الفصل الخامس

1898 Words

تغيرت حياتى إلى الفصل الخامس بقلم : ريان عبد العزيز محمد إبراهيم فى جانب حازم .. بعد اتغدى اتونس شويه مع الخاله فاطمه و العم عباس و بعدها طلع على غرفتو عشان يرتاح ..بعد دخل الغرفه لقى تلفونو برن و تاتى وقف و مسافة يمش يشيلو و يشوف المتصل تانى رن ...شال التلفون و عاين لى الشاشه لقى المتصل بيو ابراهيم .. عايز يرد عليو بس تانى اتذكر عملتو العملها قبيل لما ورطو مع ناس المعاينه و قال يعمل فيها زعلان وما يتكلم معاو عشان تانى ما يكررها .. و فعلا الخط قطع بعدها جاتو رساله من ابراهيم قال ليو .. ابراهيم : صحبي اللزم حبيبي ياخ سيد الناس مساء الأنانانس البحبوك الناس ( يخوانا ابراهيم دا شكلو عسسل شديد ) حازم عرض الرساله و قعد يضحك و قال براحه بصوت اقرب للهمس : و الله مجنون شديد يا ابراهيم ما عارف الجن دا ورثتو من منو ابراهيم رسل تانى و قال : يا الناس العاملين زعلانين و كدا بنعتذر ليكم شديد و حقكم علينا بس المره الجاي ما تزعلو لانى حا اكب الزوقات فى المواقف الحرجه دائمآ (مجنون رسمى ) حازم قال مع نفسو برضو: مشكلتى انى ما بزعل منك نهائى و انت عارف كدا و انا عارفك لما تكون عايز تكب الزوقه من الحاجه الما بتعجبك بتورطنى انا فيها اصبر لى بس بوريك تانى و حازم صمت التلفون و رقد نام لانو كان مرهق شديد و نعسان .. نرجع لى زولنا احمد الإتكلمنا عنو فى البدايه ... احمد بعد طلع من السجن ابوهو كل ما يلقاهو يشاكلو و يهينو و يذلو و مرت ابوهو برضو ما قصرت فى مضايقتو و مطاعنتو و بقى ما طايق ليهم البيت و نفسو يعرف لى ابوهو بكرهو كدا ...بعد طلع من السجن ما نزل الجامعه لانو كان خايف من الطلبه يهينو زى ابوهو و مرت ابوهو سوسن العقربه (تانى بقول ليها سوسن العقربه ) و خايف انو يمشى الجامعه يلقى نفسو فصلوهو من الجامعه بسبب الحصل دا بقى شاغل نفسو بى شغل اليوميه الكان بشتغلو و بحاول يوفر ليو قروش لانو حلمو يعمل ليو شغل خاص بيو عشان يقدر يطلع دخل محترم بدل شغل اليوميه الكان بشتغلو دا ... نمش لى جانب سوسن العقربه قاعده مع واحده من جارتها الفارغات زيها كدا و عديمات شغله اسمها عرفه صحبتها شديد و حافظة اسرارها و المفكره معاها فى كل افكارها الكعبه .. سوسن قالت لى عرفه : تصدقى يا عرفه ولد هدى دا عمر ما ردتو بكرهو شديد كل ما اشوف وشو دا بتذكر وش امو الشلبتنى زمان من عادل عرفه ردت عليها : يختى المره ماتت و خلاص لكن برضو ما تحبي بعدين كل قروش ابوهو دى لما يموت تتكتب بي اسمو و انتى لا جبتى ليك لا عيل لا تيل سوسن العقربه قالت ليها : انا خايفه اليوم دا يجى و انا اطلع من المولد برا حمص كوست لى درب الولاده ما خليت حكيم ما خليت فكى اى شئ عملتو ما نفع الجنى كان الحاجه الوحيده البردت غ*ينتى فى عادل و هدى هسه المنحوس دا يرث كل شئ عرفه قالت ليها : يختى ما فات شئ ممكن تخلى راجلك يكتب ليك اى شئ بإسم تقنعيو بالهداوة و موش انتى قلتى هو بكره ولدو و بتشائم بيو من ما امو ماتت سوسن العقربه قالت ليها : هو بكرهو شديد بس فى النهايه هو ولدو و ولدو من حبيبتو اكيد حا يسجل اى شئ من نصيبو عرفه قالت ليها : خلاص عندى ليك فكره ظابطه شديد نفذيها و حا تدعى لى سوسن العقربه قالت ليها :ارح ورينى سريع ورينا ابداعاتك سريع عرفه قالت ليها: لكن لازم تتنفذ بي حذر لانها فيها مخاطره و لو عادل كشفك اقل حاجه ممكن يعملها ليك يطلقك سوسن العقربه قالت ليها : يا مره ما تقولى سريع و عادل لو بكشفنى كان كشفنى من زمان اها قولى عرفه قالت ليها تعالى قربي اضانك على لانو الحيطان ليها ودان و قعدت توسوس لى سوسن العقربه فى اضانها****( و نخليهم فى وسوستهم دى ) نمش لى صباح يوم جديد .. نمش لى زولتنا مريم ... كانت ضابطه المنبه لى صلاة الصبح و خايفه شديد ما تصحى للصبح و ما تصحى للشغل لانها كانت خايفه من المدير السغيل دا خايفه تتأخر يقوم يطردها من اول يوم او يخصم منها من المرتب الشهرى ...و خوفه ساي صحت قبل صلاة الصبح بي عشرين دقيقه .. قامت استحمت و بدون مؤاخذه اتسوكت و صلت الرقيبه و الصبح و بعدها مشت جهزت شاى الصباح لى ناس البيت لانو ابوها و امها متعودين يشربو الشاى بعد الصلاه طوالى لكن هى كانت زمان بتصلي و ترجع تواصل نومها و بعد تصحى تانى تشرب الشاي زى الساعه تسعه و له عشره ... لكن الليله يومها غير ... بعد جهزت الشاى جابتو لى امها و ابوها ... و ابوها و اخوها جو يا دوب من المسجد اخوها طوالى دخل غرفتو يواصل باقى نومتو و كبت ليهم و كبت لى نفسها معاهم و اتونسو شويه و حكت ليهم عن حماسها للشغل و اهلها كانو فرحانين شديد بشغلها دا و دعو ليها بالنجاح و التوفيق و ربنا يسهل عليها .. بعدها قامت تجهز للشغل لانها اتذكرت مفروض تطلع لبستها من امس بس امس كانت فترانه و نامت و نست اى شئ .. فا مشت على دولابها طلعت ملابسها كلها من الدولاب و ختتها فى السرير و بقعد تختار تلبس شنو و احتارت مسافه فى النهايه قررت تلبس زى رسمى بناسب الشغل .. اختارت جاكت زى بدله نسائيه كدا باللون البيج و معاو تشيرت لونو كبدى و اسكيرت اسود و طرحه مشكله اشكال هندسيه باللون البيج و الكبدى و اسبورت كبدى و شنطه لونها كبدى و كدا امورها ظبطتت ..اصلا هى ذوقها حلو شديد فى اللبس و بتحب اللبس البسيط و المحتشم و دى اكتر حاجه بتميزها و بتختار الوان لبسها بعنايه شديده مع انو وضعهم المادى عادى شديد بس الأناقه ما عايزه قروش كتيره زى ما بقولو الأناقه فى البساطه? جهزت ملابسها و كوتهم مشت تتوضى لى صلاة الضحى لقت الشمس بدت تطلع عاينت للساعه لقتها سته و نص ... قالت : سجمى الليله اتأخرت شديد مفروض اطلع من الساعه سبعه عشان المواصلات براها عايزه ليها ساعه كامله عشان اصل واى الليله و عايزه تبكى خلاص تانى قالت ماف وقت لى البكاء ... مشت اتوضت سريع سريع و صلت الضحى ركعتين متعوده تصلى اربعه ركعات بس قالت الزمن .. و سريع سريع سرحت شعرها و لبس ملابسها و اتعطرت و عملت مرطب فى شفايفها و اتحصنت سريع و قعدت تدعى ربنا يسهل ليها و تلقى مواصلات ما تقيف مسافه نخليها منتظره المواصلات و نمش على جانب حازم ... فى جانب حازم الصباح عندو متعود انو يصحى صلاة الصبح من غير منبه و بعد يصلى يقرأ سورة يس و الخاله فاطمه بتجهز ليو شاى الصباح فى السفره و معاو كيك كان بحب كيك خاله فاطمه شديد بس ما كان بشرب الشاي اول بعد يصحى عندو طقس يومى بعملو .. اللهو كان فى عندو غرفة فى الطابق التحت ملانه بالاجهزه الرياضيه و معدات الرياضه بعد صلاة الصبح عندو تمارين يومى بمارسها و بي سببها محافظ على قوامو المثالى لانو ممكن نقول عليو زول جنتل مان و جسمو متناسق مع شكلو و دا مخلى شخصيتو جذابه شديد و برضو التمارين دى متعود عليها لانو بعدها بكون مسترخى و بالو مرتاح شديد و بتقلل ليو التوتر و الضغوط البمر بيها فى اليوم الفات و مرات كتيره لما يكون متضايق شديد بدخل الغرفه دى و يمارس التمارين بعدها برتاح طوالى ...بمارس رياضتو دى لمدة نصف ساعه يوميا و بعدها بمش يشرب الشاى بالكيك لانو بكون جعان شديد بعد الرياضيه و بعدها ببدأ يجهز للشغل ..زى الساعه سبعه و نص بطلع من البيت بصل الشركه مرات تمانيه الا عشره دقايق ..او تمانيه الا خمسة عشر دقيقه حسب زحمة العربات و الشارع ... الفيلا ما بعيده من الشركه بعد يصل الشركه متعود يشرب ليو كوب قهوه قبل الشغل عشان ينشط ليو مخوو و يقدر يشتغل كويس و الساعه تمانيه الا عشره دقايق كل الموظفين بكونو فى الشركه و بعملو البصمه ( البصمه عشان توضح انهم جو فى الزمن المحدد و انو ماف موظف غاب) و اصلا كل الموظفين منضبطين شديد و عارفين حازم و حزامتو و صرامتو فى الشغل لانو ما بلعب بيو و عادى برفد و لا بتفاهم .. فى جانب مريم بعد معاناة و زحمة مواصلات و خوف انها تتاخر و صلت الشركه تمانيه الا خمسه دقايق سريع سريع مشت لى الموظفه بتاعت الاستقبال و كانت متوتره الموظفه طوالى قالت ليها اعملى البصمه اول عشان استاذ حازم يعرف جيتى فى الزمن المحدد و بعدها حا نفهمك طبيعة الشغل و نود*ك المكتب الحا تشتغلى فيو ... و فعلا مريم سريع عملت البصمه و التوتر خف و الموظفه اتصلت بالزوله المسؤوله منها و جات المسؤوله ساقتها و فهمتها طبيعة الشغل و ورتها مكتبها و جاء استاذ عمار مدير قسم التسويق عرفها بي نفسو و كلمها عن الشغل و كدا و كان مبهور شديد بي جمالها و أناقتها و اعجب بيها فى نفس اللحظه .. فى جانب حازم السكرتيرة جاتو و زكرتو انو عند اجتماع الساعه عشره مع العملاء فى الشركه هنا .. و جابت ليو ملفات يراجعها و يوقع عليها .. و فعلا بدا بالملفات دى واحد واحد و كان مندمج شديد فى قراية كل ملف و بعدها يوقع عليو .. فى اللحظه دى الباب فتح و هو مندمج و ما حس بالزول الجاء .. بعدها حس بي زول بصفر ليو فى اضانو طوالى قام وقف على حيلو و كان مخلوع شديد لانو كان منتبه شديد مع مراجعة الملفات و فجأه زول يصفر فى اضانو اتلفت عليو لقاو ابراهيم حدر ليو و قعد فى الكرسي و واصل يراجع فى الملفات و كان متضايق شديد من حركة ابراهيم ... بعدها ابراهيم قال ليو يعنى افهم شنو من كدا يا مدير يعنى اطلع منك ... حازم ما رد عليو .. ابراهيم قعد فى الكرسى المقابل المكتب و بقى خالف كراعو و ساكت و تانى بقى يصفر براحه و بهدوء كدا زى لحن هادى حازم طوالى قال ليو : فوق على حركة امس العملتها و الزعلان منك فيها ..دخلت الغرفه ما دقيت الباب و عارف دى اكتر حاجه انا بكرها فى حياتى عدم الاستئذان و بعدها جيت خلعتنى و انا ما حسيت بيك و لحدى هسه برجف من الخلعه و بعدها قعدت و فضلت تصفر و تزعج فينى و دى الحاجه التانيه البكرها زول يعطلنى من شغلى و كمان يزعجنى عشان انت صحبى و انا كل مره بسامحك على حركاتك دى و كل مره بتكررها لى ..لى بتعمل فينى كدا بسرعه ابراهيم قال : لانى بريدك ياخ و بتكيف شديد لما اضايقك كدا و ازهجك و بالذات لما تكون زعلان منى و ما ترد على فى التلفون و تكون ساكت ما تتكلم معاي فا بكون مضطر اعمل ليك الحركات دى لانها الوحيده البتخليك تتكلم حازم قال ليو : و مشكلتى انى ما بزعل منك و اللله و بريدك من جوه قلبي و انت مستغل الحته دى و انت عارف كويس لو زول عمل لى حركاتك دى مستحيل اسامحو ابراهيم جاء حضنو و قال ليو :حبيبي ياخ عارفك قلبك ابيض و جميل بس انت مركب فيو مكنة انك جادى و قاسي لكن يشهد الله احن منك ماف و فضلو متحاضنين مسافه و بعدها اتونسو و عرفو اخبار بعض لانو يوم امس ما اتلاقو اى واحد حكى للتانى بي يومى كان كيف ... بعدها حازم قال لى ابراهيم اتفضل اطلع بره شغلتنى و ضيعت وقتى و عندنا اجتماع الساعه عشره امش شوف شغلك بي وين و مخصوم منك حق يومين من مرتبك امس و الليله ما اشتغلت امس و الليله ضيعت زمنى و ما بديت يومك يلا برا ما تستغل انى صاحبك الشغل شغل بعدها ابراهيم طلع من المكتب و حازم واصل شغلو ... و انا ماشه انوم لانى جازفت شديد عشان اكتب ليكم و ما كان عندى خيال عصرت مخى عشان اظبط ليكم الفصل دا و ان شاء الله ينال اعجابكم تصبحون على الف خير .. نتلاقه بكره فى الفصل الجاي

Free reading for new users

Scan code to download app

App Store Google Play

Facebookexpand_more