغلك ..فضفض .قولي من اللي تحبه ومن اللي ماتطيقه ومن اللي يزعجك ..وهلم جرا ..محمد ـــ عندي هذا الفراش في الشغل اسمه عبدالقادر . هندي ضعيف وقصير وايد نفس اللي يطلع مع سمير غانم اللي يقول اديني ..شيماء ـــ ايه عرفته ..محمد ـــ هذا ما يخلي دينه عند أحد ..وطبعا هو هندي ..لازم ندفع له آخر الأسبوع حق الشاي والقهوة ..عندي واحد في الكتب اسمه خليفه وهذا شيطان ..عليه حركات نضحك . يوم يجي الهندي عاد مسكين كبير في السن . وكلامه م**ر يوم يجي بالعادة يقول يبي هساب فلوس ..عاد هالخلفوه علمه يقول اديني نفس الممثل ما يسويها ..وشاءت الصدف أنه مدير القسم يزورنا في نهاية الأسبوع .. ويي عبدالقادر ب*عره الأبيض والتجاعيد اللي في وجهه ..ويصارخ مثل الممثل ويقول اديييييييني .. مسكين تعود وما انتبه ان المدير موجود عاد المدير أول ماشاف هيئته وكلمته ..مات من الضحك عليه .وخليفه ويهه استوى احمر خصوصا لما سأل المدير من علمه هالكلمه . اشر عبدالقادر على خليفه .. المدير ضحك دبل ..صراحة كان موقف لايحسد عليه خليفه ..****************************** علي ـــ فهد ..يا ريال لا تكذب علي أنا أحس أن في وحده كانت في هالشقة ..فيها لمسة مرة ..فهد ـــ كان فيها حاليا ما في ..علي ـــ ..تركتك علشان مرضك؟؟فهد ـــ مالومك ل**نك متبري منك ..تذكرني بناس ..علي ـــ بمين أذكرك ؟؟فهد ـــ ناس ما تعرفهم ..تركتك وأنا متوقع لما ألقاك مرة ثانية يقصر ل**نك ..بس ما في أمل انت شلون خلوك تدرس طب ؟؟الطبيب كله ساكت وغامض متكتم على حالة مرضاه لكن انت ..اوووه ..بتفضحهم .علي ـــ يالحبيب علشان جذي ييت أدرس في ألمانيا ..قولي ليش تركتك الحبيبة ؟فهد ـــ على بالك كل الناس مثلك؟؟ لا يبه أنا ما أعرف هالسوالف ..علي ـــ بس كانت في امرأة في هالشقة ..معقول تزوجت ؟؟انت ؟؟العازب الأشهر في دول الخليج العربي؟فهد ـــ اييه ..تزوجت ..علي ـــ صج ..مب**ك متى ؟؟وليش ما تعزم ؟؟فهد ـــ ما سويت عرس ..سكيتي البنت نفسها اللي قلت لك أني بخطبها ..علي ـــ عيل مالوم الحرمه لا هربت منك .بدون عرس ولا ..على فراش الموت زواجها منك أشبه بزواجها من واحد قد جدها .انت شايف شكلك شلون مع هالقرعه ؟؟فهد ــ ما هربت مني أنا هربت منها ..والله أن ل**نك متبري منك ..شلون تقول لي جذي حافظ على مشاعري يا أخي ..علي ـــ حبيبي ,,ما يسبك إلا اللي يحبك ..تعال ليش هربت منها فيها شي ؟؟ نكدية ؟؟؟ جذيه مثل اللي يطلعون في الأفلام الزوجات اللي يطقون أزواجهم ..فهد يطالع علي منصدم ..انفجر بالضحك لحظة بعدين قال بلهجة صادقة .ـــ ما انولدت اللي تمد يدها علي ..شايفني خيخة؟؟ تطقني زوجتي ؟؟ وبعدين من انت علشان اكلمك عن ماي برايفت لايف ..(حياتي الخاصة).علي ــ آفااااا ..شلون تجرحني يا فهد ؟؟أنا ؟؟..شلون تكلمني بهالفظاظة؟؟كانت نظرات علي غريبة جنه زعلان صج ..فهد ـــ يا ابني انت ما فكرت في مشاعري يوم تكلمت عن فراش الموت ..لا تصيح ..لا تبجي سوري ..ضحك علي ـــ بذمتك ما أنفع ممثل ؟؟ عصب فهد على علي ..ـــ علي ..انت ساعة تبجيني وساعة تضحكني ..علي لا تخليني أندم على دعوتك للعيش معي ..علي ـــ حلوة دعوتك للعيش معي هذي ..صج فهد .. ليش تركتها ؟؟فهد ـــ لانه حرام اعذبها ,,,انت قلت كأنها كتزوجه بواحد بعمر جدها ..حرام ..ما طاوعني قلبي أدفنها معاي .علي ـــ بس هذي مهمة الزوجات بشكل عام .. أحسن شكلها ما تستاهل لأنها تركتك في عز حاجتك لها .مثلها مثل باقي الحريم ..أنانية ..فهد ـــ لا ..الجازي غير ..الجازي تحطها على الجرح يطيب ..مستحيل تشوف دمعتها ..مستحيل تحس بألمها كله تكتمه في قلبها ..مستحيل تحس التعب اللي تتعبه علشانك ..ما تتذمر ..ولا تشكي ..وتشيل المسؤولية أحسن مني ومنك ..علي ـــ زين ليش طلقتها ..هذا هو المطلوب لحالة مثل حالتك .فهد ــ لأنها جذيه ..ولأنها في بلد غريب ..بتصبر وتصبر وما تقدر تفضفض لأحد ..انسانة مثلها ..حرام أظلمها معاي ..وأنا على فراش الموت ما راح أترك لها إلا ذكريات ..اللي ثلاثة أرباعها مليانة بالمرض والدموع ..خليها تكرهني لأني طلقتها ..وتكمل وتعيش حياتها بعد موتي ..ولا تبقى لآخر عمرها عايشه في وهم اسمه فهد .علي ـــ شكله هزك بالحيل فراقها ..أشوف دموعك هلت مع كل كلمة تنطقها ..فهد ـــ تعلقت فيها ..خلتني أحبها غصب عني كنت م**م أني ما ..ما أكمل معاها ..لكن ..سحرتني ..هي الوحيده ..هي الأولى والأخيرة في حياتني .علي ـــ لا تقول جذي,انشاءالله العمر كله لك .. وانت للحين تتعالج وحالتك اكتشفتها مبجر مو مثل أخوك .انشاء الله تقوم بالسلامه ..وترجع لحياتك ..فهد ـــ اللي يسمعك ما يصدق الكلام اللي قلته لي من قبل شوي .علي ـــ فهد لا تاخذ كلامي على محمل الجد..كنت أمزح معاك ..شوف ويهك ..صاير كثيب ..فهد ـــ حلوة محمل الجد هذي ..ضحك علي ..ـــ نسيت أعرفك على آدم .استغرب فهد ــ من آدم؟؟أشر علي على هيكل عظمي ملبسه كاب وشيرت ..علي ــ شرايك ؟؟فهد ـــ يشبهني مو ؟؟ضحك علي ـــ شوي انقص كم باوند وتصير نسخة ..**************** ندى حولت أنها تتصل في فاطمة ..لكن محد يرد .فقررت أنها تروح لها في البيت ..خذت عباتها وطلعت ..رنت الجرس وهي ناطرة ..فتحت الباب الخدامة ..ندى تجاهلتها ومثل ما متعودة اطلعت لغرفة فاطمة على طول .طقت الباب ـــ فاطمة ..فاطمة ,,هاي أنا ندى.فتحت فاطمة الباب ودخلت ندى بسرعة ..ـــ شاللي جابج ؟؟ ندى ـــ ييت أزورج ..بنت عمي وصديقتي ..فاطمة ـــ ندى ردي بيتكم الحين ناصر متحلف فيني اذا شفتج يا ويلي .ندى ـــ ومن ناصر اللي يقدر يمنعني عنج ؟؟ ماله حق .فاطمة ــ انت ما تدرين ناصر درى بلعبتنا هذيك تذكرين ؟؟ندى ـــ وأنت ليش قلتي له يالهبلة؟؟فاطمة ــ هو استدرجني بالكلام ..لين طحت بل**ني ..عصب وطقني طق الحمير ..وأنا ما قدرت أستنجد بأحد خفت أمي تدري تذ*حني ..مع أني ما سويت شي غلط .ندى ـــ انتي مالج ذنب .. ماله حق عليج ..دخل ناصر ـــ فاطمة اطلعي بره بكلم بنت عمج بروحنا ..ارتجفت ندى ..فاطمة ــ ما أقدر أخليكم بروحكم في الغرفة .ناصر ـــ قلت اطلعي بره .ندى ــ أنا اللي بطلع بره .ناصر ـــ انت خليج في مكانج عندي حساب معاج ، فاطمة ..روحي لا تخافين ..حساب بيني وبين ندى روحي قعدي في غرفتي .علشان ما يشك أهلج ..روحي ..روحي لا أ**ر عظامج .ندى من الخوف ما قدرت توقف على ريولها .فجلست على السرير ..طلعت فاطمة وناصر صكر الباب وقفله .ندى استجمعت اللي باقي فيها من قوة واوقفت ..ندى ـــ ناصر مالك حق تــ..تمنع فاطمة من ..وقبل أن تكمل جملتها نزل كف قوي على خدها ..طاحت على السرير وهي منصدمة ..خانتها دموعها ..ندى ـــ ليش ؟؟ ليش ؟؟ أنا شسويت لك ؟؟ناصر ـــ كافي أنج خنت ثقة أهلج فينج ..هذا سبب كافي .ندى ـــ خنتها في ايش ؟؟ حرام عليك ..أنا غلطت ادري ..بديت اللعبة ..بس كان قصدي واضح ..أبي أشوف وين توصل مع البنات غيري ..ناصر ـــ وهذا سبب ثاني علشان أحقرج .. شلون تنزلين من صورتي في عين أختي ؟؟ ..ندى ـــ والله ما ..ما ..فاطمة ما تعرف شي عن اللي بينا ..ولا أقول لها ..أنا نفسي خفت أنها تشوف فيك هال..ناصر ـــ هالــ...؟؟ كملي هال ايش ؟؟ندى مسحت دمكوعها وقالت بجدية وغضب ـــ هالكلب اللي يغدر بنات الناس ..كف ثاني نزل على خدها ..اسكتت ..ما نزلت دمعه من دموعها ..وتمت جامدة ..ناصر ــ أنا كلب؟؟ أنا كلب ؟؟ ندى تعتبريني كلب ؟؟ اذا أنا كلب ..فانتي اللي ربيتيه ..انت اللي غذيته بالوحشية والكره ..هالكلب ..انتي اللي دفنتي انسانيته ..ندى ـــ أنا وأنا وانا ..أنا أصلا ما حسيت بوجودك في حياتي لين الحين علشان تلومني ..أأنا تميت ثمان سنوات عايشة في طيف اسمه سيف ..ما طلعت ليش ؟؟ وين كنت مختبي ؟ متى غدرتك أصلا متى عاهدتك علشان أغدرك ؟؟ناصر ـــ يعني تقنعيني أنج ما تتذكرين ؟؟ أذكرج ..يوم كنت في ال16 ..كنا ندرس مع بعض تذكرين ؟؟ طبعا لا ..كنت أنا وانت وفاطمة ندرس مع بعض كنت أنا ثانوية ..وسيف توه تخرج من الجامعه ..قلت لج يا ندى أني أحبج بس انطريني ..وكان ردج زين ..وأنا أحبك بعد ..ناصر ـــ مستحيل ..أنا قلت لك أني أحبك ؟؟ مستحيل ..أنا ما أتذكر ...ناصر ـــ طبعا ما تتذكرين لأن في ذات اللحظة دخل سيف البيت ..وذات اللحظة نسيتي وجودي ..وقبلتي خطبته لج في ذات الأسبوع .ندى ــ ما أتذكر ..ما أتذكر ..مستحيل ..أنت تكذب أنا ما أوعد وأنسى وعودي ..ناصر ـــ لأن سيف عمى عيونج عن كل شي ..الطالب المتخرج من الجامعه والقود لوك ..والوسيم ..أنا كنت جنبه ولاشي ..ولا شي ..تركت لج الديرة بكبرها ..وانصدمت بعدين لما عرفت أنه باعج يوم الملجة بس لأ ن أبوج قاله أنا أعطيك بنتي بدون مقابل ..وأنا أشتري ريال وفلوس أخوي هي نفسها فلوسي ..ماله داعي للشكليات ..ضحكت ..وضحكت وضحكت ..ندى ـــ يمكن .متهيء لك اني في يوم من الأيام خدعتك ..وضحكت أنت في الأخير ..لكني ما خدعتك مثل ما انت متصور ..ناصر ــ تقصدين هتان ؟؟؟؟ شلون ما خدعتيني وانتي توهميني الإهتمام؟؟ وانت تتكلمين ..يا أرض اتهد ما عليك أقدي ..وانت تشوفيني أتذلل بس علشان تسمعيني ؟؟ندى ـــ والله أني كنت أتصرف معاك باحترام ..والله اني ما ضحكت على كلامك ولا على أي شي ثاني انت تعتبره خاص في حياتك ..ناصر ـــ لا تبررين .,.انت خلاص طحت من عيني ..ما أبيج تقربين من خواتي أخاف تعدينهم بالحقارة ..وما أبيج تطبين هالبيت خير شر ..ندى ــ انت ذليتني ..أنا مو حقيرة ..وإن كنت فلاني أزود عنك ..وهذا بيت عمي ..أدخله مثل ما أبي دام أهل البيت مرحبين فيني .ناصر ــ أنا صاحب هالبيت ...وأقولج ..لا أنت ولا أي وحدة مثلج ت**ر كلمتي ..اطلعي بره .ندى ـــ انت تطردني ؟؟ناصر ـــ اييه أطردج..اطلعي بره ..ما تشرفني وحدة مثلج ..وما غلط سيف يوم تخلى عنج .وحدة بايعة ..ندى ما مسكت نفسها وض*بت ناصر كف ..وطلعت من البيت بكبره ودموعها على خدها ..تماسكت وفكرت انها لازم تبعد عنه ..وعن هالمكان كله .اتصلت في يوسف ..ـــ يوسف أهلا ندى شخبارج ؟؟ندى ــ بخير الله يسلمك ..يوسف انا وأمي قررنا نسافر كندا ..شرايك ؟يوسف ـــ ونعم الراي امي كلمتني من اسبوع فخلصت لها كل الإجراءات ..بس كنت مأجل الموعد شوي ..ندى ــ لا لا تأجل أنا بسافر معاها وبلا تضييع وقت ..يوسف ــ خلصي أمورج على ما أخلص اجراءاتج لا تخافين ما بطول ..ندى ــ ياريت هالأسبوع علشان ما تضيع اجازتي ..يوسف اوكي