❀⊱Madel's POV⊰❀
Kanina ko pa nililibot ng paulit-ulit ang buong unit na ito na pinagdalhan sa akin ng isa sa mga bodyguard... uhm... bodyguard yata ’yon ni Orion, hindi rin ako sigurado. Wala naman siyang sinabi sa akin. Sinalubong lang niya ako sa airport at dinala na sa lugar na ito.
Maliit lang ang unit, pero maganda ang ayos at may dalawang silid. Tipong newly bought, kasi halata sa amoy ng buong paligid, at karamihan sa mga gamit ay mukhang brand new pa. Tahimik din. Walang kahit anong ingay kung hindi ang mahina at tuluy-tuloy na ugong ng aircon. Mag-isa lang ako dito, ang isang silid ay nakakandado, at kanina ay sinubukan kong buksan, pero hindi ko mabuksan. Ang gamit ko ay nandito lang sa living room. Kanina ko pa gustong dalhin sa loob ng isa sa silid, pero hindi ko ginagawa.
