Dahan-dahan kong binuksan ang pintuan ng kwarto niya at saka ako sumilip. Nakita ko si Don Santillan na nakaupo sa ibabang parte ng kama habang nakadikwatro. Hawak niya ang remote control ng TV at nakasuot siya ng bathrobe na kulay itim. May damit kaya siya sa ilalim no’n? Sana naman. Kung wala naman, sana’y mahigpit ang pagkakabuhol ng tali ng bathrobe niya hindi tulad ng pagkakatapis ng tuwalya ko kanina. Baka may mangyaring hindi na naman kanais-nais na eksena sa pagitan naming dalawa. Mukha kasing katatapos niya lang maligo dahil basa pa ang buhok niya.
Tumingin siya sa ‘kin at pinatay ang TV at pagkatapos ay binaba niya ‘yung remote control sa tabi niya. “Come in. Sit here beside me.” Umurong siya para bigyan ako ng espasyo sa tabi niya. Ibinaba rin niya ‘yung paa niya nakadikwatro.
