تغيرت حياتى إلى

الفصل السابع عشر

تغيرت حياتى إلى

بقلم: ريان عبد العزيز محمد ابراهيم

الفصل السابع عشر

مشيت منهم بدل ما اكوون فى قمة اليأس بقيت فى قمة الامل و التفاؤل بعد شويه جاتنى نغم مشينا حضرنا محاضراتنا و لاقينا معز و معز كان معاو صاحب جديد اسمو احمد زول طيب شديد و عرفنا بيو انا و نغم و انا عرفت انو هو ساب ناس محمود و غسان بس ما سألتو يلا عرفت السبب فيما بعد و حا اوريكم ليو بعدين ...المهم بقينا انا و نغم و معز و احمد شله برانا مع انو معز و احمد فضل ليهم بسيط و يتخرجو مننا بي الجد حا يفرقو علينا لانو هم سندنا فى اى حاجه و الله يلا جات الامتحانات النهائيه بتاعت السمستر الرابع و انا بقيت جسد بلا روح و الكيماووى هلكنى هلاك بمش امتحن و الله ما كنت قادره اقرأ ما مزاج بس و الله انا بقيت ما بقدر اقعد فى السرير دقيقه واحده و ما بقدر اقيف دقيقه بقى عندى قلق شديد و عدم نوم و أرق و القرايه دى غلبتنى لى درجه فكرت اجمد السنه دى بس معز حلف ما يخلينى و قال لى انتى فضل ليك فيها بس الامتحانات دى ما باقى ليك فيها الكتير قلت ليو بس حا أسقط فى نهايتها و حا أربت قال لى ما حا تسقطى و لو سقطتى انتى معدلات التلاته سمسترات الفاتت كلها كانت فى الشرف فا عشانى انا حاولى و انا بقريك (هو كان برضو ممتحن ) قلت ليو انت ممتحن لا قال لى بخصص ليك ساعتين فى اليوم و انا اصلا قريت من زمان المهم غايتو لو ما معز دا ما كنت اظن نجحت كان بدعمنى شديد و بسندنى فى اى حاجه و بحفزنى و الحمد لله عدت الامتحانات و انا اتوقعت خلاص ايامى بقت بسيطه لانو انا انتهيت و الله خلاص بقت ما فينى اى حياة ..يلا بعد الامتحانات اخدت اخر جلسه كيماوى و الله كانت فرح بى النسبه لى ما كنت فرحانه بى إنو خلاص بقيت كويسه و الله كنت فرحانه عشان السم دا خلاص تانى ما فى يلا اخر جلسه دى كل الناس فرحو لى خالاتى و ابوى و امى و اختى واخوى الصغير حتى نغم و احمد و معز كلهم جونى و وقفو معاى و بعد شهر عندى جلسة اشعاع عشان يعرفو المرض لسه فى الجسم و له لا ...المهم النتيجة طلعت و الحمد لله نجحت و معدلى كان ما بطال بس ما كان زى معدلاتى الزمان نقصت شديد بس قدر اخف من قدر و فرحت شديد و شكرت معز بى وقفتو معاى و الله لو ما هو ما كان اظن نجحت بعد كم يوم مشيت لى الاشعاع و عملو لى صور اشعه عامه يلا الدكتور الكنت متابعه معاو فى الذره سافر و تابعنى دكتور بدلو المهم بعد طلعت النتائج مشيت بيها لى الدكتور دا و عاين لى الأوراق و قال لى تابعك دكتور منو حكيت ليو قصتى من بداية مرضى لحدى آخر لحظه قال لى عايزك تانى تمشى تسحبى عينه من حلقك و تجيبى لى التحاليل و يا ريت تمشى معمل قائم بى زاتو ما تمشى معمل جوه مستشفى المهم انا خلاص فى اللحظه د*ك قنعت من اى شئ و كرهت حاجه اسمها تحاليل و معامل و حسيت انو خلاص الحياه كريهه و اتمنيت الموت المهم ابوى كان معاى مشينا مركز متخصص و انا قلت لى ابوى ماف داعى لى كل دا فى النهايه حا يطلع المرض منتشر فى جسمى و تانى حا أرجع لى السم الهارى الاسمو الكيماوى دا ابووى ما رد على و ساقنى و سحبو منى عينه و النتيجه قالو بعد يومين و رجعت البيت و امى و اختى ما اتأثرو كثير حسيت بيهم شكلهم قنعو منى انى حا أموت بعد كدا و انا زاتى مقتنعه انى ميته ميته و نغم و معز اتصلو بي عشان يطمنو على حكيت ليهم الحاصل كلو و قعدو يطمنو فينى المهم بعد يومين النتيجه طلعت و مشينا انا و ابوى لى الدكتور يلا انا خلاص عارفه الدكتور حا يقول شنو ...الدكتور شاف التحاليل و قال زى ما كنت متوقع يلا هنااا كانت الصدمه العمرى ما كنت متوقعاها

يلا تعالو اتصدمو معاى اخليكم مع الدكتور:

انتو يا جماعه ما مفروض تقتنعو من اول تحليل تعملو و بى الاخص لو مرض كان زى المرض انتو مفروض تمشو تعملو كم مره تحليل و فى كم محل مختلف عشان مرات بكون فى خطأ طبى وارد و مرات المختبر دا بغلط فى حاجه و مفروض الدكتور القابلتو دا ما يصدق من اول تحليل انو عندها كدا و احتمال النتيجة طلعت بتشبه كانسر فى الحلق و نفس الاعراض ..ابوى قال ليو هي يعنى عندها شنو بى الضبط

الدكتور قال ليو واضح جدآ من خلال التحاليل انو هى عندها نقص فى اليود و الورم الفى حلقه دا سببو نقص اليود و نقص اليود عمل ليها تضخم فى الغده الدرقيه و اصلا تضخم الغده دا اذا كان تضخم شديد بنعمل ليو عمليه بس هى تضخمها ما كبير و صغير زى شكل حبه و دى كان علاجها اسهل من بسيط كنا بنديها حبوب يود و تطبخو ليها بى ملح اليوود و بعد ايام بتلاحظ بتحسن

طبعا ابوى بقى يقوول حسبى الله و نعم الوكيل و بقى يتشهد

و انا حيلى مات و ما مصدقه الكلام دا و بقيت ما واثقه فى اى دكتور و كرهت الدكاتره و اى حاجه بتخصهم و الدكتور قال لى ابوى من خلال التحاليل العندى انا كنت خايف انو الكيماوى يأثر عليها بس الحمد لله ربنا ستر و ما عمل ليها اى حاجه غير المضاعفات نقص فى الدم و دى عادى بنرفعها بى دربات و الاثار الجانبيه الانتو عارفنها و دى مع مرور الايام بى ترجع زى ما كانت

المهم دا اخر كلام سمعتو قالو الدكتور لى ابوى و تانى ما سمعت اى شئ بقيت فى حالة اللا وعى متخيلين معاى و وعيت لقيت نفسى فى البيت و امى و اختى يبكو شديد ( بكيتهم مرتين فى حياتى لما عرفو بى مرضى و لما عرفو بى شفائى) لكن بكاهم المره دى بكاء فرح و بعد شويه زغردتو بس انا نهائى ما فرحت لى شئ ...اتذكرت لما اصحابي خلونى عشان مرضى و اتذكرت لما محمود الحبيتو من جوه قلبي عشان مرضى و اتذكرت معدل السمستر الرابع الما بشبهنى عشان مرضى و اتذكرت اسوا حاجه الكيماوى عشان مرضى اخ انا حياتى كلها ادمرت عشان غلط طبي و عشان مرض ما جانى و يا ريت لو اى مرض معليش مرض ما عندو علاج و مرض اكعب منو ماف يا ريت لو التحاليل دى ظهرت لى فيها عندى ملاريا و انا اصلا عندى تايفوود يا ريت لو كدا اخف قدر كان .. بس الحمد لله على الحصل لى دا و فعلا ربنا اذا احب عبد ابتلاه و ربنا فعلا بحبنى شديد لانو اول حاجه استفدت منها فى مرضى دا بقيت ما بقطع الصلاه و بقيت مع كل صلاه بقره سورة يااسين و بديت احفظ القرآن و برضو بى مرضى دا كشف لى معادن الناس الاصليه من التقليد و اهم حاجه ورانى ليها الناس العيانين الفى مستشفى الذره و الألم البجيهم من الكيماوى و الاطفال البموتو فى ثوانى بى سبب غلط طبي و حمدت ربنا كتير انى ما قريت مهنه طبيه لانو لو غلطت فى حاجه بشيل ذنب ناس كتتيره فى رقبتى ...المهم ابوى فى نفس اللحظه مشى جاب خروفين و عملو لى كرامه كبيره و عزم كل الاهل و المعارف بس انا كنت مستاءة شديد و ما كان نفسى اطلع لى الضيوف البباركو لى لانى بى الجد بقيت بشعه و امى حنستنى مشيت لى الضيوف اتخيلو الاطفال الصغار بقو يعاينو لى بى نظرة خوف شكلهم خايفين منى انا قعدت شويه و دخلت غرفتى جاتنى نغم قعدت تونس فينى و تغير لى الجوء و حكت لى انو هى ربطت مع احمد و فرحت ليها شديد لانهم الاتنين يستاهلو بعض و اتونسنا و نسيت همى كلوو ...

#**ره عايزه ألفت انتباهكم لى حته مهمه ؛الزول مهما كان جميل الجمال و الله ما دايم و زى ما بقول المثل الجمال جمال الروح دا بى الجد دا الجمال الحقيقى لكن جمال الشكل دا حاجه مزيفه عادى بين يوم و ليله بتلقى نفسك بقيتى ابشع مخلوقه فعشان كدا خلو روحكم الداخليه جميله و ما تهتموو بى روحكم الخارجيه حاولو حسنو داخلكم اكتر من خارجكم و صدقت المقوله البتقول الجمال جمال الروح .

و برضو يا جماعه بوصيكم على الصلاه ثم الصلاه ثم الصلاه حافظو على صلاتكم يخووانا ما تدو الشيطان فرصه فيكم و يمنعكم من الصلاه لانو الصلاه تنهى عن الفواحش و هى الصله بين العبد و ربه .. انتى انسانه مؤمنه و مسلمه الحاجه البتثبت ايمانك و اسلامك دا بين ربك هى صلاتك .. و الناس لازم يكون ايمانها قوى بالله و متقبله امر الله العايزو ليها لو كان خير او شر الانسان ما بي يدو يصنع قدرو و يغير القدر لكن العايزو ربنا هو البكون القدر ...

و بوصيكم بي مرضى الكانسر يخووانا ديل اكتر ناس محتاجين دعم نفسي قبل اى شئ بي النسبه لى اسرهم حاولو وفرو ليهم كل الحاجات البتبسطهم و ابعدوهم من اجواء التوتر و القلق و حرق الاعصاب و وفرو ليهم السلام الداخلى لانو اتوفر ليهم الدعم النفسي الباقى هين و الكيماوى هين .. و اى شخص ظهر ليو مرض لعين او كانسر يا ريت يتريث و يمش يراجع فحوصاتو كم مره و يتأكد من المرض لانو الاخطاء الطبيه وارده و برضو بى خصوص الكيماوى دا حاجه قاسيه شديد الله لا ضوقو لى حبيب و لا لى قريب فأى زول اتعرض لى مرض الكانسر و اتعرض للكيماوى و فقد صحتو و لونو و شعرو ياريت ما تحسسوهم بي كدا و لا تعلقو ليهم على كدا لانو الحاجه دى اثرها النفسي سئ شديد للاسف

نقيف هنا نتلاقه فى الفصل القادم و دمتم سالمين