قصة (الـتــــواه) ?
فكرة وتأليف وكتابة: محمد حمد كمال
ـــــــــــــــــــــــــــــــــــــــــــــــــــــــــــــ
ما كَنش فيه فيه شُغلانة تانية قُدام (سيد) عشان يشتغلها غير الشُغلانة دي، ما هو لا معاه شهادة ولا غيره! ولا حتى ليه قرايب من اللي بينفعوا في المواقف اللي زي دي، على الأقل كانوا ساعدوه أنه يشتغل في حاجة أحسن من اللي هو فيها، عشان كدة سيد مالقَاش قُدامه غير إنه يكون عامل في مَحجَر.
شغلانة صعبة مش أي حد يستحملها، طول الوقت في الصحراء والخلاء وبيتنقل من مكان لمكان، عايش جوة بواطن الكهوف والجبال وبين الصخور، لهيب الشمس الحارق مِتسَلَط فوق رأسه، طبيعة البيئة اللي بيشتغل فيها وإنعدام الإمكانيات مخليينه دايمًا عُرضة للأمراض والإصابات، ورغم كل ده كان مستحمل ومكمل عشان لُقمة العيش.
كانت الشمس في طريقها للغروب، وكلٍ من سيد وزميله (خليل) قاعدين فوق صخرة ضخمة بيشربوا الشاي، لاحظ خليل
