- الحسد عماني

1669 Words

قالوا فارس ، انا وهند بصينا لبعض في دهشة معقول لا ، لا ده الجنان بعينه ، يعني طول عمرنا حياتنا جافة مافيهاش غير الحلم والأمل بأن ممكن نقابل الشخص اللي نحبه ويحبنا ونعيش زي كل الناس ، ونكون اسرة صغيرة ، يقوم لما يتحقق الحلم ،، يبقى كابوس ، يبقى مقسوم على اثنين ، بس كنت ديما بسأل نفسي ، يا ترى ايه الحكمة في اللي بيحصلنا ده ، هل ده رسالة من ربنا لينا باننا نوثق حبنا لبعض بالجواز من نفس الشخص ، ، ولا ده بداية النهاية في علاقتنا ،اسئلة كتير كنا بنفكر فيها ، وفاجأة فارس اختفي ، فهمنا انه ادانا فرصة نفكر ، فعلا الامر محتاج تفكير، رجعنا البيت بس كل واحدة كانت في وادي هند اللي مش بتبطل شقاوه ساكتة علي طول وان جيتوا للحق مش هند بس ، انا كمان ، كنت بقول لنفسي ، إذا كنت مستحملتش قربهم من بعض وكنت بغير عليه أيام المستشفي ، ازاي هقدر اسلم بالامر الواقع واقبل انا نكون ضراير ، وبعد تفكير رهيب قلت لهند ،بقولك اية يا هند ، ردت عليا بلهفة وكأنها كانت مستنية اني ابدأ بالكلام ، قالت نعم قولي يا امل ، قولتلها فارس اتصل بيكي النهاردة ، قالتلي لا، اخر رسالة وصلت منه كانت على جروب الواتس ، أصل فارس للامانه عشان ما يسبش مجال للقيل والقال ، عملنا شات بينا احنا التلاتة يطمنا فيه على نفسه ويطمئن علينا كمان لانه سابنا نفكر برحتنا ، عشان مفيش واحدة فينا تفكر انه على اتصال بواحدة دون الأخرى ، بيحاول يلتزم بوعده انه يعدل بينا ، بصراحة هو معذور في الحيرة ،قولتلها فارس بقاله شهرين برا ، والمفروض على كلامه انه جاي بكرا ومنتظر الرد ، ردت وقالت ااه هنعمل ايه ، قولتلها بصي انا عارفة اني الكلام ده اكيد انتي فكرتي فيه ، وعارفة انه كلام جنان ، بس اية اخرة الجنان ،زينا زي غيرنا ، تجربة يافشلت يا نجحت واهو نكون تخلصنا من لقب بيت العوانس ويبقي يا بت المجانين يابيت المطلقين ، هههه اهو مصلحة ، ضحكت هند ، وقالت امل انا بحبك اوي وحقيقي مقدرش اعيش من غيرك ولو ليوم واحد ، بس انا كملت مكانها وقلناها في وقت واحد ، لكن بحب فارس ، وضحكنا جامد علي اللي احنا فيه ، قولتلها بصي اكيد في حكمة في الموضوع ده! ، و هى الحياه ايه الا تجارب ، والدرس بنتعلمه بعد اجتياز التجربة مش قبل ، يبقي مش هنقدر نحكم على علاقتنا بفارس الا بعد مانتجوز ، ايه رائيك انا موافقة على الجواز ، بصيت لقيت هند وكانها ما صدقت وقالت وانا كمان موافقة ، ورجع فارس، بعد غياب 3 شهور ، و أول ما نزل من الطيارة كان في منتهى السعادة ، لما شافنا في انتظاره .وبلعناه قررنا ، والصراحة فارس مكنش مصدق كان هيطير من الفرحة ، وحدد الفرح أول خميس في الشهر الجديد ، كان جايب لينا هدايا لكل واحده فينا شنطة ، قال عشان نكون على وفاق ديما لازم يكون في قواعد نمشي عليها اولا ده ولقيناه مطلع من جيبه جنيه ، اندهشنا ايه ده ، قال ده الفيصل بيني وبينك ، يعني لما يكون فيه حاجة فيها اختيار نعمل قرعة الموضوع بالنسبة لنا كان هزار معقول قرارات حياتنا هتكون عن طريق القرعة ، ايه الجنان ده ، بس فارس كان جد وفعلا بداء ، طلب من كل واحدة فينا تختار وجه من وجوه العملة وبناء عليه كل واحدة هتاخد هديتها ، تم الامر بنجاح ، بس الحاجة الحلوة اننا بعد ما رجعنا وفتحنا الشنط لقينا الاتنين طبق الاصل بس كل واحده وذوقها واللي بتحبه، ومرت الايام وفارس جبلنا فيلا وكل واحدة فينا فرشة الدور الخاص بيها ، وعملنا فرح اسكندرية كلها اتكلمت عنه ، وعن جماله ، كل واحدة فينا كانت ملكة متوجة على عرشها وفارس كان امير الاحلام ،اللي كل الناس تحسدنا عليه ، بس الصراحة الأمر مكنش سهل ولا هاين ، الفرحة المقسومة على اثنين كانت عاملة زي الايسكريم وعليه رشة ملح، بس كان سلاح ذو حدين بس الحلو اللي فيها ان الازمات برده مقسومة على اثنين ، قضينا شهرين عسل فارس اظهر فيهم انه فعلا الرجل اللي يعتمد عليه ، مخلفش وعده لينا فعلا اثبت حبه وحاول يبذل قصارى جهده انه يسعدنا ، كل واحده فينا طلبت تقضي شهر العسل في مكان معين وهو نفذ وأول ما يلاقي فيه اختلاف على طول يخرج الجنيه و نحسم الأمر ، وعلى الجميع أن يلتزم ويحترم القوانين ، عدت علينا ايام صعبة الغيرة كانت بتحرق قلوبنا بس فارس كان بيخس ويحاول يحتوي الامر و مرت علينا من جملها كنا بنفكر اننا بنحلم من روعة السعادة اللي فيها ، فعلا الرجل الحنين رزق ، فما بالك برجل زي فارس حنين كريم و شهم وجدع ، واهم حاجة بيتقي الله راجل فاهم معني الزواج بيحقق شروطه المودة والرحمة ، لحد مافي يوم حصلت الحاجة اللي منقدرش نعمل فيها قرعة ، وهو اني تعبت وحسيت بدوخة والسبب اني حامل ، كنت في منتهى السعادة و شفت ده في عيون فارس وهند كمان لمحت في عينها دمعة بس كانت على وشها فرحة انا حفظها وعرفها كويس ، فارس عملنا حفلة كبيرة ، وبعد فترة عرفت ان هند بتروح لدكتور عشان الحمل ، ولاول مرة فارس يكلم واحدة على انفراد لقيته اتصل بيا وقالي انا هاخد هند لدكتور عشان عندها مشكلة في الحمل و هتعوز تعمل حقن مجهري، يومها عرفت بجد اننا اخترنا الراجل الصح واننا جوازنا مش غلط الموضوع مش جوازة والسلام ، الموضوع مين اللي هتتجوزيه ، الرجل يجعلك ملكة وهو ليكي امير اياكي و أشباه الراجل هي اللي تعملك خدامة وهو الملك ومركز الكون وانتي تابع وبس ، اختارى صح اختاري راجل بجد ، فرحت جدا لهند واتمنيت من ربنا يرزقها بالذرية الصالحة ، الحياة بينا استقرت إلى حد كبير حتي فارس محسش انه ندم رغم انه تهاجم كتير ، و برغم أن عملية هند منجحش بس ربنا عوضنا لاتي كنت حامل في تؤام معرفش ليه كنت حساها هدية من ربنا لينا احنا التلاتة ، بس الدنيا مش على طول حلوة كدا ، مش ماشية على نهج واحد ، وجه اليوم اللي غير حياتنا تمام ، فارس عملنا مفاجاة حلوة اوي ، كانت عبارة عن حفلة في فندق كبير ، وجبلنا فيها عمر دياب واصالة وكل المطربين اللي احنا بنحبهم ، منعرفش ليه ، وكل ما نسأله كان يقول عايز افرح بيكم ، عشان كل الدنيا تعرف اني مالك الشمس والقمر ، وانه ربنا راضي عني لما رزقني بيكم ، انتوا حالة صعب تكرر قلبكم الصافية وحبكم الصادق كان هو السبب في اني اعشق امكم ايووووووه يا جدعان علي بنات بحرى وجمال روحهم وشقاوتهم ، دول احلى بنات ده ولا ايه ، انتوا كتير اوووي علي قلبي حقيقي وانا معاكم بكون في منتهي السعادة ،معرفش ليه الكلمة قبضة قلبي ، أي حد كان يتهمني بالجنون عشان جمعتكم في بيت واحد ، كنت برد اذا كنتوا سكنتوا القلب والعقل في وقت واحد، ومحدش فيكم اخدت اكتر من التانية ، فمش صعب اننا نعيش في بيت واحد ،لاني مكنتش هسامح نفسي لو كنت عكرت صفو الحب اللي بينكم ده وفرقتكم ، انا اعتبركم رسالة للعالم لنشر معنى الحب الحقيقي ، وخلصت الحفلة بس معرفش ليه كنت حاسة اني قلبي مقبوض، لان كان مختلف من اوله فارس قرر اننا ننام في اوضة واحدة وعلى سرير واحد ، مان عايز يوصلنا حاجة ، عرفناها بعد كدا وهي أنه فضل عادل بينا حتى في الذكريات لان مع طلوع النهار كان اختفى فارس من حياتنا احنا الاتنين ، كنا هنتجنن اختفائه شي مش طبيعي كنت بدور عليه بجنون دون جدوى لا بيرد علي الرسايل ولا الموبايل ، لمدة 4 شهور وقتها انا كنت على وشك الولادة وتعبت اوي من كتر ما دورانا واحنا بنعيط على الحلم اللي قته قصير اوي ، ملحقناش نفرح ، هند اخدتنى فى حضنها وقالت كفاية ياامل هو اكيد هيرجع ماهو مش معقول يكون وجوده وهم في حياتنا ، احنا لازم نهتم بالامانة اللي معانا ، انتي محتاجة رعاية ،وفعلا فضلت هند معايا لحد يوم الولادة وبرغم انه كان يوم صعب إلا أنه كان شعور جميل ، سبحانك يارب كنا ممكن نفضل محرومين منه ، لولا ان ربنا رزقنا بفارس ، انتهي كل الالم مع اول صرخة طفل وهو في حضني هند كانت معايا بصتلي وهي بتعيط وتضحك في نفس الوقت أصل الاطفال الاتنين شبه فارس بضبط ، لقيت هند بتقولي امل ، نسميهم أسر وجاسر ، اسرفارس لأنه أسرنا بحبه وقدر ي**ركل التوقعات انه يكون زوج فاشل وقدر يحتوينا بحبه وبقلبه اللي يساع الكل جاسر فارس، لأن بجاسرته وعدم خوفه من لوم الناس **ر القاعدة ومهموش كلام الناس وصورتهم وكتبت رسالة لفارس علي الواتس ، وده كانت الرسالة الوحيدة اللي رد عليها وقال الحمد لله بحبكم جدا هند اتفقت معايا ان كل واحدة فينا هترعي الاولاد يوم ، ومع اول اسبوع بعد الولادة عرفنا مكان فارس وسافرنا على عنوان أهله ، وكانت الصدمة ان فارس كان مريض وبيتعالج ، وبيعمل عملية خطيرة جدا كلنا روحنا المستشفى في لمح البصر دخلنا الاوضة وشوفنا فارس مكنش هو ده كان شخص تاني هزيل ضعيف من أثر جلسات الكيماوي سالته بدموع عيني انت ليه خبيت علينا ، ده حقك اننا نكون جنبك في الوقت ده انت عملت عشنا كتير قال بكل تعب وفرحة انا كنت واخد عهد قدام ربنا اني اكون مص*ر السعادة ليكم واكون عوض ليكم ، ومقدرش ابد اشوف دموع واحدة فيكم ، و طلب انه ياخذ اولاده في حضنه وبعدها دخل اوضة العمليات سبع ساعات كانوا اسوء ساعات عدت علينا والاسوء منها لما خرج الدكتور وبلغنا بوفاة فارس ، يومها كل واحدة حضنت ابنه بكل قوة وكأننا بنستمد منه القوة ، فارس كان حلم جميل بس انتهي وسابلنا اجمل هدية جزء منه كان رسالة لكل رجل يطالب بتعدد ويتحجج بشرع ربنا ، فارس كان بيوصل ان ربنا اداك حق التعدد بس شرط عليك العدل لو شايف نفسك تقدر على الجمع بزوجتين اسأل نفسك هل هتقدر تعدل بينهم هل هتقدر تساعدهم ، فارس لاخر يوم ليه معانا اصر يكون عادل بينا حتى في الذكرى الاخيرة اننا نكون مع بعض ، ومرت الشهور والسنين والنهاردة يوم تخرج الدكتور اسر والمهندس جاسر اللي صح اتربوا بدون اب بس كان ليهم بدل الام اتنين وفعلا من داخل المحن تولد المنح حب وانشر حبك بين الناس اوعي تقسي أصل القسوة مالهاش لزمة ولا حتى اساس ، بالمحبة ربك أمرك ، اوعى تفكر انها اضعف ، لا ده اغلي من الماس،، اصل قلبنا يا صاحبي ده ميزان حساس نعرف به اوصل ومعادن بعض الناس اسمع مني الدنيا لو مفيهاش الحب يا صاحبي ماتنداس

Free reading for new users

Scan code to download app

App Store Google Play

Facebookexpand_more