بداية الضياع 1

1526 Words

..أني سمرّ .. اشتغل مترجمة لغات ومرشدة ومرافقة لوفود سياحية أجنبية بشركات سياحية مختلفة بعقود شهرية والشركات المتنقلة بالخليج والدول العربية والأوروبية الساحلية التي تجذب السياح بمختلف مناطق العالم .. حياتي عبارة عن محطات ومطبات ومصاعب ومغامرات شرسة وجريئة جداََ .. مرااااات أضيع و أتّيه بهالدنيا ومرااااات يخدمني الحظ ويحالفني وما أنسى أبد أن الله سبحانه يسخرلي دااااائما من يوگفلي ويساعدني ويوجّهني حتى اقاوم و أواجه الخطر بكل قوة وجراءة .. أبدي وياكم بأول محطة بحياتي من الطفولة .. بدايةََ ... اوصفلكم شكلي ببعض الكلمات .. ... تقريباً .. طويلة .. 170 / ورشيقة وجسمي مرتب ومخصر يشبه جسم عارضات الأزياء سمررررة كلش وعيوني كبار وبيهن لون يعني مو أ**د ولا بني عسليات فاتح حواجبي سودة وثخينة ووجهي مدور صغير وناعم وشعري أ**د و سرح صاروا يسموني سمارة لأن سمرررررة حيييل بدت قصتي ومعاناة ضياعي .. من جنت بعمر الـ ٦ سنوات أتذكر كلشي صار بحياتي ويمرّ ببالي مثل شريط الفيلم لو المسلسل .. أمي إسمها (هنودة ) .. جانت جميلة جماااال مو طبيعي رباني كلش حلوة وصغيرة يعني من عمري 5 سنين عمرها جان بالـ 16 سنه لأنها تزوجت بعمر كلش صغير اتذكرها كلش زين جانت ملامحها عُربية وسمرة حيييل وعيونها كبار وسيعة وناعمة البشرة والشعر أ**د بلون الليل وطويل كلش تقريبا ورثت منها اغلب صفاتي وملامحي جانت من تلبس العباية تتعمد تلفها على جسمها حتى تبرز مفاتنها وجمالها وتطلع الـگذلة وتخلي الـكحل يلوگ عليها كلش هواي ومن تفوت بالشارع تخبل الكل حتى الشباب تظل تصوفر وتتدوخ بحسنها تزوجت هنودة من أبوي (كريم) عشگها عشگ الجنون بحيث قتل نفسه عليها جانت امي دائما تسولفلي عنه قبل لايتزوجون يركض وراهة بالشارع مضييق عليها حييل ويراقبها ويتابعها من مكان لمكان اهلها من عرفوا خافوا عليها وشمروهة عليه گوة حتى يخلصون من حجي العالم عليها بسببه من كثر ما الكل انتبه عليهم وطبعاً الناس ماترحم أبد (كريم) صانع بالگهوة وجان اكبر من (هنودة) بعشرين سنه تقريبا .. تزوجها وعيشهة ببيت الطين بقضاء بعيد بالـ ريف بالكوت وهنودة بوقتها صغيرة وعقلها مو مال زواج ومسؤولية فـكلشي تشوف تشتهي وتريدة .. بس كريم حرمها من كل شي لأن جان فقير ومعدم وماعدة إمكانية تحملت هنودة لحد ماجابتني وقررت متحبل بعد لأن أبوي كلش صعب أسلوبة وتعاملة وتصرفاتة ودائما يكتلها يبسطها ويضربها ويشتم ويسب ويحرمها من هواي شغلات وتبقى ليالي توّن وتبجي وتدعي على نفسها بسببة تبقى تكول عنة أنو ميستاهلها وتدردم عليه دووم وتدّعي اللة ياخذة لو ياخذ عمرها حتى تخلص من عنده يعني بالصريح ماتحبة ولا تتطيقة ولا تريدة من الأساس .. كبرت ومرت أيام واشوف امي من يطلع أبوي للشغل كل يوم الصبح تبدل وتتكحل وتتعطر وتاخذني وياها ونطلع نفتر على المحلات وبالسوگ والبساتين والزرع واشوف الزلم تتحارش بيها واللي يلزم عباتهة واللي يلزم ايدها .. تضحك وتغمز الهم وعاجبها الوضع ومرتاحة يمكن تريد بهالتصرفات تنتقم من أبوي وتعوض الحرمان اللي عانت منة سنين وسنين تشتري شغلات هواي منهم بدون ماتدفع فلوس لان أدري أبوي ماينطيها تظل توصيني لا تگولين لابوج المگموع يكتلني ويطردني وتظلين بالشارع تهددني بهالكلمات اني اخاف واسكت ابد مافكر احجي شي أصلاً أني ماحبه لأبوي دومه يصيح ويعيط ويضربها لـامي وتشرد منه تختل بالحمام حمامنة بابة حديد تقفلها وتكعد تبجي وتوّن اسمعها وابجي وياها وانهضم وأخاف اسدها لـ آذاني لحد ماانام واغفة للصبح ماادري شيصير بعدها دووم اكلها يمة شوكت يموت أبوي ما احبه جزعت وطفولتي كلها عبارة عن خوف وحرمان وألم مااتذكر بيوم گعدت بحضنه لو باسني لو جابلي فد شي يفرحني مرت الشهور سجلتني أمي بالمدرسة بالصف الاول الابتدائي ظلت امي توديني الصبح وتنتظرني نرجع للبيت بيتنة جان بعيد وبحجة تخاف عليه ارجع وحدي تاخذني بيدها كل يوم واني هم بالحقيقة كلش اخاف من الناس ومن الطلاب والمدرسة مختلطة جانت والاولاد مشا**ين يجرون بگصايب البنات جنت اگول لأمي حبابة لاتضفريلي گصايب اخاف يجرون گصيبتي توجعني وأبقى بس أبجي بعدين انتبهت اشوف ابوي قلل من اذية امي مااعرف شنو السبب بقيت مستغربة !! بعدين عرفت سمعتها تسولف طلع ابوي يجيب نسوان موزينات للبيت من نطلع للمدرسة ومن امي كشفته وهددته تفضحه ظل يتهرب منها وحس بالفشلة والتقصير يمكن ظل يشرد من يشوفها ويتهرب منها اصلا من نجي للبيت يطلع بسرعة ويتوتر امي هنودة تكلة اطلع اطلع كون تطلع روحك واخلص امي جانت متعرف تقرة لذلك تعلمت وحدي اكتب واقرة يوم ورة يوم اشوف امي تهتم بنفسها وتتكحل زايد وتمشط شعرها الطويل وتخلي عطر وتوديني للمدرسة وتكعد كبال الحارس (فؤاد) أتذكرة شكلة كلش حلو طويل وضعيف واسمراني وشعرة سرح مرتب مو مثل ابوي سمين ومكرش واصلع ماانتبهت للموضوع بالبداية بس بمرور الايام اشوفه يعض شفايفه ويغمزلها ويأشرلها ماجنت اعرف الحلال والحرام بوكتها بس احساسي اكو شي غلط ومو حلو بحيث خفت وحسيت بقلق مهما كان ابوي ي**ن امي ويسوي مو زين بس مايصير امي تسوي مثله ! بقيت منتبها و راقبت امي جانت من تحجي وتضحك ويه فؤاد تتميع وهو يتقرب يمها ويسولف بهمس ويغازلها وبعد غير شي ماشفت يمكن فد شي خاص بينهم ماعرفة خلصت السنة هاي نجحت للصف الثاني ابتدائي واجت العطلة كلش ضجت گمت اطلع بباب الشارع العب ويه الجهال لأن تعودت على الأصدقاء بالمدرسة تعرفت على جهال الجيران امي جانت ماتطب للجيران ابوي أبد مايقبل جانت أمي هنودة تخليني بالباب وتوصيني على البيت لايطب احد غريب وتروح تعوفني تبقى ساعات وترجع ظلت شهر ماادري اكثر والدنيا تصير غروب وتظلم لليل مرات يالة تجي اني كلش اخاف وحدي اشوف الجهال تتراكض تتطب لبيوتها واني اظل بالباب متانيتها بيوم اجة ابوي رجع من وكت ولگاني وحدي العب بالتراب ودموعي بطرف عيوني خفت كلش كلي ولج وين امج !؟ ارتبكت ماعرف شجاوب كتلة راحت تجيب عشة طببني للبيت وسد الباب وصارت الدنيا ظلمه ماادري الساعة يمكن فوك العشرة بليل ظل معصب ويشتم بيها ويسب ويتوعد وتحلف بيها كهرباء ماكو ذيج الايام عايشين على الفانوس اجت امي تفاجأت بي هوه ضربها هواي من الباب قبل لاتدخل گطعها ومزگ عباتها وملابسها ظلت تبجي وتصارخ بصوت عالي اني خفت متت من الرعب ختلت ورة غراض قديمة جانت مكومة عدنه ماادري شصاير لو شنو السبب واخاف اتدخل احصلي كتلة بس شفت ابوي يكتل بيها كتل بدون رحمة ولا شفقة شفت دم طلع من خشمها وحلگها بعدين لبست عباتها تلفلفت وهجت بالشارع .. اني بعدني بالزوية ميتة من الخوف لايكتلني اني همين ويطلع دمي وبس ارجف صميت آذاني وغمضت عيوني ماريد اشوف دم امي بالگاع ولا اريد اسمع صراخهم أبوي بقى كاعد بالگاع يبجي ويكول هاي الحقيرة السايبة ماريدج بعد لاتجين روحي سودتي وجهي وفشلتيني كدام العالم وجبتيلي العار ويبجي وينحب ويلوج .. ماحسيت الا ونمت بمكاني بالحوش البرة بنفس المكان الختلت بي كعدت الصبح من غبشة بعدني خايفة من أبوي شفتة يبدل ملابسة انطاني هدومي بعلاگة وشوية أكل خبز وخيار وطماطة جرني من أيدي خفت منه طلعنا اخاف احجي حجاية وحدة يكتلني ويضربني مثل ما كتلها لامي بقيت ساكتة بس ارجف ببالي ميت سالفة كلت هسه ابوي يذبحني ويذبني بالجولة البعيدة لو بالبلوعة الخايسة بعدين صعدنا بسيارة شبگت رجليه وبعدني كلش خايفه اتذكر جنت لابسه ثوب وردي ومشجر بزرگ مشت السيارة هواية كلش واباوع ابوي بعدة مقهور عيونه حمرة ومامرتاح علما وصلنه صار الظهر رحنه غير مكان غريب و بعيد كلش انتبهت المكان جبير بي سوگ غير شكل وناس هواي مختلفين كلشي مااعرف ولااندل ولا ادري احنا وين هسة واخاف اسأل كعدني بالگاع بمكان ودار وجهه وراح بدون مايگول أي شي بقيت بمكاني وأعاين للناس والمحلات ظليت متانيته هواي مدري شگد أحس الناس كلها تباوع عليه طلعت الاكل اللي بالعلاكة اكلته كله صار وكت هواي ابوي اشو مااجه !؟ ياربي وين صار ظليت ابجي وانشغ انهضمت الناس قلوا والبياعين عزلوا صار الليل والدنيا ظلمت وينة ابوي ياربي ! خليت العلاگة جوة رأسي بمكاني ونمت غفيت الناس ظلت تشمر عليه فلوس عبالهم مجداية ! اخذت الفلوس وضميتهن بالعلاگة اجت يمي مرية بيضة گطن سمينة وحلوة تخبل وملابسها نظيفة وشعرها أصفر يلمع اطتني كعك كمشت بثوبها ضحكت حاجيتها وجسمي يرجف _خالة فدوة اريد اروح للحمام جاوبتني صوتها ناعم وتعلج بعلج ريحته طيبة يـا اا حبيبتي ! شبگتني بجيت نهضمت كلش وجنت مبهذلة وتعبانة وحالتي حالة شعري منفوش وعيوني حمر من البجي والتعب خذتني يم محلات بالسوك مكان دخلتني مغاسل هناك غسلت واطيتها علاكتني عمداََ حتى تنتظرني وماتروح من طلعت ركضت عليها وحضنتها اطتني غراض من جنطتها جفية وبسكت و گالتلي يالة خليني ارجعج لمكانج واروح تأخرت انتبهت الها شايلة جنطة وردي وبيها لمع كمشت حييل بجنتطها فتحتها وطلعت فلوس انطتني _خالة حبابة ماريد فلوس اخذيني وياج حبابة حبابة استغربت مني وسألتني ! وين اهلج ! ماعندي اهل خالة حبابه وجوعانه وخايفة وتعبانة وانشغ من الهضم شفتها تحيرت وصفنت كالت شسمج ! أني اسمي سمر ماشاء لله اسمج على رسمج سمر وسمورة وحلوة لزمت ايدي ودتني محل يبيع لفات اشترتلي لفات وعصير ورحنه كعدنه بحديقه واكلت لمن شبعت ظليت افرك بعيوني نمت بحضنها حسيت بيها شالتني وصعدنة بسيارة دخلنه بيت حلو وجبير وبارد والوكت صيف جان وحرّ خلتني على جرباية جبيرة وغطتني بجرجف وماحسيت بعد للصبح كعدت لكيت نفسي ببيت حلو عمري ماشايفه مثله وحيطانه بيض تلمع وبي كراسي مزخرفة وجرباية واثاث عالي وتحفيات وشغلات ماشايفه منها أبد سمعت صوتها تسولف تدنيت اكثر للمكان مطبخ جبير والالوان حلوة وكلشي بي ضوة وابيض وبارد مو مثل بيتنا الطين مصخم واظلم بالشتة ثلج ومطر ينزل علينة وبالصيف الشمس تحرگ وجوهنه وحشرات أشكال تتطفر علينه من دخلت للمطبخ اجت عليه شبكتني وشفت مرية ثانية بس عجوز لابسة شيلة بيضة وكاعدة على كرسي متحرك معوقة يمكن ظلت تعاين عليه هذي المرية البيضة بعدين سوتلي ريوگ كعدتني على كرسي وطاولة گدامي بيها اكل بيض وجبن وصمون اكلت هواي علما شبعت بعدين اخذتني للحمام غسلتلي ولبستني من الهدوم اللي جبتهن وكعدت برة ياربي المكان حلو ومرتب صارت تمشطلي وتسألني أسئلة عن اهلي ومنين اجيت !! ..

Free reading for new users

Scan code to download app

App Store Google Play

Facebookexpand_more