بحار

1-8

= وعليكم ...

ــ صار شي؟؟ ليش متجمعين جذي ؟؟

منال ــ متجمعين  بالخير ..زوجتك عزمتنا على الغدا ليش ماقالت لك ؟؟ماشاءالله طباخها ينان ...

سلوى ــ صج يالنسيب اكتشفت  مواهب رغود بالطباخ مع انها ماكانت تداني المطبخ  أبد ...

ــ هي وينها الحين..

منال ــ في المطبخ ..

طبعا رحت المطبخ وعيوني مركزة بانسانة وحده .. من غيرها ؟؟  اللي تم قلبي  يرجف طول ما اسمع نفسها ..

ـ رغد ..شالعزومة؟؟

رغد ـــ حبيت انفذ اللي طلبته مني وقلت مالي غير اني أشتغل لين اتعب ..وهذا انا من الصبح وأنا على وقفة وحدة ..

ـــ ارتاحي لاتموتين انتي..

رغد ــ لا ..أنا مرتاحة جييه ...بس ماتعبت لين الحين ..أب أتعب أكثر ,خلني ـغسل الصحون وانت روح تكلم مع  خواتك ..انشاالله مثل الطيارة ويطيح بسهالة ..

ـــ ماطاح بسهالة نسيتي انج ترقدتي؟؟

رغد ــ مب مشكلة ..روح لخواتك لايشكون وانا الحين انجب لك الغدا ..

رغم عني مب يدي  التقت نظراتي بنظراتها ..كانت مريم ومنال  ونورة  منشغلات في سالفة ...

جواهر ــ وين رغد؟

ـــ في المطبخ..

جواهر ـــ  حرام.. لو ادري كان يبت خدامتي ..

ـــ ماله داعي ..

قمت من مكاني لين رغد...

ـــ خلاص ارتاحي ...

رغد ـــ مابقى شي ..

ـــ قلت ارتاحي ..يلا روحي اييلسي ...

رغد ــ بس احط لك الغدا..

ــ ما ابي ..تحركي ...

شفت نظرات الجواهر اغتظت ....جلست بقرب سلوى ورغد ..اللي كانوا يتكلمون عن الغدا ....

 رغد ــ يوسف ,,خلاص بس ..

ـــ ها؟؟

رغد ــ من قال ها سمع ...

نزلت عيوني ..من ييت وانا عيوني كل مرة تلتفت لجواهر ...لا اردايا ..حمار ..شسوي ...

طلعت رغد لفوق تبدل ملابسها ..والباقي انتقلوا للصالة الثانية..بينما كنت أغسل وأتجدد علشان الصلاة ..

رجعت الصالة ..وكانت جالسه بروحها ...

ــ ليش مارحتي معاهم؟

جواهر ــ الدريول بيي بأي لحظة ....

ــ وفالح ؟؟

جواهر ــ  راح البيت على طول ...

ــــ .......................................................

كنت لاول مرة من عشر سنوات أنفرد  بجواهر ...

ـــ مرتاحةمع فالح؟

ضحكت  بسخريةـــ ماكنه السؤال متأخر ؟؟

ــ مب وايد ..تأخر بس عشر سنوات ..

جواهر ــ عايشين ....

ـــ ....................................

جواهر ــ .........................................

اقدر أقول كل كلمة أبيها ...لكن ...ما تجرأت ....الجبن تسلل لقلبي ....

جواهر ــ تغيرت وايد عن قبل ..لما شفتك ..ماعرفتك ...

ــ أي ناحية ؟؟ احلويت ولا  صرت  ما انبلع؟

جواهر ــ ستين بالمية للأجابه الاولى ...

ابتسمت وتذكرت  أيام قبل ...ماكان عندها في يوم جواب نهائي ..دايما  تعطيني النسبة الاعلى  من توقعاتها ...

ـــ رجعتي لسلك التدريس؟

جواهر ــ بواسطة  فالح ..صرت اداريه وفكيت عمري من عوار الراس ...

ــ موفقه ...

جواهر ـــ اشتقت للبيت ..من زماااااان  ماشفته ...ونسيت شكله شلون ...

ــ  انتي اللي قطعتي  زياراتج ....

جواهر ــ مب بكيفي ..حتى بعزا  خالتي ..منعني اجي..

ـــ انت يبت هالعذاب لنفسج ..

جواهر ــ طول هالسنين ..ماكنت متعذبة كثر  الحين ...تقول منال انك كنت تكره جنس الحريم ولاتطيق تسمع شي عنهم ...وفجأة بين يوم وليله فاجأت الكل برغد ...وكانت مفاجأة ...مفاجئة ..

ـــ الحين بديت تحسين باللي كنت احس فيه طول هالعشر سنين؟؟؟ كنت حاطه يدج في ماي بارد ..وأنا يدي في النار ...حاس فيج الحين ياجواهر ....لاني كنت  في موقفج ...

جواهر ــ الهندي الكلب للحين مايا؟؟

ــــ  ياحبج لتغيير الموضوع ..اسمعنا صوت سيارة ...

جواهر ـــ حرام عليك يوسف ..انا اللي فيني كافيني ...

ـــ للحين قلبج  ماعرف غيري؟؟

جواهر ــ  ماقدر يكون لغيرك ...

 ـــ وفالح ...انتي كلج صرتي له ...

جواهر ــ الا قلبي ... ماكان ابد له....

ـــ تذكرين  الكف ؟؟

جواهر ــ اذكر  اني ض*بت نفسي  بنفس اليد ...ومرتين ...

ــ اللي قاهرني ياجواهر انه اخوي ....أخوي ..وأنت من عرضه ..يعني عرضي ...شلون قدرتي تفرقين قلوب وتفرقين اخوان؟؟

جواهر ــ وزنت الامور ..كانت حياة  مها وطلال وشيخه وابراهيم...ولا حياتي ....

ـــ كنت تحبين الاطفال وايد....

جواهر ـــ صحيح....

ـــ والله مارزقج بظنى....

جواهر ـــ رزقني باربعه كافي انهم ينادوني يمه...

ـــ عشر سنوات ...وللحينج ماقدرتي تحملين؟؟

جواهر ــ الله كتب لي اني عقيم...ماندمت ابد على قراري بالزواج من فالح ...كأني كنت حاسه اني مابصير ام ...يمكن كنت بظلمك معاي؟

ــ لليوم ..وأنا نفسي ما فكرت بالعيال ... بس ظلمتيني وظلمتي نفسج....

جواهر ـــ في جزء في قلبي ماوصله احد ..جزء ..طول عشر سنوات وانا متطمنه  انه في حالة ركود ...لين هالسنه ...صار في حالة هيجان  ...

ـ تغارين؟

جواهر ـــ اييه ...وودي  اقطع رغد بأظافري ...وليال باسناني.

ابتسمت ــ للحين سالفة ليال مابردت؟

جواهر ــ مايهمني بردت ولا لا ...بس كل بنت قريبه منك تسبب لي  تصدع في جدار القلب ...نفسي اتجول في البيت غرفة غرفة واتذكر الماضي ....هالصالة كنا دايما  نيلس مع خالتيه ...انا اهمز لها كتوفها وانت تهمز لها ريولها ..وكنا نضحك  على حواجبها اللي كانت تتراقص ..كان منى عيني اشوفها  قبل  لاتموت ....بس ...أخوك ذ*حته الغيره والكرهه ..وحلف اني  ما ارووح...

ــ تدريين شطلبت مني قبل وفاتها؟؟

هزت جواهر راسها بلا ...

ـــ طلبت اني اسامحج ...وما افكر فيج ابد لانج صرتي زوجة اخوي ومثل اختي ....طلبت مني هالطلب وهي في آخر دقايقها ...صوت سيارة برع ...

جواهر ــ ما اصدق اني الحين اكلمك ..وبروحنا مثل قبل ...تذكر؟؟ تصورت ان ذيك اللحظات انتهت ....ومالها رجعه.

خذت شنطتها وطلعت ...وكانت ياييه بروحها ...صليت ..وجلست في غرفتي ...أخيرا .....انفردت بجواهر ...أخيير ....اعترفت لي انها للحين مانستني ..ماتدري انها ذ*حتني زيادة بهالاعتراف .....لليوم احسها قطعه مني ..ما أقدر أكرهج ..ما أقدر ..أنا وأنتي تربينا  مع بعض ..ما اقدر انسى عشرة خمس طعش سنه ..واذا نسيتها بكون قليل اصل...جواهر ...

   ((  نسيت كل الخلايق والملا...  وأمسيت حزين ....

       قلبي.. يا دنيا بالحب انكوى ..والسبة  ...جواهر....

       هانت عليهاعشرة عمر مضى..  عشرة ايام وسنين ...

       قالت للغير هلا .. تركتني في ظلام  الهوى صابر ...

       ماهقيت منها الجفا ...اللي كانت لي..  نور العين ...

      جواهر .. قلبي فيج ابتلا ..وقلبج للأسف طلع غادر ...))

******************************

الفصل السابع ....

****************

عطشت في الليل ..وماكان بقربي ماي ..طلعت من غرفتي ..ونزلت المطبخ شربت ماي ورجعت فوق ..

 مريت  غرفة رغد ..فتح الباب بشويش ..

وانصدمت ...كانت ماسكة القرآن ولابسة شيلة الصلاة ونايمه على الكرسي ..

المكيف كان بارد وايد ..وهي بدراعة البيت ..

 خذت غطا وغطيتها وشلت من يدها القرآن ..وحطيته على الطاولة ...مسكينه ..شكلها من التعب ما تحس بحد ..تذكرت الكلام اللي قلته لها قبل ..انها نست ربها  ما اقسى هالكلمات عليها....شلون نطقت بهالكلمات؟؟ رغد ... للاسف انتي خليتني انسان قاسي ...كنت مجرد كاره وعاشق ..مجرد شخص يحب ..ويكره ..القسوة ماكانت من اطباعي ..

تركتها ورجعت لغرفتي ..وحطيت راسي ونمت ..

***

ــ كم رقم  تلفونج؟

ليال ــ  هذا ..

وأعطتني ورقة عليها الرقم ..

ـــ ماباخذج معاي للكل القضايا اللي في المحكمة...بس القضايا اللي بحس انج تحتاجينها ..علشان جذي  طلبت منج انه يكون معاج هالنقال ...شي ثاني ابتداء من اليوم ..بتروحين مشاوير وايده ..وأبي منج  شغل  مضبوط..المشاوير الفايده منها انج تتعلمين شلون تضبطين دورج كمحامية في اي وقت وأي يوم ...بطرشج للسجن المركزي  بعد فترة ..لاتخافين ..لازم هالخطوة ..انا بصنع منج محامية  ناجحة بكل المقاييس.وأتمنى انج ماتخيبين املي فيج ..

ليال ــ حاضر استاذ ...

ــ تفضلي باي لحظة  بناديج  علشان أسلمج هالملف تدرسينه قبل لانروح للمحكمة ..

ــ حاضر استاذ ..

 كلام ليال طلع صحيح ..أنا سألت بعض المحامين اصدقائي عن  اسم ابوها ..وخبروني انه كان متهم في جريمة قتل ..ومحكوم عليه بالمؤبد. لان اهل القاتل تنازلوا عن القصاص القاتل يقتل ..و هو ماكان عنده الدية ...والناس كلها قالت انه  كان مذنب ..فمحد جمع له الدية ..فاهل القتيل رضوا بحكم المؤبد كعقاب خصوصا انه كان عنده بنتين صغار ..اللي هم العنود وليال ..

بساعدج ياليال ..واذا كان ابوج فعلا بريء فالحمدالله اذا  رجعت له كرامته ..لكن اذا فشلت ..للاسف انا  سويت اللي علي ...

ركبت السيارة  واركبت هي معاي ..اجلست قدام ..وأنا ماتكلمت ...ووصلنا لين المحاكم الشرعية..

ـــ تعالي ..بنحضر اليوم محاكمتين ..وأبي منج تشوفين شلون الامور تسير ..عندج ورقة وقلم؟؟

ليال ـ اييه ...

ــ ابي منج تقرير وافي ...أيلسي على الكرسي اللي هناك ..أنا  بروح  عندي تخليص اوراق لازم  أنهييه ..

كانت المحاكمة لرجل ..كان  مرتكب جنايه وذابح  صاحبه .وهو سكران ...

كانت بداية كبيرة على ليال المفروض تبدأ من صغير ...بس مب مشكله لازم اعرضها لها المحاكمة علشان تفهم متطلبات المهنة ..

انتهت المحاكمتين وخلصت الاوراق اللي كنت ياي علشانها ..كانت ليال ساكته ...ولافة ويهها للدريشة ...ندمت اني عرضتها لهاالمحاكمة ,,يمكن كانت قاسية عليها ..

طالعت الاشرطة اللي عندي ..كانت لابو عبده تقريبا ..

حطيت شريط وشغلته ...حركتي هذا كأنها فاجأت ليال ..التفت لي ..ولمحت في عيونها  دمعه ..

ــ كان غلط مني اني خليتج تبدأين بقضية كبيرة مثل هذي ..

ليال ـ يالع** ..أنا استفدت وايد ...معنويا ...تخيلت ابوي  يالس في مكان المتهم ..والقاضي يحكم  ...فهمت الحين لما قلت لي ان هالاشياء كبيرة علي ..حاولت اتخيل نفسي مكان المحامي لكن قلبي تم يرجف بطريقة  ماتحملت انتنفس عدل  خلالها شلون بتكلم وبدافع ..

ــ أنا شفتج في المحكمة من قبل ..وكنت  شجاعه ..بس محاكمة اليوم لمست شي فيج لانها ذكرتج بالوالد..الله يرحمه .

 كان ابو عبده يغني مجموعة انسان ..وسكت انا وليال...

((قالت من انت ..قلت مجموعة انسان من ضد وضد تلقين فيني ..فيني نهار وليل وأفراح وأحزان ..أضحك ودمعي حاير وسط عيني ))

***********************

 مر ثلاثة اسابيع ورغد كل يوم ويهها اصفر من التعب ..

ــ للحين ماطيحتي الياهل؟

 رغد ــ حاولت ..وماقدرت ..دبلت الشغل  ..بس لين الحين ماصار  شي..يوسف خليني نسافر...وأنا بدفع التذاكر ..

ماتكلمت ..

رغد ــ يوسف ..بس يوم ..كنت اض*ب بطني ..بس الياهل ماطاح ..

سكت ..

رغد ــ بحجز حق مصر بتسافر معاي ولا لا؟

لهاالدرجة متمسكة بالاجهاض؟؟  يمكن علشان بعد الطلاق ماتتوهق؟

ـــ بروح ..

وقمت  طلعت ..

فضيت نفسي هالايبوع علشان السفر ..ومريت منال اقول لها ..

كان عندها مها ..وشيخة ..بنات فالح .

منال ــ هلا جوزيف ....

مها ـ هههه حلوة جوزيف هذي يا عمتي ..

ــ هييه انت مالج خص ...

مها ــ حشا عمي شفيك علي ؟

منال ــ أخوي ما يطيق يسولف معاي انا اخته ..تبينه يسولف معاج انتي وانتي السبب في ...

طالعت منال  وأنا معصب ..

مها ــ السبب في ايش؟؟

منال ــ  في الكلام معاه!!!!!

ضحكت ..كانت تغطية منال فاشله مثلها ...

مها ــ زين عمي بارك لي على الاقل ..

ــ ليش انخطبتي من بدر؟؟

مها ــ تدري عيل ليش ماتبارك؟؟ خصوصا انا ملجنا  يوم الخميس ..

ــ ملجتي ؟؟ مبرووك بس محد عزمني لا على الخطبة ولا على الملجة ..العموم مبروك....لج ولبدر ..

شيخة ــ بس  ياعمي ما يسوى ..ريلها مب مزيون  ...

مها ــ أحلى منج يالسبال ..

ضحكت على الغيرة ..

ـــ شيوخ ..عمو اذا كل وحده ماتزوجت الا المزايين شخليتي للمساكين اللي الحلا خلا منهم؟

مها ــ عمي الله يهداك ..فديت بدر والله انه حلو...

شيخه ــ شوفو الخبله للحين ماشافته وتتفداه ..

منال ــ   شيوخ يوزي عن اختج ..وشالكلام يوسف ؟؟

مها ــ صار ريلي خلاص . وكافي شفت صورته عند عمتي منال ...وهو بنظري حلو ...

ـــ حلو حلو ..كلِ  ريقه في حلجه حلو ماقلنا شي ...

مها ــ ؟؟؟؟؟ عمي!!!  ....صراحة زعلت منك ..

منال ــ عمج  يتطمش عليج...

شيخه ــ قصدج يتطنز عمتي ..

منال ــ قصدي يغلس عليها ..صج انج سبال ..بدر الحين مب حلو؟؟ عيل من الحلو؟؟ ابوج؟؟

مها ــ عاشت  عمتي ...عاشت ..صج ابوي حلو في نظري(مع انه مو حلو ) بس كافي  انج نصرتيني ..

قاطعتها ــ أصلا لو اني منج  ما استانس ,..الا أغيير لان بدر كاان يبي منال من ثلاث سنين  وتهاوش هو وجاسم عليها ..وعمتج اختارت جسوم ..

انحرجت منال ومها انصدمت ..

مها ــ الحين بدر كان يبي عمتي؟؟

ــ كانت البنت الوحيدة في عايلتنا ..أكيد الكل كان يبيها كانت حلوة وقمر ..

منال ــ شقصد بكانت ؟؟انا للحيني حلوة وقمر ..

ـــ مش مهم ..عيال عمي تهاوشوا عليها وانتي واختج للحين ماكبرتوا ..مسكين  جسوم طاحت في جبده ..

منال ــ    مش مهم ؟ طحت في جبده الحين؟؟امحق اخو هذا انا واختك الوحيده. ..قلت لكم عمكم ما يحسب حساب احد ..الله يرحم ايام كنت مستغلني فيها ..

ــ مايسوى لي هالغترتين اللي غسلتيهم والخدامة مريضة ..بتمنين علي لين آخر يوم في حياتي ؟؟

ضحكت البنات ..وانحرجت منال ــ لاتنسى جو...

اسكتت ..بعد ما خزيتها بنظرة ..

ـــ بتمن علي بالجوال اللي قدمته لي هديه يوم عيد ميلادي من ثلاث سنين..

مها ــ عمي لاتنسى فضل عمتي منال ...عمي انت تعرف بدر  عدل وأنا استحيت أسأل أبوي ..وعمي منصور مايعطيني ويهه ..شلونه؟؟ زيين؟؟

ــ مافهمت سؤالج؟؟؟ تقصدين بزين يصلح كزوج؟؟

مها ــ اييه ,,

ـــ شوفي ..بدر أنا خاويته من  سنتين في سفر ..وكان خدوم وكريم ..ماشفت عليه شي ...أعتقد انه  ريال زيين كزوج ..لانه وايد محترم نفسه ..

 مها ــ عمي  وانتوا وين رحتوا؟ ماليزيا؟؟

منال ــ هييه يابنت عيب هالكلام ...

ابتسمت ـــ رحنا عمرة بعدين رحنا  الاردن ..كان يبي يحضر عرس صديق له...وأنا مارديته منها سيااحه ..

مها ــ عمي كل اللي يروح ماليزيا يقول انه رايح عمره ..

منال ــ عمج مايجذب يالسبال ..لاتخليني اغير رايي فيج...

ـــ  ههههه لا ..صدق رحنا بسيارة ...

شيخة ــ المفروض يالخبلة ماتحاسبينه على شي سواه قبل الزواج ..الماضي ملكه بروحه ..

 منال ــ بس من هالكلام الماصخ ...حفلة ملجتج  متى تبينها؟؟

مها ـــ خليني أول أجر عمي بالكلام وأعرف عن هالبدر كل شي ..

ــ ليش أنت خلاص صرتي زوجته ..تعرفي عليه ..

مها ــ عمي الملجة كانت من ثلاث أيام بس ..وحضرته حتى تلفون  ما اتصل فيني كل اللي شفته صورة يقول مغصوب علي ..

ضحكت على هالخبله اللي قدامي ــ وانت ليش مستعجله؟؟  لو مايبيج ماراح خطبج بروحه حتى بدون ماياخذ جسوم ولا عبدالرحمن اخوه معاه..

شيخه ــ مسكينه ياعمي على بالها  بيستوي مثل ماصار لرفيجاتها ...

ـــ وشاللي صار لرفيجاتها ؟؟

شيخة ــ حفلة كبيرة يوم الملجة وبعدين  يكلمون بعض ..ويطلعون مع بعض ..

ــ مافي طلعه ..في كلام ...بس ..الطلعه بعد الزواج فلاتحلمين بهالشي ..وبعدين يمكن الريال مستحي  وناطر الحفلة لين يلبسج الدبل والذهب ..

منال ــ  تذكرت شي انت يا يوسف ماسويت حفله لرغد ..الزواج كان  خلال شهر ونص بس ..

ــ أنا وهي اتفقنا وخلاص ..

.مها ــ بس  أنا ما أبي ذهب أبي ألماس ..قوله عمي قبل لايشتري الذهب ..

ـــ مهوي  الغلط  مب عليج على اللي  معطيج ويهه .عن اذنكم ..

مها ـ زين عمي عطني رقمه وأنا أقوله ...

ــ عنبوج  مافي مستحى؟؟ شو تكلمينه هذي؟؟  اذا هو ماكلمج  احتفظي بكرامتج .. والله انكم لامستحى ولابطيخ ..يا بنات هاليومين  المحترمات ..

شيخة ــ عمي يقولون لامستحى ولاخجل ..

ــ جب جب انتي ..يايه تعلميني..مب قاصره انتي الثانية ..يلا اذلفوا عن ويههي ...

تمت تضحك منال ...ــ قلت لكم ..مايداني الحريم الله يعينج يارغد عليه ..

طلعت وأنا ساكت ..كنت أبي سبب أطلع . اووه ..نسيت اقول لمنال عن السفر ...يلا مب مشكله ..كله يوم...

*******

مسكت تلفوني أتصل في  بدر ..

ــ الو السلام عليكم ..

بدر ـ هلا ولد العم ..وعليكم السلام ..

ـــ وينك يالقاطع ..تعرس وأحنا آخر من يعلم,,,

بدر ــ والله اني قلت لعبدالرحمن يتصل فيك ...بس ..السموحه منك يالشيخ ..

ــ يالشيخ!! بدر ..أنا جوزيف نسيتني؟؟

بدر ــ مانسيناك ..بس  نتعذر منك ..يالنسيب ...

ــ ها ..شفت مهوي؟؟

بدر ــ من مها؟؟

ــ العرووس يالخبل ..

بدر ــ اييه ...اعذرني نسيت اسمها ..أنا رحت لفالح بس ابي أخطب ..وما سألت عن البنت ..والحمدالله الامور تحسنت ..

ــ  بطرش لك رقم تلفونها ..كلمها ..ترا البنت ..خايفه لاتكون مغصوب عليها ..

بدر ــ أنا ماشفتها ..كنت بطلب الرؤيه الشرعيه بس استحيت من فالح ..وأمي ملزمة علي الا  اخطب ..تعرف اصغر واحد ..لين شفت فالح مع بنت من بناته ..وقلت في نفسي  نجرب ..والله سهل الامور وملجنا ..

ــ تقنعني انك ملجت بوحده ماشفت ويهها؟؟

بدر ــ اي والله ...عاد قولي ..شلونها؟؟

ــ   مافيها شي بس خشمها شوي عود ..وبراطمها كنها  تكه ..وعيونها تطبيق اندونيسي ..

بدر ــ لا ..لا تقول ..أكيد تطلع على فالح ..وينه وين الحلاه هالريال ..يالله ..والحين شسوي؟؟   .

كان بدر من صجه مخترع ..

ــ عادي  عمليات التجميل ببلاش هاليومين ..

بدر ـ لا والله ..والنسل بالله شلون نتصرف معاه؟؟

ــ اووه قصدك جيل الالفيه ؟؟ لاتخاف  لما بيكبرون بتكون العمليات بالكمبيوتر .,..بدون الم .....

بدر ـ تنكت يا ولد العم؟؟ والحين بنت اخوك شسوي فيها؟

ـــ بنت اخوي تسواك ....كنت أغلس عليك ولا هي ماشاء الله من الجمال  الله  ناعم عليها ..بس ل**نها طويل شوي ..

بدر ــ أبي أشوفها ..

ـــ تعال بيت منال ..أنا توني طلعت منه ..برجع الحين ..فز طولك وتعال هنا ..

بدر ـ بس أنا ما اكلم جاسم ..

ــ اوكيي باخذها بيتي ,,,أشوفك هناك ..

بدر ــ مشكور يا ولد العم ..

صكرت من عنده ورجعت دخلت البيت ..

ـــ مها ..مها ..

مها ــ عونك عمي ..انت هني ماطلعت؟؟

ــ  ايش هذي عونك؟؟ حنا في مسلسل بدوي؟؟

مها ــ لا عمي بس امي دايم تقولها لاناديناها وخذيناها منها ..

شيخة ـ شمعنى ناديت مهوي ؟؟

منال ــ ها اخوي ليش رجعت؟؟

ــ شرايكم أطلع من البيت؟؟

منال ـ لا حياك ..بس ..غريبه طلعت زعلان ..

ــ تذكرت ان مهوي عرووس ..قلنا آخذها معاي البيت ...

شيخه ــ ياليت عمي ..بروح السوق مع عمتي وهي مب راضيه ...وطرق بيتنا بعيد والوقت بيمر علينا ..ومانلحق ..

مها ــ يمه منكم بس تبون تفتكون مني؟؟

منال ــ كلام شويخ صحيح ..هي تبي السوق وأنا ابي اييب شي للبيبي ..لازم ..قبل لا اثقل وما اقدر اشيل نفسي ..

مها ــ امي تقول مب زين نتشرى للياهل قبل ان يي ..فال مو زين ..

منال ــ عيل تبيني بعد ما اولد أتحوط في السوق؟؟ مابيكون عندي حيل اطلع والياهل  وين احطه وهو عريان ماعنده شي يلبسه علشان الفال؟؟

ضحكت شيخه ..ــ وييه ..طاح ويهج ..شيليه شيليه ....

ـــ بس عاد ..يلا مها ييبي عباتج وتعال السيارة بسرعه ..

مها ــ زيين عمي ..خلينا نستانس مع زوجتك ..اللي مانعرف عنها شي ..

سكت وطلعت .. اتصلت في رغد ..

ــ الو..رغد ..

رغد ــ نعم يوسف ..

ــ بيوننا ضيوف ..جهزي الجاي والعصير ..أنا بمر أييب العشا ..اوكي ؟

رغد ــ حاضر ..

ـــ رغد ..جهزي الصالتين مع بعض ..

رغد ــ ليش بيون حريم؟؟

ــ لا ..مها ..بنت فالح ...

رغد ــ شفيها المها؟؟

ــ ملجت ..وريلها يبي يشوفها قبل الحفلة ومستحي من فالح ..فقلت اخليه يشوفها ..

رغد ــ فهمت ...هي تدري؟؟

ــ لا ..ماتدري ..جهزي لها بدله  راهيه ..لانها لابسه دراعه   كانت عند عمتها..وتعرفين سوالف الحريم ..

رغد ــ فهمت ..

صكيت من عندها وشغلت المسجل ..وكان أبو عبده يطرب ..

((ليت ربي ماكتب لحظة وداع ..ولافراق ولادموع ولاضياع..ليت كل الناس خل مع خليله ..وكل ماقالوا  النهايه الفراق ..قلت أحبه حيييييييييييل ....

كلما أدفن خياللك ياعنيد ..تمطر الدمعه وينبت من جديد ..

شفت وش سوى بي حبك يابخييل ...))

مها ــ سوري تأخر عمي  ..بس شوي ادبت شيوخ ..

ــ لايكون طقيتيها؟؟

مها ــ عمي .. انا أطق؟؟ الله يهد*ك ..انا أ**ر العظام  ..

ــ عاشت بنت اخوي..

مها ــ الله  يسلمك ..

طلعت الشريط ..

مها ــ عمي  من يسمع محمد عبده؟؟ الله يهداك عمي ..عاصي الحلاني موجود وانت تسمع  هالاشكال ..

ــ حدج ..بوعبده ماارضى عليه انتي وهالاشكال اللي يبتيها معاج