Episode 9: Insaf
588 Words
Office ke andar ka sannata itna gehra tha ki Manager ke maathe se tapakne wale pasine ki boond ki awaaz bhi saaf sunayi de rahi thi. Aryan ne kursi par baith kar apni Platinum watch ko halka sa adjust kiya aur phir apni nazren dheere-dheere Manager ki taraf uthayin.
Manager ke haath mein Aryan ka wo 'Black Card' ab bhi thar-thara raha tha. Usne card par likha naam padha—ARYAN.
Ek pal mein, Manager ki aankhon ke saamne kal raat ki saari tasveerein ghoom gayin. Wahi fati hui shirt, wahi tootne wala mobile, aur wahi ladka jise usne apne boot se thokar maari thi.
Aryan ne ek thandi muskurahat di aur pucha, “Yaad hai mujhe?”
Manager ka chehra ekdam safed pad gaya, jaise uske jism se poora khoon nichod liya gaya ho. Uske muh se ek lafz nahi nikla. Paas hi khada wahi security guard, jisne Aryan ka collar pakad kar use baahar phenka tha, ab dar ke maare apna sir jhuka kar zameen dekhne laga. Uski himmat nahi thi ki wo Aryan ki aankhon mein aankhein daal sake.
“Sir... main... mujhe maaf kar dijiye... mujhe nahi pata tha ki aap...” Manager ne haklaate hue rone wale andaaz mein kaha.
Aryan kursi se utha aur Manager ke bilkul kareeb ja khada hua. Uske mehenge suit ki khushbu Manager ke liye kisi maut ki saza jaisi lag rahi thi.
“Aaj main tumhe is naukri se nikal raha hoon,” Aryan ne thahrav ke saath kaha. “Sirf tumhe nahi, balki har us guard aur har us employee ko jisne kal raat insaniyat bhula kar sirf meri gareebi ka tamasha dekha tha. Tum kal se is complex ke aas-paas bhi dikhayi mat dena.”
Manager ke pairon tale zameen nikal gayi. Wo gir-girane laga, par Aryan ne ek ishara kiya aur naye bodyguard (jo showroom se uske saath aaye thay) ne unhe baahar ka rasta dikha diya.
Maanvi ye sab dekh kar darr bhi rahi thi aur hairan bhi thi. Use laga tha Aryan ab bas gussa dikhayega, par Aryan ne ab jo kiya wo Maanvi ki soch se bhi pare tha.
Aryan ne Maanvi ki taraf dekha, jo ab bhi wahi purani jeans aur top mein khadi thi. Wo ladki jisne bheed ke saamne Aryan ko bachane ki koshish ki thi, bhale hi wo nakamyab rahi thi.
Aryan ne manager ki table par rakhi registry uthayi aur do bade villas ke papers par sign kiye.
“Maanvi... ye do Villas tumhare huye. Aaj se tum inki malkin ho,” Aryan ne wo papers Maanvi ki taraf badhate hue kaha.
Maanvi ki aankhen phat gayi. “Aryan... ye tum kya keh rahe ho? Do villas? Inki keemat 20 crore se upar hai! Main ye nahi le sakti.”
Aryan ne uske haath mein papers thama diye. “Maine kaha na, ye insaf hai. Kal tak tumne mera sath diya jab mere paas kuch nahi tha, aaj jab mere paas 'Anant Shakti' hai, toh ye tumhara haq hai.”
Maanvi ki aankhon mein aansu aa gaye. Use samajh nahi aa raha tha ki wo khush ho ya is badle hue Aryan se dare. Aryan ne apne goggles wapas pehne aur bahar khadi apni Lamborghini ki taraf badh gaya.
Uski 'Anant Shakti' ne aaj pehla bada hisaab chukta kiya tha, par Aryan ke zehan mein ab bhi un logon ke chehre thay jinone use bheed mein thappad maare thay.
- Writer
