NANLAKI ang mga mata ni Zantiago nang marinig ang sinabi ni Khloe. Ilang sandali ang lumipas bago tumimo sa kanyang isip ang sinabi nito. Sasama ito. Nababasa niya ang marubdob na determinasyon sa mga mata ng dalaga. Sasama talaga si Khloe sa kanya.
Lalong naguluhan si Zantiago sa kanyang gagawin at iisipin. Ginulat siya nang husto ng kanyang kuya nang sabihing luluwas na sila sa Maynila pagkatapos na makuha ang premyo. Biglaan ang lahat at natural na natutuliro siya.
Alam niyang hindi magtatagal ay aalis silang magkapatid ngunit hindi pa rin niya lubusang naihahanda ang sarili. Ang totoo, wala naman siyang pakialam talaga sa eskuwela o sa kanyang tiyo at tiya. Mas iniisip niya si Khloe. Hindi niya alam kung paano magpapaalam. Hindi niya sigurado kung kaya niya itong iwan. Parang ikamam
