Tinangay ako ng agos. Sobrang lakas at sobrang bilis ng agos ng ilog kaya napakalayo na nang nalakbay ko.
Buti na lang, suot ko yung salvavida kaya hindi ako lumulubog. Ang kailangan ko lang gawin ay ang makakapit ako ng isang matibay na bagay sa gilid ng ilog upang makaahon ako. Hindi kasi pwedeng masyado akong mapalayo dahil mahihirapan akong makabalik kina Divan.
Hay, sana maayos lang sila! Sana nakaahon sila.
Pinilit kong lumangoy kahit halos wala ding silbi iyon dahil sa lakas ng agos ng tubig. Pero pinilit ko pa ring mapunta sa may gilid ng ilog upang may makapitan ako.
At makalipas ang ilang oras nang paglutang-lutang ko sa tubig ay parang bumangga ako sa kung anong malapad na kahoy. Dahil nakaharang iyon sa'kin, hindi na ako tinangay ng ilog. Saka ako nakarinig ng isang boses.
