ان الموت حق
2333 Words
#أهدتني_عاراً
نورا ناصر
5
هل أخبرتُك يومًا أنُّه كان للوقت طعمٌ ورائحة ولون مُنذُ أن عرفتك، هل أخبرتُك يومًا أنّني كُنتُ أرى الكون رماديًا وأنّك سكبتَ عليهِ ألوانًا ما كُنتُ أعرفها، هل أخبرتُك يومًا أنّك عبرتَ بحيَاتي كشمسٍ أشرقت على مدينة لا تعرفُ الشمس؛ وكطائرٍ حطَّ على شجرةٍ عاريَةٍ ذاتَ شِتاء.. هل أخبرتُك يومًا أنّك الحنين الذي كان يَزورني دون أن أعرف لمَن؛ وأنّك الحُزن الذي ينتَابني دون أن أدري لماذا، هل أخبرتُك يومًا أنّك بتّ الهواء بالنسبة لي والماء وأنّني أحيَاكَ غيَابيًا حتّى ينهي الزمان حُكمه علينا بالفُراق مدى الحياة.. ❤️
جنه :
وكع الخبر عليه مثل الصاعقه الي توكع على اي شي وتحرگه اني حرگت روحي وقلبي ومصدكت لا شنو يموت مستحيل يصير هيج
بلحظه فقدت ايماني ونسيت ان الموت حق
يمه تشاقين وياي
اباوعلها تبجي
درت على مها كولي شسالفه كولي مها عفيه
مها :علا خابرت كالت مدعوم بالدراجه.
جنه :يعني مات لو بعده بي روح گووولي
مها :مات جنه مااات.
صرخت يمه وظليت املخ بروحي وشمرت نفسي على امي اجرجر بملابسها كتلهه يمه حبوبه لاتكولين ميت كولي انشل كولي تعوق ارضى بي ومااعوفه بس لاتگوليلي مات الله يرضى عليج يمه.
امي حضنتني وخلت راسي بحضنها وتبجي ومنهاره مثلي واكثر هي كلش تعز سامر وتحبه
بقينه على نار كل شويه اريد اكوم اطلع من البيت للشارع واروح لبيتهم وحدي وهم يلزموني.
واصرخ اكولهم ودوني اله وينه هو هسه وبيا حال وشلون مات حتى مااعرف شلون مات
امي كالت حادث بالدراجه مالته
كله مني اني هو جاي الي اني تسببت بموته
بعدها كلت لايمكن جذب يجذبون عليه يمكن بعده بي روح ممعقوله يموت بهالسرعه.
بهالاثناء ااجه اخوي احمد شافنه بهالحاله
كتله احمد كلي ماميت سامر عفيه گلي
احمد :هذا حضج جنه بعد شسوين
جنه :وديني احمد فدوه وديني هسه لبيتهم
احمد :يلا اروح اجيب ت**ي يوصلنه
مها جابتلي دشداشه سوده ولبستني وانطتني عباية راس لفيت روحي.
اجه احمد وكال يلا الت**ي بالباب طلعنه من البيت وصعدنه بالسياره مكدرت اكتم شهگاتي ووبجيي
طول الطريق ممصدكه اوصل واتاكد منه صدك ميت مستحيل يمكن بي شي مبتوره رجله ايده يبعد ايدي بس كون ما ميت كافي نفسه بالدنيا.
اول ماوصلنه البيتهم جانوا استوهم جايبين التابوت اني هنا انهاريت ومابقت قوه بيه من شفتهم ينزلونه من السياره.
ولهسه الامل بداخلي اكول يمكن مو اله هذا التابوت لجيرانهم احد مو اله مااكدر اصدك.
بس شفتهم فوتوا للبيتهم نزلت بسرعه من السياره وعفت امي و رحت امشي وحدي اتعثر بمشيتي وابجي واتكى ع السياج مابيه امشي
لحد موصلت للبيت شفت الناس كلها ملتمه وتبجي صوت الصريخ والبجي ** اذني.
الناس هوايه واني اريد اشوفه واودعه الوداع الاخير بس مگدرت الناس ملتمين على تابوته.
وظلن النسوان يردن يفتحنه فشالو بسرعه
شفت عمتي ام سسامر تريد تطلع وره التابوت شمرت روحي عليها وظليت اصرخ
وهي هم حضنتني وظلينه اثنينه نصرخ واللتموا النسوان علينه ووكعنه بالكاع.
حضنتني وتبجي وتحجي
هاا يعزيزة سامر ها ياحبيبة سامر راح يمه راح
راح منج ومني شكد يحبج شكد يحجي بيج
راح بعد مااشوفه ولا انت تشوفينه.
جانت كلماتها وخاصة من كالت بعد متشوفينه تقطع روحي تمنيت اروح ويا بالتابوت ولااعيش بدونه.
اجوي بناتها الها كلولها يله يمه تره راح يرحون يدفنونه لحكي
كامت وهي تحجي وتبجي وعبايتها كلها تراب
تمسكت بيها اله اروح وياهه شاف*ني امي
كالت وين ترحين ييمه
يمه اريد اودعه اني ماشفته الي حق اشوفه
همست الي ولج خوانج مايقبلون ابقي هنا يمه راح بعد مايرجع.
عاندت اله اروح
عمتي سحبتني من شافت رفض امي وكالت خلي يشوفها اخر مره هو يحبها خلي يرتاح بشوفتها
رحت وره عمتي وصعدنا بسياره ستار**
بيها اخو وخاله وولد عمه.
صوت الانين والبجي ملئ اذني ودموعي شلال وحراره بجوفي تخليني احس انه اني بجحيم
الطريق طويل من البصره للنجف البجي بالسياره ماوكف وحجي عمتي يبجي الصخر وهي تنعاله
كل الي جان يشغل فكري شون راح اعيش بدونه شون ابدي من غيره.
مر شريط ذكرياتي ويا من جنت اروح ويا امي لبيت علا واشوفه يبقى اباب بيتهم من نفوت لحد مانطلع جان يكول لرجل علا بس اشتغل واجمع كم فلس اخطبها وتجي علا تكولي واني افرح من صدك حبيته
مها تكولي ولج حييل اسمر راح تصيرين انت ويا حليب وككو.
اكول الها ميخالف اريده بس ضحكته تخبل.
اجه خطبني ماطلبنا مهر هواي ولاتشرطنه عليهم قبلت بكل شي ومهتميت لشغله الي ميحصل منه هوايه ولافكرت ماعنده سياره بس دراجه يروح بيها لرزقه وبشغله بالسقوف الثانويه.
من يجي يجيبلي جبس ونستله افرح ونكعد ناكل اني ويا عندي بالدنيا وشكد افرح ماردت بس اعيش ويا بسعاده مجنت اشوفه اجمل مابالدنيا لا بل جنت اشوفه دنيا بحالها وكل الي بيها حلو خاصة هو جان طيب ويحترمني يخاف عليه ويقدرني هوايه.
ابد مافد يوم تصرف وياي تصرف محلو
كل يوم جان يكبر بعيني بس مامقسوملي وراح من ايدي وهو بطريقه الي.
وصلنا للنجف قبل الفجر بشويه. وهو سوده عليه بعده ينزف نزلنه بالمغيسل ومره ثانيه غسلوا.
امه **مت اله تشوفه دخلونا اني وهي واخو لازمها ويمشيهه واني اجر روحي جر كوه امشي.
ف*نه جوه دخلت وكانه هنا انسلبت روحي جانوا مخلينه على الدچه ومكفنينه لافين كصته بوصله بيضه باوعتله معبالك ميت لا وكانما نايم بسلام.
صعب تشوف الي تحبه وهو بهالحاله مابي نفس ميت وهيج موته مؤلمه وجهه مجرح بس ملامحه مبينه. كانه مبتسم.
امه حاجته وبعدها اني خاني التعبير مكدرت انطق بشي غير العتاب
سامر اروح فدوه لسمارك ليش تعوفني نص الطريق مو ع اساس نكمل سوه نعيش سوه ونموت سوه
ليش سامر شللون راح اعيش بدونك اني.
تبقى بـ قلبّي مهما خذاك البعد
جانت اسوء لحظات حياتي احساسي مثل الي صعدت على ص*ره شاحنه كبيره وبقت جاثمه ومتتحرك
واندفن سامر جوه التراب اندفن شاب بعمر 25سنه مشاف من حياته شي خلاني وخله امه وراه ام ثكلى وحبيبه مجروحه ويائسه.
ورجعنه للسياره وطول طريق متعب وطلع اول صبح واني وسامر مو سوه.
وصلنه وقت الضحى للبصره ولبيت اهل سامر واحنا منهاريين.
جان البيت بي ناس اخذتلي ركن وكعدت بي
واسمع نسوان قريبين مني يحجون
يكولون يا هي خطيبته شكد حلوه وبعدها زغيره
وحده تكول اي حلوه وبعدها زغيره هسه بسرعه تزوج وراه.
جنت بقوى منهكه بس حييل تأثرت بكلامهم تمنيت اردهم بس ماابيه اني بيا حال وهم يحجون هيج
ليش يشمرون حجي قبل لايتاكدون منه يجرح او لا.
بعد ساعه اجت علا اختي وكعدت يمي واني مثل صنم وبس دموعي تنزل على خدي مثل حنفيه مفتوحه عمري مابجيت هالكد.لزمت ايدي وكالت
علـاـ : جنه حياتي كومي بدلي مللـ بسج.
جنه : مارديت عليها
علا :يله حياتي فدوه العمرج كومي اخذج البيتنا انطيج ملابس مني بدلي ورجعي.
جنه :مااريد علا وخري عني.
علا :اووف سوده عليه عمري جنه لتسوين بنفسج هيج.
جنه :بقيت بس اباوع بعيوني وساكته والدموع تنزل.
اجت امي ومها وعذراء وكعدوا يمي وهم يبجون
علا :يمه قنعيها خليها تكوم تبدل شوفي ملابسها كلها تراب
الام :يمه جناوي كومي بدلي ملابسج كلها تراب مقبره موزين تبقبن بيهم يلا حبيبتي.
جنه :كوه قنعوني واخذتني علا لبيتهم بدلت بغرفتها ورجعت لبيت سامر
وكعدت يم امه ابجي واسمع صوت امه وهي تنعى وخواته وبواجيهم حسيت مو بس اني فقدته سامر جان طيب ومحبوب.
مرت 3ايام الفاتحه جنت احس بفراغ جبير ومتعب بكل لحظه جنت اشتاقله.
بيوم الثالث سوو اله صينيه بيها شموع وحلويات وخلوا صورته بيها وقروا عليها سورة ياسين وحديث ال**اء.
جنت اباوع للصوره بس ممصدگه ميت احس الصوره تحاجيني تضحكلي بس مو ميت.
خلصت الفاتحه ورجعنه للبيت مريت بايام صعبه نفسيتي تدمرت كلش تجيني حالات ابجي بصراخ يوصل صوتي للجيران حتى ابوهم ينقهر عليه ويدز بناته يمي يواسوني.
احس اعتزلت الحياة والدنيا كلها ومالي واهس حتى اتنفس.
فد يوم جتي امي الي واني بالغرفه كالت هذا ثامر(اخو سامر) يريد يحجي وياج.
اخذت التليفون من امي وحاجيته
الوو
ثامر :الو هلو جنه شلونج
جنه :على الله
ثامر :جنه انت عزيزة سامر وسمعت بيج تعبانه على فراقه خابرت حتى اطمأن عليج.
جنه : الحمدلله على كل حال
ثامر :الحمدلله هذا امر الله شنسوي كلنا خسرنا بس انت ديري بالج على نفسج.
جنه :الله كريم
ثامر :اذا محتاجه شي كولي اني بخدمتج
جنه :ماتقصر ثامر الله وياك
ثامر :الله وياج.
جنه: مرت يومين على اتصال ثامر جنت كاعده بالغرفه ونفس حالتي رن تليفوني شفته رقم ام سامر فتحت خط
الو شلونج عمه شون صحتج
ام سامر : ولج انت بيا عين تخابرين ثامر وتحاجينه موتي سامر ظليتي ادكدكين على ثاني تردين تموتينه يالبومه يالفكر لو ماانت السبب بموتت سامر جان كاعد يمنه وكل ساعه تخابرينه يلا تعال ويلا تعال لحد مااجاج واندعم والله اذا سمعت بيج مخابره على ثامر بعد لااجيج للبيت اجرج من شعرج اسحلج سحل افتهمتي.
جنه : انت لأن ام سامر مراح ارد عليج بس ابنج هو الي اتصل عليه مو اني.
وسدته ماانطتني فرصه احجي اخذتني حاصل فاصل.
موتتني فوك مااني ميته ظليت بمكاني اصرخ وابجي
اجو امي ومها وعذراء يركضون الي نمت بحضن امي واشهك كتلها يمه ليش يصير بيه هيج اني ليش.
ظلت تمسح على شعري بحنيه
الام : ييمه انت لااول وحده ولااخر وحده يموت خطيبها بعدج زغيره والايام كدامج اصبري الله مع الصابرين ليش سوين بنفسج هيج.
جنه :كمت من حظنها كتلها يمه بس اني غير اني سبب بموتة سامر جان جاي الي.
مها :ليش تكولين هيج جنه حبيبتي هذا قضاء الله وقدره موزين تكولين هيج هذا اعتراض على ارادة رب العالمين.
الام :يمه كومي غسلي وجهج وارتاحي حتى نطلع شنو رايج اخذجن نتونس المكان الي جنه تريده ؟
جنه :مااريد يمه اريد انام عوفوني لوحدي.
مها :احنه راح نطلع انت كومي توضي صلي ركعتين واهديها لسامر حتى هو يرتاح وانت هم ترتاحين.
جنه :هزيت براسي وكمت توضيت ورجعت للغرفه فرشت سجادة الصلاة وكعدت اصلي واقرا قران واهديها لروح سامر.
بقى كلام امه يرن باذني يعذبني
مرت 40يوم على وفاته بيوم الاربعين سووله ثواب بس اني مكدرت اروح بسبب كلام امه الي اخر مره.
خابرت علا وحاجيتهه
علا رحتي لاربعين سامر
علا :لا مارحت والله بس عمتي راحت
جنه : اي ماسمعت شي ماحجت شي ؟؟
علا :لا بس خواته كالن محاجيات امه ومعاتباتهه شون حاجيه وياج هيجي.
جنه :اني صح مارحت للاربعين مالته بس نصبتله مأتم بروحي وبقلبي وماراح انسى للموت.
علا :حياتي الله يعوضج ان شاءالله
جنه :مااريد تعويض اريد الله يصبرني على فراگه.
علا :ونعم بالله. شنو رايج نسوي سفره نروح لخطوة الامام علي ناخذ عشانه ونصلي هناك حتى ترتاح نفسيتج
جنه :اني اريد اروح ازور قبر سامر بلكي ارتاح هم
علا :اي حبيبتي بس خلي يرجعون هم مو االبارحه طلعوا زياره اله
جنه :من يرجعون كليلي حتى اروح اني
علا :ان شاءالله حضروا نفسكم اليوم اروح للخطوه العصر ماشي.
جنه :زين.
ختمتها وياهه ورحت قنعت امي تاخذني للنجف ازور قبر سامر
كالت ميخالف بس خلي يرجعون اهله.
دخلت للغرفه ولزمت تليفوني شفت مسجات من ثامر
هلو جنه ليش مااجيتي لثواب الاربعين مالت سامر انت تدرين امي گلبها محروك وحيل متأثره حجت هالحجي مو من كل قلبها جان جيتي لخاطر سامر.
مارديت عليه وانطيته حضر لا تصير سالفه ثانيه اكبر
العصر اجت علا وزوجها دياخذونه للخطوه
عذراء ظلت تتوسل بامي حتى تقنع محمد تروح ويانه.
هي حامل وحملهه مهدد بالاسقاط وهو مايقبل تطلع يخاف على ابنه.
كاعدين بالمطبخ اني ومها وامي جاي نحضر العشا للروحه
وهي لازمه امي وتتوسل بيها
خاله فدوه كليله خلي يخليني اروح
محمد :كضي كاعج عذراء الطريق طويل لايصير بالطفل شي
عذراء :اي هي كلها سوالفك انت ماتصبر وتسوي حركات عنيفه من تتقرب احسن الك هيج شنو اني احرم روحي من الطلعه.
محمد :اششش عيب شهالحجي كدام البنات بعدهن مامتزوجات .
امشي كدامي يالله امشي.
جنه ومها يتبادلون النظرات ويضحكون
الام :يمه محمد خلي ناخذهه مكان بي بركه بلكي الله يثبت حملهه.
عذراء :اي والله صدك اروح ادعي هناك الله يثبت حملي بجاه الامير.
محمد :يمه اخذيهه بس على مسؤؤليتج صارلي سنتين انتظر هذا الطفل مااريد يصير بي شي.
الام :اي يمه اطمأن الله يحمي ان شاءالله
محمد اللتفت لعذراء عض اصبع الشهاده وكللهه اخخخ منج زعطوطه ولاتكبرين.
وطلع من المطبخ.
الام :يلا عذوره روحي بدلي ولاتلبسين كعب عالي وعلى كيفج امشي
عذراء :صار خاله.
كملنا تحضير وطلعنا
علا :فدوه جنونه شهالجمال تخبلين صايره احلى من قبل وراجع الماي وجهج
جنه :اي اكلي بعقلي حلاوه.
علا : لا ولج صدك مو جذب.
رحنه للخطوه ودخلنه للجامع صلينه وطلعنه تعشينه ورجعنه للبيت.
شويه تغيرت نفسيتي بعدها بايام اخذنه احمد اني وامي للنجف وزرت قبر سامر كعدت يمه وبجيت كتله اذا اني السبب بموتك سامحني گلبي مامرتاح.
ورجعنه للبصره.
بعدهه بكم يوم دخلت للمطبخ مها جاي تخابر ووجها يضحك سدته وكالت
مها :اريد اكلج شي يفرحج
جنه :كولي ياالله شنو هو محتاجين فرحه
مها :فهد راح يجي يخطبني
جنه :صدك بعد عمري الف مب**ك
مها :اي قبل بيه يكولي احبج ميهمني بس روحج.
جنه :انت نيتج صافيه والله يحبج انطاج على كد نيتج.
مها :الحمدلله باجر راح تجي امه
جنه :الحمدلله الله يهنيكم.
يوم الثاني اجت امه وشافتها اني ماطلعت الهم مها تكول مبين موعاجبها وضع رجلي بس فهد كايللها معليج بامي احنا راح نسكن بيت وحدنه.
وتمت الخطبه وكل شي تمام
بيوم الحفله لبست بدله سوده بينصل كلها تلمع
من جنت اقدم الماي للمعازيم سمعت اهل فهد يكولون هي اختها احلى منها شبي فهد يحضي لو خاطب هي مو احسن من ذيج ماتمشي زين.
باوعتلهم ورفعت حاجبي كالهم الحب اعمى يحضي ضحكوا وداروا وجههم.
مها حلوه حنطاويه وعيونها كبار ملامحها كلها حلوه شعرها وجسمها وكلها نازكه وبالحفله طلعت تجنن بفستان لونه وردي على بصلي. فهد مو كلش حلو بس شكله مقبول.
وهي مرت سنه ونص على حادثة سامر
تقدمولي هوايه بس رفضت وخاصة حماهه لمها بس رفضت
ثامر شايف اختي وهم محاجيهه عليه كايل الها اذا اخطبها توافق اني كتلها ابد مستحيل الغربه مااقبل بيهم بعد مو اخو سامر.
عذراء ومها ولدو وصار عدهم ولد.
واني بقيت عازفه عن الزواج وماافكر بي ابد خايفه خاصة هوايه سمعت حجي من ام سامر
تجي لبيت اختي علا وتحجي وعلا فطيره كلشي تحجي كدامي او اني اسمعها تحجي لامي
تكول حضنه هذا ابنه مات ومن هالحجي
فبقيت متخوفه.
فد يوم كاعدين بالهول كلنه جان بحضني يوسف ابن محمد جاي العبه متعلقه بي وهو هم يحبني ويا انسى همي.
محمد :هله باختي جنونه ولج شون جايبلج عريس تعاي نزلي كعدي جوه خلي اسولفلج.
جنه : محمد مااريد اتزوج منو كلك اريد عريس اني بالله سد الموضوع دخيلك.
محمد :وليش ماتردين تتزوجين بالله شتنتظرين سامر يرجع ماراح يرجع سامر من گبره تره.
جنه :محمد لاتجرحني كتلك مااريد ازووج
نزلت يوسف من حضني ورحت اركض للغرفه واسمعه يكول
موبكيفج افتهمتي لو لا.
ظليت ادردم واني امشي بالممر اريد اروح للغرفه
دروح والله ولا اوافق يريد بس يخلص مني عبالك كاعده على كلبه
للحكايه بقيه.
لا تكن سجيناً لِماضيك ، لَقد كانَ درساً فَقط ولَيس حُكماً مُؤبداً ..!!
......
مو اول البارحه نزلت الكم بارتيين ?البارحه جانت استراحه.
- Writer
