بين الألم والأمل

الفصل الثاني

ماما. اهلا يا هانم انتي كنتي فين من الصبح مع انك واخده اجازه و ازاي تخرجي و تروحي مكان و محدش عارف عنك حاجه وكمان تليفونك مقفول كنتي فين ردي

شيراز . عادي يا ماما كنت بغير جو زهقانه و مخنوقه و تليفوني مخدتش بالي انه مقفول

ماما . ماشي يا اختي حضري نفسك عشان خارجين كلنا آخر اليوم رايحين النادي و عايزاكي تلبسي لبس شيك و حلو

شيراز.ااااه النادي خير يا ماما ليه

ماما .خير يا حبيبتي .في دكتور صاحب بابا عزمنا ع الغدا في النادي و ده راجل غني اوي لازم نشرف ابوكي

شيراز . اه و انا ايه علاقتي بصاحب بابا الغني

ماما . مالك يا شيراز بتتكلمي كده ليه اسلوبك مبقاش عاجبني يا ريت تخلي بالك و انتي بتتكلمي مع امك

شيراز . بتكلم ازاي يا ماما و ماله اسلوبي عموما انا مش رايحه في مكان و تظبيط المقابلات عشان العرسان و الجواز بالطريقه ديه حاجه مرفوضه خالص بالنسبه لي .و مش معني اني برفض يا ماما تجبروني علي وضع مش بحبه يبقي اسلوبي متغير وبتكلم وحش

ماما.يعني ايه يا بنتي انتي عايزه تصغري ابوكي ادام صاحبه عايزه ت**ري كلام ابوكي اللي واعده نتقابل كلنا

شيراز . حرام عليكي ارحموني بقا انتوا عايزين مني ايه.هو انا لعبه في ايدكم يمين يمين شمال شمال ولو اعترضت ابقي بصغركم يا ماما لو انتي عايزه اني اسيب لك البيت وامشي لو مدايقك وجودي امشي بس متدمرونيش انا اللي فيا مكفيني

ماما . انتي غ*يه يا شيراز هو انا عندي غيرك يا بنتي انا عايزه اطمن عليكي انتي محتاجه حد في حياتك بدل ما انتي وحيده كده طيب افرضي موتت انا و ابوكي هتعيشي ازاي هتعيشي لوحدك في الدنيا يعني

شيراز . اولا يا ماما الاعمار بيد الله محدش عارف مين هيموت قبل مين و ربنا يد*كم طول العمر بس انا ما اشتكيتش زمان عشان تحسي اني وحيده دلوقتي و ارجوكي يا ماما لو بتحبيني و يهمك مصلحتي بلاش تضغطي علي أعصابي اكتر من كده لان اقسم بالله انا فيا اللي مكفيني من الهم و زياده كمان وربنا وحده هو اللي عالم بحالي تصبحي علي خير يا ماما انا داخله انام

( دخلت الاوضه و قفلت علي نفسي الباب و انا مش طايقه نفسي ولا طايقه امي )

ماما. يا شيراز افتحي هقولك حاجه طيب .يا بنتي افتحي .كده ابوكي هيزعل . طيب روحي بس عدي اليوم علي خير و مش هنجبرك علي اي حاجه يا بنتي وعد مني. يا بنتي ردي عليا

شيراز . تصبحي علي خير يا ماما انا تعبانه سبيني انام لو سمحتي

ماما . ماشي يا شيراز اما يجي ابوكي هشوف هيقول ايه علي كلامك ده

شيراز . كنت سرحانه و مردتش عليها .كنت سرحانه في اللي حصل و الحضن اللي أول مره احس فيه بالأمان اصلا أول مره في حياتي كلها حد يحضني و أحس باللي حسيت بيه ده احساس جميل اوي مش قادره اوصفه لاني محستش بيه حتي مع بابا و ماما و ثواني و غلبني النوم و حلمت حلم غريب و جميل و ده كان اول حلم حلو احلمه من سنين طويله

( حلمت اني في جنينه كلها خضرا و في ورود طايره في الهوا و شعري كان بيطير من الهوا اللي كان ريحته ياسمين و كان أحمد عمال بيجري عليا أول ما قرب مني شالني و قعد يلف بيا و قعد يقولي بحبك يا اجمل ما شافت عيني بحبك من زمان انتي طلعتي لي منين بس يا قمرايه انتي و انا كنت ببص له و بضحك من كتر الفرحه ) قومت علي صوت رساله

دكتور أحمد . انا بعتذر منك يا شيراز علي اللي حصل مقدرتش امنع نفسي اني اعملك حاجه تطمنك حسيت انك محتاجه الحضن ده اوي و مش قادر انطق و اقولك اني انا كمان كنت ....

شيراز ( مش عارفه ارد اقوله ايه .اقوله اني أول مره اطمن كده و انه لو مكنش عمل كده كنت انا اللي هاخده في حضني ولا اقوله ايه .وقررت اتصل بيه )

دكتور احمد . ديه بتتصل يا ادي الاحراج و ال**وف هتعمل ايه يا واد يا احمد ايه الاحراج ده طيب انا متلغبط اوي ( خد احمد نفس طويل ورد عليها )

دكتور احمد . ازيك يا شيراز عامله ايه

شيراز . انا كويسه يا أحمد

( استغرب جدا انها قالت له أحمد و سكت )

شيراز . ساكت ليه اوعي تكون ادايقت اني قولتلك يا احمد

دكتور احمد . لا طبعا انتي تقولي اللي انتي عايزاه يا شيراز.

شيراز . بص بما انك دكتور هحكي لك الحاله اللي انا فيها بس لازم توجهني صح

دكتور احمد . طيب ايه رايك بكره تيجي لي العياده و نتكلم

شيراز . هحاول اصل ماما بدأت تدايقني معرفش مالها الايام ديه .بس اوكيه ان شاء الله اروح و قفلت معاه

و تاني يوم

دكتور كامل ابوها . صباح الخير يا شيراز بقالنا كتير مفطرناش مع بعض .مبسوط اننا هنتجمع علي الفطار

شيراز. صباح الفل يا بابا . فعلا يا حبيبي انت علي طول مشغول و مفيش فرصه نقعد مع بعض

كامل . طيب يا بنتي عايز اتكلم معاكي في موضوع مهم بالنسبه لي و ياريت نتكلم و نتناقش

شيراز . بابا ارجوك لو عريس لا .انا حاليا غير مؤهله نفسيا للكلام ده.و صدقني معنديش حاجه اتكلم و لا اتناقش فيها و الموضوع المهم يا بابا لازم يكون بالنسبه لي مش بالنسبه لك ياريت تراعوني شويه

( و دخلت مامتها في منتهي الغضب و العصبيه )

الام . هو فيه ايه يا شيراز حتي مسمعتيش ابوكي عايز يقول ايه و يعني ايه مش جاهزه نفسيا انتي بتهربي من الجواز ليه . هو انتي مرتبطه بحد لو مرتبطه و بتحبي حد عرفينا ويجي يتقدم لك بدل المرمطه اللي احنا فيها ديه

كامل . اهدي يا ستي مش كده البنت بتقول رايها و مقالتش حاجه غلط .اقعدي يا بنتي كملي اكلك و احكي لي رافضه ليه

الام . انت اللي مدلعها يا كامل لغايه ما بقت مستفزه

كامل . اهدي يا ستي قولنا اتكملي يا بنتي

(فضلت ابص ل بابا و ماما و مش عارفه اقول ايه )

شيراز . يا بابا موضوع الجواز ده مسئوليه كبيره وعبء .انا مش عايزه أتجوز واخلف و ابقي زيكم .كل واحد في وادي و بنتكم في وادي. مش عايزه اخلي بنتي وحيده زي ما انتم خلتوني وحيده. لا عندي أخت ولا أخ و لا حاسه بحب ابويا و امي. الاهتمام و الحب عندكم معناه الفلوس بس انا كنت محتاجه وجودكم في حياتي مش محتاجه اني احس بقسوه و جفاء و تسلط عليا. انا تعبانه بما فيه الكفاية ارجوكم سبوني في حالي

( و استأذنت و سبتهم و مشيت )

الام . البت ديه غريبه جدا و وراها حاجه. بتقول اي كلام بس فيه سر في حياتها انا حاسه بكده . و هعرفه لازم اعرفه

الاب . شيراز عندها حق في كل اللي قالته .احنا ركزنا في حياتنا و مستقبلنا المهني و سبنا بنتنا .كنا فاكرين ان احنا كده عاملين اللي علينا وزياده.بس احنا قصرنا في حقها .خلينا نحاول نقرب منها و نفضي لها شويه و نحسسها بحبنا و اهتمامنا انا حتي مش فاكر امتي آخر مره حضنتها و لا امتي آخر مره اطمنت عليها و اكلت معاها .لازم نخلي بالنا اكتر من كده البنت هتروح مننا ربنا يسترها يا رب

شيراز . نزلت من البيت و انا تعبانه نفسيا مش لاقيه حد اروح له لا مكان و لا صاحب و قررت اتصل بدكتور أحمد اللي كان نايم و للاسف مردش عليا ادايقت اوي و بعدها قفلت تليفوني و روحت شغلي و كنت قاعده بكلم نفسي

( انا فعلا مجنونه هو انا بهرب منه و لا بعاقبه بس بعاقبه علي ايه عشان يعني مردش عليا اكيد نايم يعني .يوووه بقا هو انا ليه بتعامل جوايا علي انه حبيبي بس الصراحه . عندي فضول اعرف اتصل بيا و لا لا ) فضلت قافله تليفوني لغايه ما خلصت شغل استأذنت بدري ساعتين و نزلت و أول ما فتحت تليفوني .لاقيت رسايل كتير جايه ورا بعضها و اتصالات فرحت جدا جدا ان فيه حد بيهتم بغيابي و بيتخض عليا تصدقوا أول مره يجي لي كم الرسايل ديه.اصلا معنديش حد يعبرني و لا يسال فيا

و من قبل ما افتح اي رساله اتصل

دكتور احمد . انتي كويسه يا شيراز ايه تليفونك كان مقفول ليه

شيراز . اهدي يا احمد تليفوني فصل شحن و انا كنت في الشغل و بصراحة مليش اختلاط بحد و مكنتش عايزه اطلب من حد حاجه

أحمد . مفيش شاحن و فاصل شحن امال انتي بتردي ازاي دلوقتي يا شيراز ممكن تفهميني انتي عملتي كده ليه

شيراز . اصل يا احمد بصراحه كنت

أحمد . عايزه تشغليني عليكي يا شيراز.طيب ابعتي لي اللوكيشن انا هاجي اخدك

شيراز . لا يا احمد متتعبش نفسك انا هركب واجي ع العياده لو موجود

احمد . ماشي يا شيراز عموما انا في الطريق قبل ما توصلي العياده هتلاقيني هناك

شيراز . اوكيه يا احمد.قفلت و انا طايره من الفرح و معرفش السبب ايه.و ركبت اوبر وقعدت اقرا في الرسايل وانا عماله اضحك .انه اتخض عليا بالشكل ده و مقدرش يداري .( ايه يا بنتي موبايلك مقفول ليه

شيراز أول ما توصلك الرساله طمنيني عليكي

شيراز انا قلقان عليكي اوي

يارب يكون خير قلقتيني

اوعي تكوني بتعملي حركه هزعل منك

يا شيراز انا قلقان جدا قافله تليفونك ليه )

كنت بقرا الرسايل وبضحك

لغايه ما وصلت عند رساله من رقم غريب أول ما فتحتها اتصدمت

( ازيك يا شيراز .حسابنا لسه مخلصتش )

قريت الرساله و جسمي تلج و كنت بترعش و بدأت اتنفس بصعوبة شديده

سواق الاوبر . يا انسه انتي كويسه .تحبي اود*كي المستشفي

شيراز . لالا مش عايزه اروح مستشفي شويه و هبقي كويسه ان شاء الله

( قعدت اعيط و طلبت منه يوديني علي عنوان العياده )

اول ما وصلت كانت العياده مفتوحه

كنت بقرب منها خطوه ب خطوه و انا خايفه يكون حد ورايا دخلت بسرعه و قفلت الباب و جريت علي احمد و انا عماله اعيط منهاره

قام احمد مفزوع

احمد . شيراز بتترعشي ليه ايه اللي حصل مالك ايه اللي حصل ردي عليا فيه ايه

( فضلت شيراز تترعش و تعيط لغايه ما اغمي عليها )

حاول احمد كتير يفوقها بس دخلت في نوبه تشجنات و جسمها كان بيترعش و متلج

و هنا قرر يجري بيها ع المستشفي

( دخل الدكتور وكشف علي شيراز و قرر انه يعمل لها شويه تحاليل و يخليها تحت الملاحظه لتاني يوم )

فضل جمبها احمد و بعد نص ساعه من الكشف فاقت شيراز و كانت بتفتح عينها بالعافيه

دكتور احمد . شيراز يا حبيبتي انتي كويسه انا كنت قلقان عليكي جدا ايه اللي حصل بس احكي لي

شيراز . سمعت شيراز كلمه حبيبتي ماكنتش مصدقه ودانها انه قال لها كده و لا مصدقه عينها وهي شايفه خوفه عليها

دكتور احمد . شيراز سمعاني .انتي مش قادره تتكلمي فيكي ايه طمنيني ارجوكي

شيراز . انا كويسه يا أحمد والله متقلقش عليا

دكتور احمد . طيب تقدري تحكي لي ايه اللي حصل و لا مش قادره

شيراز . مش هقدر والله يا احمد اكيد هحكي بعدين بس دلوقتي مش قادره

دكتور احمد . طيب ارتاحي و انا هفضل اتابعك لغايه ما تطلعي دلوقتي لازم تسمعيني كويس .انتي هتفضلي كده لبكره .يعني لازم نبلغ اهلك و انا لازم امشي عشان محدش منهم يعرف انك بتروحي لدكتور نفسي زي ما اتفقنا

شيراز . عندك حق. والله انا هتصل بيهم دلوقتي وأقولهم علي مكاني

( شيراز مكنش عندها النيه انها تكلمهم و فضل دكتور احمد بره وشيراز متعرفش و بعد نص ساعه لقت امها وابوها داخلين مخضوضين عليها )

كامل . شيراز بنتي انتي كويسه ايه اللي حصل طمنيني عليكي مالك فيكي ايه

الام . انا اسفه يا بنتي لو كنت السبب في زعلك ده سامحيني مش قصدي غير مصلحتك بس انتي اللي بتاخدي كل حاجه علي اعصابك عشان كده تعبتي يا بنتي

شيراز . انا كويسه وبخير الحمد لله بس انتوا مين اللي قالكم اني في المستشفي

كامل . الحمد لله علي سلامتك يا بنتي .الراجل اللي لقاكي واقعه يا بنتي الله يكرمه اتصل بلغنا باللي حصل و مكان المستشفي

( وفجاه جالها رساله بصت ع الاسم لقت احمد )

و فتحت الرساله

( كنت عارف انك مش هتتصلي بيهم .عشان كده كلمتهم.كمان انا فضلت واقف بره لغايه ما وصلوا و دلوقتي همشي لاني اتطمنت عليكي .بالليل هكلمك )

قعدت شيراز تكلم نفسها

( ياااااه هو كل اللي انا فيه ده بجد فيه حد خايف عليا كده حد متهم بيا كده طب ازاي حبني علي طول كده و لا معجب بيا بس انا سمعته بيقولي يا حبيبتي) قاطع كلامها مع نفسها مامتها

الام . شيراز يا بنتي احكي لي ايه اللي حصل لك

شيراز . والله ما انا عارفه يا ماما دوخت و وقعت و مش فاكره حاجه خالص

الام . ربنا سترها الحمد لله يا بنتي هنطمن عليكي وان شاء الله كل حاجه هتكون كويسه

( و دخل الدكتور سيف )

الاب . ها يا دكتور ممكن اعرف ايه اللي حصل لبنتي

الدكتور . هي كل أمورها تمام معندهاش تعب عضوي بس الانسه شيراز اتعرضت لضعط نفسي جامد اوي و الفتره الجايه محتاجه ترتاح و تبعد عن اي حاجه بتزعلها و ياريت كمان تروح لدكتور نفسي هيساعدها كتير

( يا تري هتقنع اهلها انها تروح لدكتور نفسي ولا هتفشل استنوني الجزء الجديد عشان تعرفوا شيراز حصل لها ايه