صرخات محبوسة

تساؤول ١٦

#صرخات_محبوسه

بقلمي نورا ناصر

رفع راسه مندهش وبينت الابتسامه على وجهه

سلمت على زمن ورحبت بيه وكالت شونج مشتاقتلج

كتلهه اني مشتاقتلج اكثر.. وظلت عمتي تحجي وياهه

واني عين عليهم وعين على احمد واحس ملامحي فاضحتني بالاهتمام بي وبنظراته. ..

بعدهه ضجت من نفسي وتجاهلته ودرت وجهي عنه

بس بقيت استرق النظر اله من بين ثانيه لاخرى

شفته يبحوش مدري يكتب ..

طلع من مكانه واستغل فرصة ان عمتي دتحجي وي زمن عن علاجات نسائيه .. فات من يمي ولزم ايدي قوي وخله بيهه شي ورقه .. اندهشت لمسة ايده صعقتني مثل الكهرباء ودخلت الكل جسمي ..

باوعت العمتي لاهيه وي زمن ..

بعد ماخله الورقه بيدي طلع بره ثواني ورجع واحس عطره ترس ريتي ..

عمتي اخذت العلاجات.. سلمت ع زمن وطلعنا والورقه بيدي عمتي تحجي ويايه واحس بالي مو يمهه يم الورقه وشمكتوب بيهه .. طول الطريق احس قلبي يضحك ..

وصلنا للبيت اريد افتح الورقه وحدي وين اروح ؟

شمرت جنطتي ورحت للحمام وفتحتها جانت الورقه زغيره ومكتوب بيها هيج احبببببج هذا رقمي خاف ناسيته او محذوف وكاتب رقمه

اني بس اجت عيني على كلمة احبج احس كلبي طار للسما ورجع المكانه ماادري شصار بيه وبس فاتحه حلكي ومبتسمه اباوع التفاصيل خطه اني اشوفه حلو لو هو اصلا حلو ؟عجبني كلش وقريتهه شي عشر مرات .. غسلت وجهي واخذت الورقه وطلعت رحت ضميتهه بالجنطه .. ورحت للغرفه غيرت ملابسي عمتي تحاجيني واجاوبهه هيجي بدون وعي ..

اريد ابقى وحدي وبس افكر بأحمد احس رجعت مراهقه واول حب الي بلشت ويا وهو فعلا اول حب !

خلصت العصريه واجه الليل تعشينا وجنت متلهفه اروح انام حتى افكر بي وبلكي احلم بي هم ..

رحت انام على وقت عمتي وميعاد كالوا كعدي شويه نسولف بعد وكت كتلهم شويه نعسانه ..

كل ليله اخابر امي قبل لاانام .. خابرتهه حاجيتهه وسديته .. تمددت وتغطيت .. وبديت اتذكر ملامحه وملابسه عطره وساعته والسوار والكلاده من خلال نظرات باوعتله كلشي بي طخ ابالي ..

اشوفه صاير حلو لو هو من الاول حلو ..

افكر برقمه مااكدر اتنازل واخابره مستحييل مااسويهه اريد ابقى بعينه اني صعبة المنال اكثر مايتصور .. جانت اللحظات الي افكر بي حلوه احس حلاوتها بروحي ونمت وكعدت يوم ثاني الصبح ..

الصبح وصل ابراهيم استقبلتنه وسألته شونهم كال زينين . جان يوم جمعه . مر الوقت بسرعه وصار الظهر وتغدينه ..

العصر خابروا حازم وكلوله ع شغلة القسام الشرعي ..

بالليل اندكت الباب طلع سامر وطبوا بغرفة الخطار ..

عرفت من عمتي جايين حازم ووسام .. مصار هوليه على كعدتهم وعلا صوتهم رحت يم الباب وبده الحجي عليه وعلى شرفي متحملت ابد ابد طبيت عليهم ..

بدون سلام .. وخليت عيني بعين حازم كتله على كيفك خويه على كيفك تحجي عليه بالموزين مو خلي الله بين عيونك مو هم عندك بنات واخوات وزوجه اشفتوا مني وتحجون عليه هيجي ماتحجون على اخوكم الي جان يوميه وي وحده

رد عليه اني بعيني شفتج ويا بالشارع وديحجي وياج

عليت صوتي اشف*ني ويا شجنت اسوي بهي عينك شف*ني دخلته ؟؟ مو بعد جم يوم عينك شاهده عليك ليش تشهد بيهه زور . انفعلت كلش وعليت صوتي اكثر احس اريد افرغ كل القهر الي بداخلي كتله اني اطهر من اطهركم واشرف من اشرفكم وتخسون ماتوصلون ضفري وحقي اخذه منكم لو شميصير ظلام الله يأذيكم مثل مااذيتوني الله يطلعهه بعرضكم يل تهمتوني ..

شفت ابراهيم اجه صوبي وطلعني من غرفة الخطار وداني بالمنور ورفع ايده عليه وظل يصيح انت شدخلج ولج كتله اض*ب بعد اختك اض*بني تريد تض*بني اني متروح تض*به اله مو ديحجي على شرفيييي .

نزل ايده احس خجل من كلامي وكال اووووف بعد لاتطبين يمنه احنه. زلم وبينه نتفاهم ..

راح ابراهيم وبقيت اني بس احس ارتاحيت من طلعت هالكلام احس حمل جبال من ع كافي انزاح وجيتهم هي ماخوف*ني زادتني اصرار وعزم حتى اخذ حقي ممطالبه بشي اني غير حقي ..

دخلت بغرفة عمتي وبعد ماطلعت منهه احس راسي صعدت بي النار سخونه مو طبيعيه وهذول مالهم صوت يمكن راحوا .. دقايق ودخلت عمتي كالت ليش هيج مو احنه نريد نتفاهم وياهم هسه انت صبيتي الزيت ع النار .. بعد حجيج هذا راح تزيد المشاكل ويعاندون اكثر .. كتلهه عمه حقي مااتنازل عنه واكو قانون والبلد ماتايه لدرجه ميكدر يرجع حقي واكو الله الينصفني اذا محد ينصفني ..

نمت الليل مخنوگه كلش كل شويه يتردد صوت حازم من يكول خانت اخونه وكتلته هالشي يألمني محتاجه ابجي واحجي مية مره طلعت رقم احمد ورجعته ماادري ليش حسيت محتاجتله بس يوكف بعيني ابراهيم والحجي المايخلص ..

كوه نمت ساعتين وكعدت على صوت اذان الفجر توضيت وصليت وكعدت ادعي ياربي اريد تنصفني تعبت من الحجي ربي انت الاعلم شنو بقلبي ربي اني مظلومه ساعدني ..

الصبح حاولت قدر الامكان مااطلع من الغرفه بس هالشي مايفيد رحت ادور ابراهيم شفته كاعد بالحديقه يدخن انقهرت علي .. شايل همي وهم نسوانه وامي وحده هو زلمتنه الكل ننفس طاقة تحمل الله يساعده شون متحمل ..

رحت يمه ..

صباح الخير

باوعلي واحسه محتار للحظه ردت اكله مااريد شي خل نرجع للحله ويولون سلمتهم بيد الله ..

رد عليه صباح النور .. كعدت يمه كتله اسفه على الي صار .. كال اليوم سبت باجر اروح نمشي بالاجرائات

كتله اذا اني تعبتك عوف كل شي وخلي نرجع مااريد شي خلي ياكلون حقي يصير عليهم نار بقبورهم

كال لا هذا هو باجر نبلش حقج هذا ولازم تاخذي

بسته على راسه وكتله الله يخليك الي ذخر ابو اسماعيل مقصرت فدوه اروح لتراب رجليك اني ابتسم وتناوش راسي بايده وباسني كلش فرحت عمري ماحسيت نفسي قريبه اله الهالدرجه ..

واني حاليا ماعندي غيره ابد فد هو اخويه ..

مرت الساعات واحنه نخطط شراح نسوي ..

طب سامر وكال ا****عه اليوم خابروني

منو خابرك .. وسام خابرني يكول ميخالف خلي ننطيهه حصتهه .. اني طرت من الفرح واخيرا انتصرت عليهم ممصدگه ابد .. يوم ثاني رحت للبيت

اني وعمتي وابراهيم .. دخلت جان التراب مغطي على كل شي .. بدخلتي رجعتلي كل الذكريات وكأنما عايشه بيهه وكانه البارحه صارت مو اشهر ..

امشي واتذكر .. هنا كعدت هنا بجيت هنا كعدت ايام وايام وحيده وتعيسه وبائسه ..

هنا اشتغلت وخيطت وتعبت وهنا بجيت واني اتوسل بحسام يرحم بحالي ويتغير وهنا دعيت الله يرزقني طفل بس مارزقني .

كلشي جان بمكانه حتى تليفوني اخذته واخذت اغراضي وطلعت ..

اتفقنه وياهم بأن يشترون حصتي وهي الحصه الاكبر طبعا .. وخلصت اخر الايام الي گضيتهه ابغداد بأنتصاري عليهم .. رجعت كل ذهبي واخذت فلوسي واغراضي .. ويوم ثاني من الصبح نطلع كعدت ويا الفجر وصليت وشكرت الله على كل شي

بقت دعوه گالهه قلبي مكلتهه بل**ني تمنيت اشوف احمد اخر مره .. ابراهيم اخذته نومه للضحى ..

علما تريك وبدل وسبح وخله اغراضي بسيارته صارت ب10الصبح . ودعت عمتي وشكرناهم وطلعنا ..

بالطريق جان گلبي يرف على احمد وجان يوجعني عليه .. اريد اشوفه قبل لااروح لاخر مره .. وصلنه قريب ع الصيدليه وجان الشارع زحمه شويه ولمحت سيارته صفت رفعت راسي اطلطل عليه شفته نزل بقيت اباوع الكل حركاته شون نزل شون قفل السياره ونزع النضارات ودخل .. تمنيت اشبع منه شوف بس ماشبعت ردت انزل واوكف يمه واحجيله اني انتصرت عليهم واخذت حقي واريد اكوله اني شكد ملهوفه عليه ..

مشينه بس شكد فرفحت عليه .. يارب شنو هذا الاحساس حب لو شنو .. غمضت وحجيت بقلبي ياربي لا تخلي هي اللهفه على احمد تستمر لان دربي ويا بعيد ميتلاگه ابد مثل نجمه بالشمال ونجمه بالجنوب ..

مسحت دمعه نزلت من عيني ..

وصلنه للحله اكو فرحه واكو حزن .. احس هواي ضاع من حياتي .. كلت لابراهيم اريد اروح اشوف امي

كال اني اجيبهه الج كتله لا اني اروح واعتذر لهناء هم ضحك كال الله يهد*كم ..

نزلنه ودخلنه للبيت بوجهي صارت هناء بس ملامحها مجانت ضايجه بس حسيتهه ممتوقعه راح اسلم عليها .. رغم هذا حضنتهه وبوستهه وهي هم بادلتني الحضن وباوعتلهه كتلهه اني اعتذر ع الصار .. كالت احنه مثل الخوات ومابينه حقد واعتذارج مقبول اباوع الريمه تجرجر بملابسي نزلت عليهه حضنتهه وبوسته وبوست الاولاد سيف وغيث ..

سألت على امي كالت جوه دخلت بالبيت ادور عليها شفتهه بالغرفه متمدده ع السرير رحت الها وابوس بيهه شبيج ماما كوليلي وابوس ايديهه

كالت ماكو جاي انتظرج وتمددت هنا ماكدرت اصبر اكثر تعبت ..

حياتي ماما اني يمج اخذت حقي وجيت

- يايمه ليل نهار ادعيلج

- بعد عمري هذا كله دعائج

- ماسلمتي على هناء

- اي سلمت واعتذرت بعد

- الله يسعدج ويهنيج بعد عمري

دقايق وصاحلي ابراهيم يله اروح .. طبت هناء كالت لتروحون اني مسويه غدا .. فرحت راح ابقى يم امي..

بعدهه واني كاعده يم امي اتصلت عبير ومالت مو مترجعين تره البنات متخبلات عليج .. كتلهه ميخالف ارجع .. بس الليله راح ابقى يم امي .. كالت خوش

بقيت ليله كامله يم امي .. والصبح خابرتني عبير كالت راح يجي عليج ابراهيم .. حضري نفسج كتلهه ماشي .. اجه ابراهيم كال يله مستعجل اريد ارجع للشغل رحت ويا جاي بسيارة ضياء تفاجئت طبيت لسياره .. كعدت وره .. تالي نزل ابراهيم للمحل مالته وبقيت ويا ضياء وحدي كلش استحيت واحس يباوعلي بالمرايه اشمئزيت منه ..

علما وصلت للبيت لعبانه روحي منه ونوب طب وراي بعد شوي يطخ بيه شبي هذا ..؟؟!!!!

طبيت استقبلتني عبير والبنات وكعدت يمهم وسولفنه رحت بدلت ملابسي ورجعت يمهم بالمطبخ ..

ضياء ممداوم وكل شويه يطب ويطلع حتى تضايقت من وجوده وحسيت بعدم الارتياح .. وخاصة نظراته الي ولاخته احس عدهم شي يردون يوصلونه الي ..

وهيج مرت الايام جانت بداية العطله الصيفيه

خليت ابالي ارجع ادرس بس اني صارلي 5 سنوات تاركه المعهد معقوله يقبلوني ؟!!

و بيوم الصبح ابراهيم وضياء بأشغالهم والبنات نايمات . عبير گالت تعاي عندي موضوع وياج

كتلهه ماشي كعدنه بالصاله والبيت هدوء .. كالت

- زهراء اريد اكولج شي اني اريد اخطبج الضياء

- شوون ؟؟

- اي مثل ماسمعتي ضياء معجب بيج ويريدج اله زوجه

- اي بس هو مو مزوج وعنده جهال

- اي شكو بيهه الشرع محلل اربعه وبعدين تدرين انت شغله هنانه وذيج مرته متقبل تترك اهلهه اله تبقى كاعده يمهم وهو حياته كلهه هنا وجاي يبني هم شگلتي ؟

- لا عبوره انت على راسي عذريني مااكدر اظلم مرته اني واخرب حياتهم فدوه

- ليش تخربين انت هنا وهي هناك

- يعني شنو يريدله وحده احتياط

- لج لا لا شهالحجي هذا زواج شبيج وضياء خوش ولد ومو ناقصه شي

- بس مااكدر اتزوج متزوج مااحب اشاركه ويا مرته

- ليش اخوج مو تزوج عليه لو نسيتي ؟

- اي بس جان عنده عذر كلش قوي وهو كفالة ايتام لا واحد ولااثنين تلاثه .. وبعدين انت دشوفي شون ممقصر وياج وكله يمج

- ضياء هم مراح يقصر وياج

- واني هم مااريد يقصر وي مرته ومااكدر اوافق ع الزواج اعذريني

- يعني هذا اخر كلام عندج

- اي والله عبير هذا هو اعذريني

بعدهه عبير ضاجت مني كلش احس كوه عليهه متحملتني من اجه ضياء وكلما اطلع وتصد عيني بعينه يخزرني معناهه كلتله عبير ..

ضجت حييل وين اروح ..؟؟

ظليت احبس روحي بالغرفه ومااطلع منهه الحد مايروح ..

ظليت التهي بالتليفون طلعت السيم كارد من التليفون القديم وفعلتهه صار اشهر واكفه وسويت عليهه واتساب

بالليل ساعه 9 كملنه عشا غسلت المواعين وطبيت للغرفه لان ضياء بالهول كاعد على التلفزيون فحبست نفسي بالغرفه والبنات طابات طالعات كعدت بزاويه بعيده عن باب الغرفه حتى لا كل مينفتح الباب يصير كبالي . لزمت التليفون وظليت اتصفح دقايق ووصلني مسج ع واتساب من رقم غريب فتحته مكتوب سلام !!باوعت للصوره الشخصيه مالت الرقم تفاجئت گلبي صار يدك ودكاته احس اسمعها بأذني شعور ممزوج بالفرح والدهشه على حيره اجاوب لو لا

جانت صورة احمد ووياه بنت حلوه كلش متشبهه بالمعاني يمكن بالدم بالضحكه .. عيونها خضره وشعرهه مجعد كيرلي اصفر مبين على وجهه المرض

بقيت ثواني فاتحه الصوره واباوع الها وامرر اصابعي عليهه واحس بالاشتياق .. وصل مسج ثاني

- تشوفون المسج ليش متجاوبون ؟؟

مكدرت مااجاوبه كتبت اله

- وعليكم السلام !!

-شونج صايره احوال !!

- شنووو

- اكول صايره احوال يعني صاير عندج وواتساب وكذا !!

- اي شون عرفت عندي واتساب

- شفت رقمج وي الاسماء الي بالواتساب

- اهاا

- اي شونج مشتاقلج شنو اخبارج

- وليش تريد تعرف أخباري ؟

- لأن احبج

- ممكن تعوف هالكلمه على صفحه

- اذا تضوجيين منها بعد ماأگولهه احتفظ بيهه النفسي

- اي ياريت

- اوكي احبببج

- اووو شگلنا ؟؟

- ههههه

اكوله لتكول احبج بس مو من كل گلبي اريده يگولهه مره ومرتين والف وقع كلامه عليه احس يتملكني بيها ويتملك كل احساس بيه .تمنيت بلحظه اني يمه ود*كولي هالكلام بس الي بينه هوايه مو بس مسافة طريق لا وحتى هوايه حواجز بس احس احتاجه واريد احاجي .بقيت احجي ويا بعدهه طلب احجي ويا مكالمه كتله ماارييد وسديت النت كله وكعدت ساعه اضحك وساعه اصفن .. ماكو احساس تجاهه غير الحب شون ويمته ماادري بس حبيته مابي شي ماينحب كل شويه اطلع صورته هو وبنته واتأملهه بالساعات اباوع الها حد ماا احس اني يمه وگباله واصحى من حلم اليقضه واضوج ويمكن ابجي الي بيني وبينه هوايه حواجز ومستحيل تنزال بيوم ..

يوم ثاني الصبح كعدت وخليط المشاعر بروحي بين فرحانه تواصل ويايه وبين ضايجه اني بعيده عنه ..

رحت للمطبخ وكل الي ابالي ضياء مموجود ورايح الدوامه .. بس فاجئني بصوته وهو يكولي صباح الخير. اللتفتت اله كتله بعد ثواني جاوبته بارتباك

واني واكفه يم الطباخ وهو مقابيلي متكي على الكاونتر ومكتف ايديه .. المطبخ صفح والكاونتر بالجهه الثانيه .. اريد اطلع من المطبخ گال اكدر اسئلج سؤال ..

زاد من حدة ارتباكي وجاوبته برجفه ااي تفضل

- ليش رفضتيني ؟؟

- جان سؤاله متوقع والهيج اني ارتبكت مااريد احجي بهالموضوع .. كتله سبب واحد لانك متزوج

- بس هذا السبب مو مقنع ليش المتزوج حرام يتزوج

- مو حرام بس لازم سبب مقنع حتى يتزوج

- واني عندي اسبابي

- هي مو اسباب

- ليش اخوج مو تزوج على اختي عادي احنه ماتدخلنه ولا حجينه

- اخويه عنده سبب مقنع وقوي وهو كفالة ايتام اخويه المرحوم وبعدين افهم من كلامك انت تريدهه وحده بوحده لأن اخويه تزوج على اختك انت تريد تتزوجني وانت اصلا متزوج ..ضحك وكال لا لا ابد مو هيج بس فكري بالموضوع اني راح انتظرج توافقين

- اني شايله فكرة الزواج من بالي اكو شغلات ثانيه اريد اسويهه وبعدين حتى ماصار على وفاة زوجي سنه .. اريد اطلع سبقني وصار كدامي وكال فكري بعد فكري واخذي راحتج اني الي طالع

وطلع من المطبخ .. ضجت حييل وكعدت ع الكرسي وخليت ع**ي ع الطاوله وكف ايدي على خدي ..

عجزت عن التفكير غمضت وجريت نفس .. كرهت كعدتي هنا قريبه على ضياء اصلا من البد ايه

ممرتاحه واليوم هم ضجت اكثر .. بقيت افكر وافكر

صبح وهدوء الكل نايمين وباب المطبخ مفتوح ع الحديقه .. اجتني فكره اكول لابراهيم اروح منا لبيت هناء بس كرامتي متسمح الي ارجع يمهه بعد لان هي كالت متريدني ابيتهه ..

لازم اكو حل وافكر بي الفلوس موجوده واكدر اتصرف بيها واشوف الي مكان واستقل عنهم واني مو زغيره وعندي شغل واكدر ارجع اشتغل وحتى صديقاتي بعدهن موجودات يلحن عليه ارجع اخيط

ماابقى هنا بعد ابد قررت بس يجي ابراهيم اگله

ويروح فكري لأحمد بلحظه وحده وابقى اتسائل ياتره هم تحبني يااحمد وتريد تتزوجني لو هيج تريدهه لعب وبس ؟؟

يتبع ..