أهدتني عاراً

عينيها تفتك بقلبي فتكاً فهي تشبه عيون من اهدتني عاراً

#أهدتني_عاراً

بارت 7

نورا ناصر

عينيها تفتك بقلبي فتكاً وترديه غارقا في قسوته

فهي تشبه عيون من اهدتني عاراً ....

عندما تشعر أن نبضات قلبك بدأت تتزايد .. ?

حين يقترب منك أحدهم .. إرحل .. !

عندما تشعر بأنك تغار على أحدهم دون سبب منطقي .. إرحل .. !

عندما تنتظر سؤال أحدهم عنك .. إرحل ، ،

لا تنتظر سؤاله

ولا تسأل نفسك لماذا تنتظر سؤاله ..

الإجابة معقدة ، ،

وإن عرفتها ستتعدد الأسئلة !

الرحيل الآن هو الإجابة الأفضل !

عندما تبدأ التلعثم بالحديث مع أحدهم .. إرحل .. !

عندما تشعر بأن فلان مختلف .. وأن القصة مختلفة .. إرحل .. أرجوك إرحل مباشرة .. إرحل دون أسباب ..

صدقني إنه الوقت المناسب لمغادرة المكان بسلام ..

ربما تكون الفرصة الأخيرة للسلام !

أنت لا تمتلك قدرة على عضلة قلبك ولكن بإمكانك تحريك عضلات قدميك وبإمكانك أن تلوح بيد*ك مودعا .. !

إياك وميل القلب بعضهم لا يعرف عن " الميل "

سوى أنه وحدة لقياس المسافات!

أن ترحل الآن ستختصر كم هائل من التفاصيل

وصوت ضحكته ونبرة حزنه وبكاء قلبه

ستختصر كم هائل من الذكريات والوجع ..

أنا أعلم تماما أنك لن ترحل ..

و أنك ستتجاهل هذا النص ولن تنصت إلي

لأنني مثلك لم أرحل حينما كان علي الرحيل ..

على أية حال إحتفظ بهذا النص فقط ..!

................أهدتني عاراً

نورا ناصر ..................

جهاد ..: اي وبشر شطلع ويا حمامه غراب؟

فؤاد ...: مامسافرين يعني بعدهم بالعراق.

جهاد . ... :والمطلوب مني شنو

فؤاد ... :ندور عليهم ياخويه تره الناس كلت وجهنه عيب بس اهلها يدورون وهي محسوبه علينه وجانت ابيتنه.

جهاد ... :ماادور على عار اني ويله ابو حسوني لاتعكر مزاجي اريد اروح اشوف المره.

فؤاد ..: يابرودك يااخي ولك والله لو غيرك يحفر الكاع ويطلعها جهاد مجنت هيجي شغيرك انت هسه نسيت من امي كلتلك عدها ميانه ويا عامر شسويت مو كلبت الدنيه و**رت الغرفه على راسها ووديتها لاهلها هسه شبيك متكولي انت شنو ليش هيج متغير ؟؟

جهاد ... : كتلك مادور على عار خلي اهلها يدوروها

فؤاد ..: اهلها مبقو مكان بغداد حفروها حفر حتى محافضات هم دورو ماكو فص ملح وذاب.

جهاد ... : للجير ..

فؤاد ... : اخخخ اني محترك دمي وانت ابرد مايكوون

جهاد ... : يلا لاتاخرني اريد اروح اشوف المره

فؤاد .. : انت ليش ماكلت راح تخطب حتى نجي وياك

جهاد ...: ماكو شي رسمي يمكن باي لحظه اغير راي واكول مااريد بس هيج رايح اشوفها

فؤاد ... : والله انت مستعجل دنلگي رؤى بلاول

جهاد .. : واذا لكيتها قابل راح ارجعها

فؤاد ..: لا مو هيج بس الاحسن نلكاهه الاول ولاتنسه الي نهزمت ويا ابن عمك

جهاد .. : اي عود يصير خير لم ما تلكوهم انتوا

فؤاد .. : داحجي وي قالب ثلج لو اعرف شبيك جهاد شبيك ولك انت مو رجال عرضك نايم بغير حضنك وانت ولاابالي اني مهتم اكثر منك

جهاد ..: اني ممهتم اي ممهتم محد يعرف بيه شضام بص*ري فقدت اعصابي عليت صوتي سديته بوجهه ميعرف الي بداخلي من نيران مشتعله لشوكت الناس تحملني الي صار الي مثلي بهاليوم يفرح رايح يشوف اله مره اني اعاصير وهايجه بروحي من قلق وخوف من تكرار الخيانه والغدر

دقايق واتصل بيه محمد اخذت التليفون وركعته بالحايط ت**ر ووكع

روووح انت الثاني بطرانين انت واختك.

اريد ابرد ماكو كدامي بلازما ويمها تحفيات ومزهريات سحبتهه ووكعتها تطشرت كلها وصارت فتات.

احس نار واشتعلت بيه اندكت باب الشقه عرفته محمد ماافتحته بقيت اجر نفس اريد ارتاح احس اختنكت

استمر يدكدك ع الباب

تن*دت وكفت كبال المرايه عدلت ملابسي وشعري وفتحتله.

دخل ظل يباوع للشقه مهوسه وفتات االزجاج كله بالكاع

محمد متفاجأ .. : خير سيدي صاير شي.

... ماكو شي محمد ليظل بالك

... بس سيدي

... ماكو شي محمد لاتلح بعصبيه

رجعت تن*دت كملت كلامي ماكو شي بس تعاركت ويا الضابط.

... ماتسوى سيدي كل هالعصبيه

... شون ماتسوى الضابط نرفزني والله تعبان يعني متعرف شلون الطريق صعب والجو حار ودوخة المركز خلي ارتاح من الطريق واني،اصير يوميه خفر مو اول مااجي يردوني خفر واني اليوم خفر يعني ميصير هسه بس اني ملازم

محمد بتلعثم .... زين سيدي اكعد او ارتاح

...جهاد :لا ميحتاج خلينه نطلع هسه.

نزلنا اني ويا وصعدنه بسيارتي وورحنه على بيتهم.

مبين زغير وشويه قديم وبسيط كلش بس نضيف حييل.

استقبلنا اخو الثاني وعرفني عليه كلي هذا اخويه احمد.

سلمت عليه ورحبوا بيه ودخلوني جوه بالاستقبال

كعدت شويه سولفنا

ترخص محمد وكال راح اصيحلهم واجي

بعد اكثر من عشر دقايق دخلت ام محمد سلمت وجانت وراهه لبنيه تمشي وهي مدنگه.

*جنه

صارت ساعه 5ونص العصر كال احمد وصلوا

طلع لحتى يستقبلهم.

خواتي وعذراء لزموا الشباك وظلو يطلطلون وحتى امي والجهال وياهم كلمن خذاله فجه وظل يباوع

واسمعهم يتهامسون

اي والله حلو صدك يشبه عمار كوسوفي ياعيني شون مرتب.

شوقوني اشوفه بس بقيت كاعده كبريائي منعني مااريد ابين الهم اني مستقتله عليه.

ظليت بمكاني احوس.

دخلوا وره دقايق اجه محمد صاحني اني وامي

لحتى ندخل تقدمت امي كدامي واني وراها وعيوني ع الگاع مارفعتها استحيت كلش.

كعدت مقابيله اني وامي وظلوا يحجون اول 20دقيقه اني مارفعت راسي كلش ولاشفت وجهه ابد.

بعدهه تشوقت اشوفه رفعت نظري شويه وظليت استرق النظرات وابصبص كاعد منتجي على القنفه باريحيه .

مجان يباوعلي ابد ملتهي يسولف ويصغي الهم

انتبهت عليه لابس قميص جوزي بنطرون بيجي ساعه ذهبيه.

انيق جدا.

استمرت نظراتي بإتجاهه اباوعله شويه وادنك بس ولامره اللتقت عيوني بعيونه.

مبين ثكييل حييل وبارد ممهتم اصلا لوجودي ولا كانما جاي يشوفني.

كل شويه يباوع لساعته ويشوف الوقت ويرجع يعدلها ويعوفها ايدينه بيض بس وجهه حنطاوي يمكن من شمس البصره تغيرت بشرته لحيه خفيفه مرتبه وبشرته نظيفه صافيه شكد نضيف يلك من النظافه عبالك غاسلينه بقاصر. شعره مرفوع ليفوك و يلمع لمعه مثل السلڤر.

كصيته كص بنظراتي مبقى شي بس هو لحد اخر لحظه ماباوع الي.

استغربت !!!

بعدها ترخص وطلع وطلعوا ويا اخواني.

بس طلع اجوي خواتي وعذراء

يسألون هاا شونه شنو رأيج بي

كتلهم زين ينطلع بي الراس الشارع

علا : ولج حلو مرتب شحلاته صاااك

مها :سكتي لايسمعج ماجد رجلج يجي يصكطج والله

عذراء : تذكرون من اجه المرحوم سامر بيوم خطوبتها ببدي احمر يدخلون ويا اثنين من كد ماعريض واحنه نعيب عليه وهي ماتقبل.

هسه هذا شون كاعده عليه الملابس وماعاجبهه

جنه : سمعت عذراء وكمت دخلت بالغرفه وسديت الباب.

تذكرت سامر من اجه يشوفني وظلوا يعيبون عليه استخطيته وشفقت عليه وانقهرت وعاركتهم.

ذكريات حزينه انقهرت.

بقيت بالغرفه دقايق ودكوا عليه الباب تعاي محمد يريدج.

نزعت شالي والفستان حار لبست دشداشه قماش كشمير بارد ردانتها كلوش لونهه سمائي شلت شعري ليفوك وطلعت كعدت ع القنفه بين امي وعلا

محمد ... هاا جنه شنو رايج

جنه .. سكتت ومدنكه بين عدم الاهتمام وبين موافقه وبين وبين مشاعري مشتته وصارت خليط.

الام :ييمه مو جبير عليها عمره 33اكبر منها ب13سنه ونوب جان متزوج ومرته ميته !!!

محمد بعصبيه ...; لعد تردين تزوجيها لزعطوط يومين ويذبها عليج لو لواحد طايش الله شايله وفاشه وين ميجي يشمر روحه ارعن. واذا مرته ميته بتج هم خطيبها ميت ومو عيب هالشي.

جنه .. : خلص يمه انه موافقه مدام ابنج يريد يرتاح مني موافقه مااريد اكعد على گلوبكم.

وعفتهم ورحت للغرفه.

______

*جهاد

من دخلت البنيه مدنكه راسها ماانتبهت الملامحها بس شفت هيئتها وايديها.

جان فكري مشغول وي كلام فؤاد والي صار قبل لااجي.

بقيت كلما اباوعلها مدنكه وعبالك صنم ومتتحرك وصرت اقارن بينها وبين رؤى. جانت ذيج هواي تتحرك ومن رحت شفتها كل شوي ترفع راسها تباوعلي وتضحك كلش خفيفه.

ارتاحيت شويه ياريت تختلف عن رؤى وتطلع متربايه وماتنزل راسي.

طلعت من يمهم بعد ما كتلهم انتظر ردكم.

سقت السياره واني بالي مشغول.

وره يومين

محمد ردلي خبر كال موافقين كتله هالاسبوع يجون اهلي والبعده نعقد محكمه والبعده نتزوج مراح نطول بالخطوبه

محمد .. : بعد هي راح اصير الك وانت بكيفك.

جهاد..: يصير خير ان شاءالله.

اخذت اجازه وسافرت اتفقت ويا اهلي ورجعت للبصره واني ويايه ابوي واخوي وخالي

وبيوم العقد اخذت الضابط ويانه وسيد يعقد النه ورحنه لبيت محمد.

اتفقنه على كل شي ناس بسطاء وطلباتهم مثلهم

بعدها اخذني محمد ويه السيد بغرفه ودخلت البنيه مغطيه وجهه وكلشي منهه ميبين وعقد النه.

لللعقد يلا عرفت اسمها جنه بقلبي تسائلت ياترى ياجنه راح تكونين الي جنه ؟ ياخوفي اكون الج نار.

سمعت صوتها حسيتها ترجف متوتره وخجلانه

وجر الحجي جر.

مشاعري مخربطه مااعرف شجاي اسوي

ندم على خوف من مجهول احس تورطت وورطتها وياي اني مو مال زواج بس شسوي نجبرت.

هذا الي صار بيوم العقد ماشفتها ابد.

بعدها طلعنه من يمهم اهلي طلعوا البغداد واني بقيت عندي دوام.

بنفس الاسبوع اتفقت وي محمد وكتله حتى نعقد محكمه هنا والاسبوع الي وراه اخذهه.

طلعت الصبح ورحت لبيتهم اخذتهم هي وامها.

جانت لابسه عباية راس ولافتها بحشمه

وعيونها كله ع الارض

الشكوك اللعينه الي بداخلي متخليني بحالي

ظليت متسائل ياترى هذا تصنع لو فعلا هي ملتزمه

الجانب الملائكي الي بداخلي يكول هي وين تعرف الي صار وياك من خيانه حتى تصنع كدامك

الجانب الشيطاني يكولي احذر كيد وخيانة النساء.

وبين هالاثنين اني احس تورطت خلص وميفيد التراجع هسه.

خلصنه العقد خلال الاسبوع.

بلغتهم بالموعد الي راح نطلع بي لبغداد وكل شي.

يوم الاحد طلعت لبغداد وصلت المغرب تلكتني امي

بوستني وحضنتها.

سألتني شلونها مرتك حلوه

.. يمه مو مهم الجمال اهم شي تصوني وتحافظ على شرفي.

..الله كريم ييمه الله يستر عليكم ويهنيكم ويسعدكم

بس وصفلي شكلهه شلونه بالله ؟؟

.. بقلبي هو اني شفت منها شي

كتلها يمه بيضه لاطويله ولا قصيره وضعيفه.

.... هاا بيضه عبالي سمره مو اهل البصره كلهم سمر.

... لا منو كلج قابل شايفينهم كلهم بيهم السمر والبيض والشكر وكل شي.

... تعبان ادري بيك وجوعان انتظرتك على الغدا وسويت الك شون بانيه ماخليت لااختك ولا مرت اخوك يطبخوها طبختها بيدي.

.... ميخالف ولا يهمج اكلها مدام من ايدج

... يله ارتاح حتى اصبلك.

... يلا راح اصعد اسبح وارتاح

.. ولاتنسه الصلاه اذن المغرب

... الله كريم يمه.

صعدت لغرفتي بقيت اباوع الها اريد اغير كل شي بيها.

سبحت وكعدت ارتاح اندكت الباب ودخلت امي تحجي وهي مبتسمه عرفت سر ابتسامتها لان راح اتزوج.

يلا يمه جهاد حضرت الك الاكل بالمطبخ.

صار يمه هسه انزل.

خلص الليل يوم الثاني من الصبح

كعدت اشتغل بالغرفه وبمساعدة اخواني

عندي اخوان 3 امجد الكبير عازل عنا ببيت وحده بنفس الفرع مالنه.

وفؤاد وعماد الصغير.

طلعنه الاثاث كله بره ونزلنه السقف ثانوي

خلال يومين صارت الغرفه جاهزه اشتريت غرفه اخشاب جديده وغيرت د*كور السقف والثريات وصبغ اختي حوراء جانت عدنا.

بينما جنت دشتغل بالغرفه ومنهمك

دخلت جابتلي مي.

وكعدت يمي

حوراء : ليش سوده الاخشاب مال الغرفه

جهاد : هيج عجبتني

حوراء :اخذت راي العروسه بالتغيير هذا.

جهاد :بصراحه لا خلي تجي وتنصدم

حوراء : شلونها حلوه ماعندك صوره الها ؟؟

جهاد : ماعرف ليش مهتمين لجمالها مو تزوجت الحلوه وخانتتي.

حورأء :حبيبي اخويه ان شاءالله هي الي تصونك وتحافظ عليك.

جهاد :تن*دت وكتلها ااالله كريم.

بعد العشاء يوم الثلاثاء اتجمعنا كلنه بجلسه عائليه ابويه وامي.

اخواني وزوجاتهم واخواتي وعمتي.

كعدت بصف ابويه كتلهم الكل يسمعني تره اني مكايل اي شي للعروسه على الي صار ويا رؤى وانتم هم مراح تحجون اي شي والله والله الي يفك حلكه ويحجي وباوعت بخزر لعمتي كواكب ميلوم اله نفسه

الجناين طلاكهن على ايدي التحجي منهم .وخواتي اتبرى منهم وانت ياعمه تعرفين الباقي محاجه اكول.

الكل هزو براسهم اي وان شاءالله

اما كواكب تباوعلي بخزر واني هم.

وابويه القى عليهم محاضره

لازم ننسى الي راح ونبدي من جديد وجهاد مر بازمه والحمدلله الي طلع منها.

لازم تاخذون الكلام ومتحجون شي كدام البنيه ونسد هالسيره.

جهاد ... سالوني شنو اسمها ضحكت كتلهم جنه

وبقلبي كلت واني جهنم.

يوم ثاني الاربعاء الصبح طلعنه اني وامي وابويه وامجد اخوي وخالي للبصره دروح نجيبها.

اخذناهه وطلعنه البغداد وصلنه المغرب هي راح تبقى ابيت اخوي ويوم ثاني الي هو الخميس راح يكون العرس.

*جنه

من رحنه نعقد محكمه اباوعله شلون شخصيه بس كلش ثكيل كلمه مانطق ويايه ولايباوعلي استغربت هواي ليش هيج يتصرف.

لابس نظارات شمسيه نيلي والقميص هم نيلي وبنطرون بيجي. الملابس كاعده على جسمه كلش مرتب وعطره يفح.

بس ضوجني بروده وحتى امي انتبهت. تالي كلت يوو تروح فدوه لسامر شلون جان دمه خفيف اني شعليه بي ليش مهتمه لتصرفاته.

قبل ليجون ياخذوني سويت حنه وعزمت صديقاتي ظلن يسالن يردن صوره اله كتلهم ماعندي تفاجئو

علا : تردون تشوفونه شوفوا عمار كوسوفي بي شبه منه.

خلصت الحنه واني كاضيتها بس بجي خوف على عدم ارتياح وحتى امي بس تبجي.

صاحلي محمد وامي وكعدوني بنصهم وظلوا ينصحوني.

محمد ؛جنه اريدج ترفعين راسي ل**نج الطويل تكصرينه وتحترمين رجلج واهله خوش.

الام :يايمه انسي الراح وديري بالج تجيبين سيرة الماضي ويا وتحجين بخطيبج خوش انسي وابدي من جديد.

جنه :

كتلهم صار ورحت حضرت اغراضي بالدموع

رايحه لمكان لااعرفه ولاشايفته من قبل ولااعرف احد هناك ورايحه وحدي.

يوم الاربعاء اجو الظهر اول مشاف*ني امه صفنت بوجهي تالي صلت على النبي وكالت

جنج ملاك يمه تخبلين الله يستر عليج ويسعدج.

اخذوا اغراضي خلوهم بالسيارات.

ودعت اخواني ومها وكلهم يدعولي الله يسعدج.

بس قلبي مقموت وممرتاحه.

حضنت مها وبجيت بجي مصاير

طلعنا وياهم.ويايه امي علا وعذراء كعدت بصف امه وظلت تسولف وياي

وصلنه المغرب كالت امه راح نود*كم لبيت ابني امجد واني راح ابات وياج وباجر الصبح البنات يودوج للصالون.

نزلنا لبيت اخو وهو راح مانزل ويانه

استقبلونه مرته وبناته كبار تجي اعمارهن ب16او 17

بقينه الليل عدهم.

صبوا العشا مكدرت اكل ولا لكمه نفسيتي مسدوده شكد توسلوا بيه كتلهم مااشتهي.

صار الليل كلهم نامو.

بس اني اتكلب بالفراش وماايجيني نوم افكر بامي وافكر بجهاد شلون واني مااعرفه وممتأقلمه ويا حتى شون راح اصير اله زوجه وهو حتى كلمه محاجي ويايه.

معقوله مريض نفسي لان مرته ميته

بقت الافكار ابالي تجيبني وتوديني.

للصبح كعدت عيوني مورمه.

بنت اخو اسمها ياسمين علمتني ادلك جوه عيوني يروح الورم.

سوولنه ريوك اكلت لكمه وكمت

واجت اخته حوراء اول مره اشوفها ظلت تباوعلي باستغراب

شبيهم هيج يباوعولي

سالتني عيونج هي لو عدسات كتلها لا عيوني

كالت هممم وطلعنا للصالون.

كل شي هي اختارته ماانكر ذوقها جان كلش حلو

البدله والمكياج والتسريحه كله هي.

ويانا بنات امجد وعلا

امي وعذراء بقوا بالبيت

بعد مالبست البدله وكملت تسريحه وكل شي

وكعدنا ننتظرهم يجون علينا

واني كاعده اباوع فراشه تطير يمي تحط على بدلتي على الاكليل وكتفي.

شافتها وحده بالصالون جان تكول هي نسميها رويحه !!! اني انقمت قلبي انقهرت حسيت هي روح سامر مرافقتني بهذا يومي الدموع ظلت تنزل من عيوني

تخبلت بساعتها اريد اشهك واصرخ

مكدرت حتى اسيطر على نفسي ظلو يسكتون بيه مااكدر اسكت.

اجوي علينه ودونا لبيت جهاد واني كاعده الفراشه ممفاركتني تخبلت بالزايد.

والمكياج كله خرب وسال.

ظليت اباوع للفراشه متعوفني

صرت احاجيها بقلبي

هي قسمه وانت ما مقسوم لي ذيج دامت حتى هاي تدوم لي يل خذوك ادعيلي برويحت حلال الله يستر باجر شمضموم لي

وماادري شمضموم الي يمكن سامر مات وبقت نفسه بيه.

واجو يردون يزفونه للغرفه اخته خلت ايدي بيده هو بارد واني مثل الصنم الي يحركون بي وماادري

شون راح تخلص هي الليله. صعدنا الدرج واحس ايده تجويني.

اول مادخلنا للغرفه وانسدت الباب علينه. وبقينه وحدنا

هو ترك ايدي وراح يم ميز التواليت

بقيت واكفه يم الباب مال الفرفه وهي مسدوده

بدخلتي قلبي انقمت اكثر وقشعريره سيطرت على جسمي

خوف*ني الغرفه كلش فكرت شنو الي صار بهي الغرفه يمكن مرته ماتت بيها وهيج اني انقمتت

احس رجليه بعد مااتكدر تشيلني

من الخوف والربكه حسيت مااكدر اتنفس ضلن اديه يرجفن وبلعت غصتي واشهك شهكات متتاليه شفته تقرب مني من شفته صار كوولش قريب وطيت راسي اكثر حسيت بااطراف اصابعه البارده تحت حنكي يرفع وجهي

فتحت عيوني ببطئ شديد واني شفايفي ترجف اول ماالتقت عيوني بعيونه حسيته تغيرت ملامحه شويه شويه وصار تنفسه سريع ركز بعيوني بقوة سألني عيونج لو شنوو؟؟

گلت بقلبي عفيه سؤال كلساع سائلينه

جاوبت بكلمات متقطعه وصوت رايح من البكاء..عيوني... شفته زم شفايفه ودفعني من كتفي دفعه خفيفه وابتعد عني وطلع بالبلكونه.

جهاد*

يا لصدمتي يا لان**اري تلك الصغيرة بعينان خضراوتان ..اصبحت ك الاسد المجروح عند رؤية عينيها فهي تزيدني الما وتقتل قلبي وتفتك به.. جعلتني احكم عليها بالقسوة ،بالكره واالبستها تهمة التشابه فهي تشبه عيون من اهدتني عاراً

يتبع

بعد ذلك الحب ، بعثره كتمان ، ووحده قاتله وجحيمً في غرفه مضلمه اركانها معتمه ، وكأبه تقضي على سعادتي ، عيونً دامعه وقلبً ممزق كلها بجسداً واحد ، رياحً عاصفه تعصف بامنياتنا التي لطالما كنا نتمناها ، لقائنا اصبح فراقنا ، ودعواتنا للقاء اصبحت دعواتً لكي ننسى ، خذلان ، ألمً ، وحسره ، وضيقً لن يتسع حتى نموت .