الفصل العشرون

2088 Words

تغيرت حياتى إلى بقلم : ريان عبد العزيز محمد ابراهيم الفصل العشرون جاء اليوم التانى و انا اليوم دا كلو كنت مجتهده شديد فى فستان روان و حاولت اظبطو ليها و اخلصو ليها فى اليوم دا و الحمد لله بقدرة ربنا قدرت اخلصو و جاتنى روان جربتو طلع رهيب شديد و عجبها شديد ما اتخيلت انو يطلع حلو كدا .. جابت معاها قروش فساتين بنات اهلها و قروش فستانها هى و قروش توب خالتو سعديه و المره المعاها و قروش فستان اسراء حق الجرتق انا حلفت ما اشيلهم منها بعد تحنيس شديد حتى رضيت اشيلهم بعدها روان شالت فستانها و طلعت و انا طوالى بديت فى فستان اسراء حق الجرتق و خلصتو تانى يوم فضل لى العرس اربعه يوم .. حتى بديت اقص فستانى قصيتو قصه بسيطه شديد و طلع حلو شديد و خلصتو فى يومين بعدها بقيت مشغوله مع ناس العرس من عمل خبائز لى نظافه لى بيتهم و غيرها من التجهيزات و فى الفتره دى كنت مأجزه فى المدرسه عطله صيفيه و كان حا امش سنه تالته ثانوى و اكون ممتحنه الشهاده الثانويه يوم الحنه كان قبل يوم من العرس مكيجت العروس انا و طلع ميك اب رهيب شديد و طلعت قمر اربعتاشر و جو اهل العريس حضرو الحنه كانو ناس راقيين شديد و ظاهر عليهم مرطبين ..اليوم التانى كان يوم العرس كان فى بيت العرس بيت ناس العروس فطور و غداء و العشاء كان فى الصاله و معاهو العقد .. الناس كلها اتجهزت للعقد الفى الصاله و لبست و طلعت من بدرى للعقد .. مشينا الصاله كانت رهيبه شديد و الصاله الما خمج و اهل العرس رهيبين و راقيين و بعد عقدو الحفله بدت و الفنان جاء هجج بعدها العرس جو العروس طلعت رهيبه شديد و العريس كمان وجيه شديد و انبسطنا و هججنا و الحفله كانت رهيبه شديد و بعد الحفله خلصت رجعنا البيت و انا كنت مبسوطه شديد لى اسراء لانها تستاهل كل السمح ... و مرت الايام و انا ماف زول تانى جانى اقص ليو بس ياهم القصيت ليهم اسراء و روان و بنات اهلها و خالتو سعديه و المره قريبتهم ..بعد فتره اسراء رجعت من شهر العسل و مشت كان ماليزيا و مصر و رحلت فى بيت براها قريب من بيت نسابتها .. يوم جات تقيل مع اهلها مشيت اسلم عليها و ارجع لانو عندى مدرسه كان و انا كنت ممتحنه الشهاده بقى بالى كلو فى إنى اتفوق فى الشهاده و احقق حلمى انى اكون مهندسه مشيت لى ناس خالتى سعديه و اتونست معاهم .. اسراء قالت لي: طبعا يا ريم اى زول شاف مكياجى حق الحنه حقتى من اهل راجلى عجبو شديد و جاياهم اعراس قالو عايزنك تمكيجيهم و برضو فى الفيديو بتاع العرس قريبة راجلى شافت توب امى قالت لى رهيب و قالت عايزاك تصممى ليها توب لى عرس بتها .. قلت لى اسراء طووالى يا اسراء ما بقصر معاهم ابشرى بس بخصوص الميك اب انا ما عندى الميك اب الماركه حاليا مبتدئه زى ما تقولى و ما عندى ميك اب كتير عايزه باليتات تكون ماركه و عايزه ارواج و فاونديشنات ماركه عشان شغلى يظبط اكتر مفروض اجتهد فى الحاجات دى اسراء قالت لى : اى و الله يا ريم مفروض يكون عندك كل انواع الميك اب الماركه و انا واثقه من شغلك لانو يدك نضيفه شديد فى الميك اب هسه ما اشكال الناس العايزنك تمكيجيهم حا تمشى ليهم فى بيتهم و هم عندهم افخم انواع الميك اب ما حا تواجهك مشكله لكن لى قدام مفروض تشترى الميك اب الظابط قلت ليها :ان شاء الله يا اسراء انا ناويه اوسع شغلى بس زى ما انتى عارفه فى الفتره دى انا مضغوطه مع المدرسه و الإمتحانات و خاصة انى ممتحنه الشهاده الثانويه و لازم انا اركز فى قرايتى فى الفتره دى . اسراء قالت لى :موفقه يا ريمو اى ركزى مع القرايه ربنا يوفقك ان شاء الله و هسه الايام دى اضغطى نفسك شديد عشان نهاية الاسبوع الجاى دا انا حا اسوقك ليهم لى الميك اب لانو العرس الجمعه الجايه و بخصوص ام العروس حا اخليها تجيك هنا و تجيب ليك معاها التوب حقها و توريك هى عايزه شنو قلت لى اسراء : طيب ان شاء الله انا بستأذن هسه بكره عندى اختبار تعالى لينا لو قعدتى قالت لى اسراء : ربنا يوفقك يا رب لو قعدت بجيكم و طلعت منهم و مشيت قعدت اقرأ شويه و اراجع لانو بكره عندى اختبار و مرت الايام و انا كل ما القى زمن فاضى بحاول ارسم تصاميم جديده و بحضر البرامج الفى التلفزيون العالميه البكون فيها عرض لى الأزياء و بقيت بأخد افكار كتيره فى مجالات التصميم .. انا كنت فى شغلى ببعد من إنى اقلد المصممين بحاول ابتكر تصميم من خيالى فى حين انو بستفيد من التصميمات الاخرى بس ما قاعده اقلدها و دى الحاجه الممكن نقول عليها قدمتنى فى حياتى .. يعنى مثلا لو جاتنى واحده عايزه تصمم عندى فستان و جابت لى صوره فستان عاجبها فى تلفون بتقول لى عايزه نفس الفستان انا بحاول بقنع الزبونه عندى تصميم ارهب منو و برسمو ليها اذا هى عجبها اوكى ما عجبها و عايزه نفس الفى التلفون بحترم رغبتها جدآ و بعملو ليها على الشكل الهى عايزاو .. يعنى بإختصار تصاميمى بتعتمد على التميز ما بميل لى تقليد التصاميم الاخرى فى يوم من الايام روان جاتنا و كانت معاها واحده و هى قريبة اهل راجل اسراء و جابت معاها التوب و قالت لى انو هى ام العروس عايزه تصمم التوب ما عندها شكل معين قالت لى صممى لى على ذوقك و سالتنى من السعر بس انا وريتها ما بنختلف و السعر تخليهو فيما بعد احتمال يعجبها و احتمال لا و اذا ما عجبها انا ما بشيل قروش و هى اصرت تدفع لى طوالى و انا اصريت الا لما يخلص .. يلا انا كان فى راسي كم تصميم لى التوب احترت اعمل ليها ياتو تصميم فى النهايه اتوكلت و صممت على الجاء فى رأسي و البجى مع التوب اشتغلت شغل بالقلتر و السوارفيسك و اشتغلتو فى تلاته يوم خلصتو يوم الخميس لانى كنت مضغوطه شديد مع المدرسه و القرايه و التوب طلع حاجه فى قمة الإبداع و مفروض ست التوب تجى تسلتمو الخميس بس ما جات و انا ما عندى تلفون عشان اكلمها جاء يوم الجمعه من الصباح كنت نايمه صحتنى امى قالت لى اسراء بره عايزاك امشى ليها مشيت غسلت وشى سريع سريع و مشيت على اسراء لقيتها قاعده سلمت عليها و قعدن اتونس معاها . اسراء قالت لى : طبعا خالتو لبنى ست التوب كانت عايزه تجيك من امس و الليله عرس البنت كلمتنى و قالت لى اجيبك عندهم فى بيتهم عشان بنات خالتو لبنى الاصغر من العروس عايزنك تمكيجيهم لى الحفله بعدين و خالتو مشغوله مع الضيوف و بتعتذر منك انها ما حا تقدر تجى .. قلت لى اسراء : انا ما عندى مشكله بس اشوف امى اذا بتوافق و له لا لانو انتى براك عارفه امى بتخاف علينا كيف قالت لى طيب امشى كلمى خالتو و تعالى ورينى مشيت لى امى و كلمتها و امى قالت لى ما عندى مشكله مدام حا تمشى مع اسراء و حا تكونى معاها انا ما بقلق عليك بس اهم شئ تخلى بالك من نفسك و ما يكون عندك قرايه الليله الجمعه و انتى ما قارياها .. قلت ليها : انا الاسبوع دا كنت بقرأ حاجات الاسبوع دا اول بأول الحمد لله مشيت كلمت اسراء انو امى وافقت مشيت استحميت سريع و صليت الضحى الصبح كان صليتو حاضر و جهزت حاجات الميك اب البحتاج ليها كلها و شلت توب خالتو لبنى ام العروس و لبست عبايه راقيه و بسيطه و مشيت لى اسراء و بعدها طلعنا على بيت ناس العرس .. و صلنا بيت العرس كان فى حى راقى جدآ من احياء الخرطوم و فى الوقت دا كان وقت الفطور فى بيت العرس صوانى داخله و صوانى طالعه و جوطه شديده اسراء ساقتنى على ام العروس خالتو لبنى سلمت عليها و سلمت علي كأنها بتعرفنى من زمان و قعدتنا انا و اسراء فى صينيه و فطرنا و بعدها مشيت لى خالتو لبنى و اديتها التوب قالت لى ارح معاي اشوفو فوق هنا فى جوطه كتيره .. طلعنا الطابق التانى من بيتهم بس كان فى ناس بس ما زى تحت الناس كتار دخلتنى غرفه شكلها غرفتها كانت فاضيه ما فيها زول و طلعت التوب و جربتو و قالت لي خالتو لبنى قالت : وواووو تحفه تحفه و الله رهيب شديد ما اتخيلتو يطلع بى الرهابه دى حقيقه ابدعتى و الله تسلم يدك ان شاء الله بى الجد ما عارفه اشكرك كيف قلت ليها : خجلتينى و الله يا خالتو تسلمى كتير على المدح الحلو دا قالت لى : سبحان الله انا حسيت انك ما شاء الله خبره و كنت واثقه فى انك قدر الثقه دى و حا يكون رهيب كدا يلا حسابك كم انا قلت ليها : ما بيناتنا يا خالتو والله و فى النهايه مشت فتحت دولابها و طلعت لى ربطه من القروش و ادتنى ليها انا قلت : لا يا خالتو القروش دى كتيره كدا حا يكون اكتر من حقى و ما بقدر اشيلها قالت لى خالتو لبنى : يا بت و الله انتى تستاهلى اكتر من القروش دى قلت ليها والله يا خالتو دا ما حقى ما بقدر اشيلو قالت لى شيلى حقك و الباقى اعتبرى هديه منى ليك هديه من خالتك زى امك و اذا رفضتى انا حا أزعل منى و زعلى كعب بعد اقناع من خالتو لبنى حتى رضيت شلت القروش و شكرتها و عايزين نطلع من الغرفه و فى زول كان عايز يدخل الغرفه انا طالعه اتطاقشت مع الزول دا .. انا قلت ليو معليش اسفه بعتذر هو رد على ماف مشكله و بعدها خالتو طلعت من الغرفه قال ليها : امى انتى وين من قبيل بفتش فيك معاى صاحبي حازم عايز يسلم عليك و يبارك ليك خالتو لبنى قالت ليو : كنت هنا فى الغرفه معاك حزوومى ولدى البحبو شديد ارح نسلم عليو طولت منو شديد .. و انا كنت واقفه بي جنبه و بعدها اتلفتت خالتو و قالت لى : لينه بنتى و بنات اخواتى قاعدين تحت ارح انزلى معانا و اود*كم ليهم و فعلا نزلت معاهم خالتو لبنى ساقتنى لى لينه بنتها .. سلمت على لينه و عرفتنى بي نفسها و طلعت فى سنه اولى جامعه و نادت بنات خالتها و سلمت عليهم و عرفتنى بيهم و اتعرفت بيهم طلعو ظريفات و صليت الظهر زى الساعه اتنين و قعدنا نتونس شويه و بعدها .. لينه قالت : يا ريم العقد حا يكون الساعه سبعه فى الصاله و هسه الساعه تلاته عشان نحن كم واحده مفروض تبدى لينا من الساعه اربعه نبدأ عشان نخلص سريع انا قلت ليها : اى والله مفروض نبدأ بدرى عشان انا زاتى مفروض ارجع بدرى قبل ما الليل يجى عشان امى قالت لى ما اتأخر .. انا حا امش اتوضأ و اصلى العصر و بعدها نبدأ فى الميك اب لينه قالت لى :طيب امشى و انا حا امش اجيب ليكم الغداء .. و فعلا لينه جابت الغداء و البارد و انا صليت و هم زاتهم صلو و اتغدينا و شربنا و لينه طلعتنا فوق فى الطابق التانى فى شقة اخوهم قالت لينا اهدا مكان فى البيت .. و الشقه كانت كبيره و رهيبه و فخمه شديد مفروشه فرش راقى .. فتحت لينا غرفه و مشت جابت الميك حقها عندها افخم و اسمح انواع ماركات الميك اب و انا بديت طوالى امكيج فيهم و بديت بي بنات خالة لينه و اخر شئ ختمت بي لينه و كلهم الميك اب حقهم طلع فى رهيب شديد و عجبهم شديد كان هادى و بسيط و منورهم .. بعد خلصت كانت الساعه عامله سته و نص قلت ليهم انا حا امش الوقت اتاخر و انا بخاف ارجع براى لينه قالت لى : و الله يا ريم ما بتمشى لو ما حضرتى الحفله و بعد الحفله نحن حا نوصلك معانا و نود*ك لحدى بيتكم قلت لى لينه : ما بقدر و الله انا ما لى فى الاجواء دى و وعدت امى ما بتأخر لينه تحنس فينى و بنات خالتها يحنسو فينى و اثناء اللحظه دى جاتنا خالتو لبنى قالت لى : ريم مالك ما لبستى عشان حا تمشى معانا الحفله فى الصاله لينه قالت ليها : اتخيلى يا ماما لينه قالت راجعه بيتها هسه دى خالتو لبنى قالت لى : و الله ترجعى نزعل منك و ما نتكلم معاك تانى و انا اعتبرتك زى بتى عايزه تزعلينى منك قلت ليها : و الله يا خالتو ما قاصده ازعلك بس انا قلت لى امى ما حا أتأخر و انا ما عامله حسابي و ما جايبه معاي ملابس لى الحفله خالتو لبنى قالت لى : انا امك دى وعد منى بعد الحفله اوصلك ليها و امش اعتذر ليها على تأخيرك و بي خصوص ملابس الحفله لينه دولابها كلو فساتين تود*ك هسه غرفتها تلبسي منها البعجبك و لو ما وافقتى بعد كدا انا الحا أزعل والله قلت ليها : طيب يا خالتو ما عايزه ا**فك لينه بي فرح ساقتنى من يدى و قالت لى : ارح يلا اوريك الفساتين و تختارى و تجى تتمكيجى عشان الوقت و تتجهزى اسرعى و ساقتنى و نزلنا تحت و نقيف هنا نتلاقه فى الفصل القادم

Free reading for new users

Scan code to download app

App Store Google Play

Facebookexpand_more