أنت عائلتى

الأمل

فاضل ساعه وهركب الطياره وكمان ٤ ساعات وأوصل مطار القاهره.

اخيرا يا حسن بعد ٨ سنين فى المنفى فى مدرسة مارمونت الداخليه بلندن من غير زياره واحده لمصر حتى فى الأجازات أخيرا ٥ ساعات تفصلك عن اللحظه اللى انت مستنيها بقالك ٨ سنين!! أكيد هيبقا مستنينى فى المطار؛ والدى "شريف الدجوى" رجل الأعمال اللى جدول أعماله علطول مشغول علشان كده عمره ما زارنى فى لندن وكان كل كام شهر يكلمنى ٥ دقايق بس ٥ دقايق بيفضى نفسه فيهم علشان يتطمن اذا كنت محتاج حاجه او لأ وانا عمرى ما قولتلوا انى محتاج حاجه كنت دايما بقولوا انى كويس ومستر روجر اللى كانت وظيفته بس يتابعنى ويشوف احتياجاتى مش مخلينى محتاج حاجه خالص انا بس كان نفسى أشوفه كل مره كان بيبقا نفسى أقولوا انى نفسى أشوفه وأنى نفسى أرجع أعيش معاه بس عمرى ما قولتلوا وكنت مستنى أخلص المدرسه بتفوق علشان أستحق لقب أبنه وأستحق انى أعيش معاه.

بس أكيد هيفضى نفسه النهارده وهييجى يستقبلنى فى المطار وحتى لو مجاش ومقدرش يفضى نفسه أكيد هيبعت طارق أخى يستقبلنى او ممكن هو وطارق يبقوا منتظرنى!! الوقت بيعدى ببطأ غريب... كل دقيقه أكنها ساعه وكل ساعه أكنها يوم كامل والقاعده فى مطار هيثرو والف*جه على الناس اللى رايحه وجايه من كل بلاد العالم مش بتخلى الوقت يعدى. هتجنن علشان أشوفهم نفسى أغمض عينى وأفتحها ألاقى نفسى فى مصر.

بعد مرور أطول ٥ ساعات فى حياتى.........

خرجت من البوابه لقاعة الأستقبال وعينى بتدور فى كل مكان على أبى أو أخى طارق على حسب ما انا فاكر شكلهم من الصوره اللى شفتها على الأنترنت من سنه فاتت كان بيحتفلوا بأفتتاح فرع جديد للشركه فى لبنان وكان فى الصوره أبى وأخى طارق وساره أختى وزوجة أبى طنط نيهال.

صوره جميله لعائله ثريه ومثاليه من أب وأم وأبنائهم بس الصوره كان ناقصها الأبن الأصغر كان ناقصها حسن كان ناقصها أنا.

"حسن شريف الدجوى"

اللى اتولد فى ٢٠٠٢ فى حى المنيل فى القاهره من أب وأم بيحبوا بعض دا اللى قالتهولى والدتى أنها قابلته وقت ما كانت بتشتغل فى واحده من شركاته وحبته من أول مره شافته فيها بهيبته ومظهره المبهر وقبلت انها تكون زوجه تانيه وعلى شرط إن المجتمع وزوجته الأولى ميعرفوش مقابل انه يبقا معاها مره او مرتين فى الأسبوع قبلت بالوضع دا علشان حبته علشان حبت وجوده معاها وفضلوا سنتين على حسب حكاياتها عنه عايشه فى سعاده معشتهاش طول حياتها قبله.

بس أول ما زوجته عرفت وهددت بأنها مش هتقبل بالوضع ده أختار حياته مع زوجته الأولى بأولاده ووضعه وشكله ومركزه فى المجتمع كزوج وأب ورئيس شركه ناجح وطلق والدتى اللى بعد ١٠ سنين كأم مطلقه منبوذه من أهلها والمجتمع بسبب قبولها انها تكون زوجه تانيه قررت تتجوز تانى بس المره دى كزوجه أولى بس الزوج الجديد مقبلش يربى أبن واحد تانى فا أصبح الحل الوحيد انى أعيش مع أبى الغنى صاحب الشركات كأبن غير شرعى المجتمع ميعرفش عنه حاجه. بس أكيد والدى بيحبنى أكيد هو عاوزنى كأبن لييه وألا كان لييه قبل انه ياخدنى من أمى علشان أعيش معاه؟! هو دا الأمل اللى فضلت عايش بيه طول ال ٨ سنين اللى فاتوا واللى ات**ر مع أول صدمه ليا عند وصولى صالة الأستقبال من غير ما الاقى أى حد فى أنتظارى غير غريب فى الثلاثينات لابس بدله وماسك ورقه مكتوب عليها أسمى "Hassan Sherif El Degwy".