بين الألم والأمل

الفصل الثامن

الفصل الثامن من الالم

الظابط . اكيد هنكون علي تواصل ان شاء الله

( نزلت شيراز و احمد و بص ب استغراب و كان فيه عربيه واقفه من بعيد لمح احمد اللي في العربيه اللي طلعت تجري بسرعه و اتصدم من الشخص اللي كان جوه )

شيراز . فيه حاجه يا احمد مالك واقف كده ليه

احمد . لا يا روحي مفيش حاجه انا بس لمحت واحد صاحبي كنت بشبه عليه بس مطلعش هو يلا يا روحي عشان اروحك البيت و لو اتشغلت عنك النهارده تعرفي اني بخلص شويه حاجات .

انا والله متراكم عليا بلاوي سوده عايز اخلصها

شيراز.. اوكيه يا حبيبي ربنا معاك

( ركبت شيراز و احمد وصلها للبيت و رجع تاني علي عيادته مصدوم و بيحاول يكدب نفسه مش مصدق ان اللي شافه في العربيه هو ده صاحبه مروان )

لا لا اكيد مش مروان ، معقول يكون مروان ، معقول يكون عارف كل ده و ساكت ده عشره عمري ما اقدرش اصدق ابدا اكيد حد شبه مروان . عموما كله هيبان يا رب اخلف سوء ظني بصديق عمري

( قعد احمد في العياده و مستني الوقت يعدي عشان يقابل مروان و جت الساعه ٧ و خبط حد ع الباب فتح الباب لقي مروان واقف و حزين و كأنه في حاجه عايز يحكيها )

أحمد . ادخل يا ابني مالك متنح كده ليه ده انت واحشني جدا والله

مروان . و انت كمان يا احمد بقالنا زمن مشوفناش بعض بس اللي في القلب في القلب

أحمد . صح يا مروان ده انت اخويا مش صاحبي قولي كنت فين النهارده

مروان . كنت بدي محاضره لدفعه تالته في الكليه .

احمد . اصل يا عم اتهيا لي شوفتك ادام القسم

مروان . قسم ليه يا ابني ايه اللي حصل قلقتني لو فيه مشكله احكي لي انت عارف انا ليا ناس كتير في الشرطه حد مدايقك و لا ايه

أحمد . لا ديه حاجه بسيطه سوء تفاهم مع مريض و حليته خلاص

مروان . طب الحمد لله يا عم و ربنا خضتني

اخبار شغلك و العيانين ايه

أحمد . يا عم بقيت محتاج دكتور يعالجني مش كنت اتخصصت زيك و ارتحت بدل التعب و المرمطه ديه

مروان . يا سيدي كل واحد بياخد نصيبه و كله متعب يا سيدي

أحمد . عندك حق والله محدش مرتاح .احكي لي عنك غاطس فين و اخوك اللي بره مش ناوي يرجع

( كنت فاكر انه هيتوتر بس رد عليا عادي جدا )

مروان . والله يا سيدي الافضل انه ميرجعش واد فاشل و بتاع مشاكل مش عارف الواد ده طالع لمين كده ، مهما تحاول تعدله و توجهه مفيش فايده

بحمد ربنا انه بعد عني كان بينط لي العياده و يدايق السكرتيره بالكلام و كانت هتمشي بسببه و البنت ملتزمه و كويسه جدا في شغلها واد مؤذي

أحمد . طيب هو سافر ليه يا مروان

مروان . والله يا احمد علمي علمك قعد مختفي يجي اسبوعين و انا كنت اصلا متخانق معاه ما بصدق انه يبعد و بعدين لاقيت بابا بيقول انه سافر يبدأ حياه جديده او يكمل تعليمه والله ما فاكر بس مهتمتش

أحمد . طيب يا مروان اللي هقوله ده لازم يكون سر بينا مهما حصل ميطلعش بره

مروان . قلقتني يا احمد فيه ايه و بعدين عمر ما حاجه بينا طلعت بره

احمد . عارف بس بنبه عليك انت لازم تعرف

سمعت عن بنت اسمها شيراز قبل كده ؟

مروان . اه اعرف واحده بنت صاحب بابا بنت محترمه و بنت ناس يعني

أحمد . اهو اخوك من ٣ سنين خطفها هو و صاحبه و حاول يعتدي عليها و مش بس كده مصورها عشان يبتذها و يفضحها و اتخبط بالعربيه و باباك هربه بره مصر بس انا مش هسيبه و مش هسيب حق شيراز

شيراز انا خطبتها و هتجوزها قريب و انت لازم تساعدني نرجعه مصر

( مروان كان في صدمه غير طبيعيه و مش مستوعب )

أحمد . انا عارف انك مصدوم بس لازم تساعدني يا مروان ، لازم يرجع ، لازم يتعاقب علي فعله الزفت ده

البنت ٣ سنين في حاله نفسيه سيئه ٣ سنين كوابيس بتحلم بيه بيأذيها لازم حقها يرجع

مروان . انا مش مصدق اقسم بالله ، انا مش قادر اصدق. معقول ده حصل انا عارف انه وسخ بس كنت فاكر اخره اللي عمله مع السكرتيره لكن يخطف و يعتدي و يصور مش قادر اصدق كل ده حصل ازاي

أحمد . ايوه حصل و تعالي بكره معايا القسم و شوف الصور و رسايل التهديد

مروان . ليه بابا يعمل كده .معقول يكون عارف باللي حصل و سفر اخويا عشان يهرب و يبعده

طيب و بنت صاحبه انا مش مصدق انا ماشي يا احمد لازم ارتاح حاسس ان هيجري لي حاجه هرتاح و اكلمك

أحمد . ماشي ارتاح و قولي قررت تعمل ايه

مروان . ان شاء الله سلام

روح مروان البيت و كان مصدوم و ساكت و مش عارف ايه التصرف الصح اللي لازم يعمله

الام . ايه يا مروان يا ابني مسهم كده ليه مش عوايدك يعني

مروان . مفيش يا امي عندي محاضره بعد بكره في الجامعه و بحاول ارتب أفكاري

الام . ربنا يكرمك يا ابني و يوفقك في حياتك

مروان . ربنا يخليكي يا امي . قولي لي يا امي هو اخويا مش حابب يرجع و لا ايه عجبته العيشه بره

( و هنا ارتبكت الام و وشها جاب مليون لون )

مروان . ايه يا امي وشك جاب ميه لون ليه انتي تعبانه يا حبيبتي و لا ايه

الام . اه يا مروان هدخل ارتاح يا حبيبي تصبح على خير

مروان . بس لسه مردتيش عليا يا امي

الام . معلش يا حبيبي بكره نتكلم تعبانه خالص تصبح علي خير

مروان . و انتي من اهل الخير و الف سلامه عليكي يا امي

دخلت الاوضه و مروان كان قاعد سرحان في رد فعل مامته

و راح علي اوضته و قبل ما يوصل سمع مامته بتتكلم مع باباه

الام . انا خايفه اوي لسرنا يتكشف و الولد يروح في داهيه ، حاسه ان مروان متغير خايفه ليكون عرف حاجه

الأب . متقلقيش لو كان عرف حاجه مكنش سكت وكان زمانه جه و **ر البيت ده كله و لو كان عرف كان عرف من زمان انتي عشان بس طول الوقت خايفه و قلقانه اهدي عشان انتي اللي هتفضحي السر ده

الام . طيب و بعدين هنفضل كده مخبيبنه ابني وحشني اوي نفسي اشوفه انا نفسيتي تعبانه

الأب . طب ايه رايك نرجعه و يدخل السجن و حضرتك تبقي تروحي له زيارات انتي نسيتي انا عملت ايه عشان اطلع ابنك من المصيبه ديه عمال يغلط و يعمل بلاوي و انا الم وراه و انتي عايزه تضيعي مستقبلي و حياه البيه ابنك المحترم عشان واحشك اوي انا هنام تصبحي علي خير

الام . انت بتتريق عليا انت السبب في كل اللي حصل ده انا قولتك مليون مره شد عليه عاقبه مكنتش فاضي له كل اما اكلمك تقولي الشغل و العياده و العيانين و ديه النتيجه هربان عشان اغتصب واحده هربان عشان عمال يتعرض لبنات الناس و احنا بنداري علي مصايبه عمال يزيد و يزيد و انت بتلم وراه لما فجر ?

الأب . اسكتي الله يخرب بيتك البنت اللي اغتصبها ديه بت شمال و كانت عايزه تدبسه عشان يتجوزها و هو كان سكران انا لما احل الموضوع و اخلص منها خالص هنخليه يرجع

الام . تخلص منها ازاي ده انت عملت لها عمليه و نزلت البيبي و ادتها فلوس و البت بتغيب تغيب و ترجع تهددنا . كان المفروض ابنك يتجوزها عشان يتربي انت دايما بتصلح الامور غلط دايما بتبص شكلك و برستيجك و وضعك الاجتماعي مش بتبص لعيالك للاسف انت راجل اناني و لولا عيالي كنت اتطلقت منك والله

الأب . يعني برضه بتفكري في العيال و مستقبلهم لكن لما افكر انا في نفسي اكون وحش و اناني انتي ست غريبه اوي

الام . انا بضحي بنفسي عشان عيالي و انت بتضحي بينا عشان مصلحتك و شغلك حرام عليك يا شيخ انت السبب في كل الارف اللي احنا فيه منك لله يا شيخ لولا خوفي علي نفسيه عيالي كنت حكيت لهم بس مش عايزه اهز صورتك العظيمه ادامهم كل واحد فيهم شايفك أعظم اب و أعظم دكتور بس للاسف محدش يعرف حقيقتك الزفت غيري ربنا يصبرني عليك و علي تفكيرك اللي دمرنا

الاب . لا استني هنا بقا لو انا بكل السوء اللي انتي بتتكلمي بيه ده متنسيش ان موبايلك اللي في ايدك الي ب ٣٠ الف جنيه من تعبي و شغلي حسابك اللي وصل ٥٠٠ الف جنيه ده من تعبي و شغلي ، عربيتك اللي بتتغير كل سنتين ديه برضه من فلوسي ، مجوهراتك ديه اللي ماليه الدولاب من فلوسي يا هانم و اقولك انتي ساكته علي كل مصايب ابنك معايا ليه لان بمنتهي البساطه انتي متقدريش تخسري كل حاجه انا قدمتهالك يعني انتي برضه انانيه ف بلاش نعاير بعض ماشي يا حبيبتي

الام . انت شخص مريض و انا مش طيقاك انا هطلق منك قريب اوي

الاب . براحتك بس فكري كويس عشان متخسريش

( مروان كان واقف ورا الباب بيسمع مصايب اخوه و مصدوم و بيسمع كلام امه عن ابوه و مش مصدق .مش مصدق ان اهله يعملوا كده

يعني شيراز مش أول واحده يتعرض لها و ازاي ابوه كلم بالانحطاط ده و يعمل جريمه زي ديه يخلي واحده تنزل البيبي عشان يحافظ علي ابنه ، جري مروان علي اوضته و رزع الباب و قفل الباب بالمفتاح و جريت امه تشوف فيه ايه و لقت الباب مقفول قعدت تنادي عليه كتير وةتطلب منه يفتح الباب و هو مردش ، عرفت ساعتها انه عرف سرهم.يا تري ايه اللي هيحصل ومروان هيتصرف ازاي ده اللي هنعرفه الجزء الجديد