تغيرت حياتى إلى

الفصل الرابع عشر

تغيرت حياتى إلى

بقلم : ريان عبد العزيز محمدابراهيم

الفصل الرابع عشر

نرجع لى جانب روايتنا ساره الكانت بتفتش شغل

يلا بعد مروان كلم الهام بى ساره العايزه تشتغل الهام مشت عليها و سلمت عليها.. الهام قالت ليها :السلام عليكم

ساره قالت ليها :و عليكم السلام .. الهام قالت ليها : قال لى زوجى بتفتشى لى شغل بتشتغلى بالاسبوع و له بي اليوميه ... ساره قالت ليها : بشتغل باليوميه دائمآ ما حصل اشتغلت بالإسبوع ..الهام قالت ليها : طيب انا حأمسكك تشتغلى معاى باليوميه لكن كل يوم تجى تشتغلى معاى و بحاسبك حساب يوميه كل يوم بتشتغلى بد*ك حسابوانا معاى واحده بالاسبوع بس مريضه و مسافره عند اهلها بعيدين و ما معروف تجى متين ..ساره قالت ليها :طيب بشتغل..و الهام قالت ليها : اسمك منو .. ساره ردت عليها : اسمى ساره ..الهام قالت ليها :طيب يا ساره ادخلى البيت اوريك الشغل عشان تبدى طوالى ..و فعلا ساره دخلت البيت و نضفت ليهم اليوم داك البيت كلو الكلام دا كان فى الفتره الصباحيه زى بعد الظهر كدا جات بنت الهام و مروان من المدرسه الاسمها رنا عمرها قدر ساره بعد رنا جات بيتهم و لقت بنت فى نفس عمرها بتنضف سألت امها منها و امها كلمتها دى الشغاله الجديده الحا تشتغل ليهم فى الفتره دى يلا رنا مشت على ساره طوالى و قالت ليها ..

رنا قالت لى ساره : سلام كيفك

ساره قالت ليها :تمام الحمد لله

رنا قالت ليها : اسمك منو

ساره قالت ليها : اسمى ساره

رنا قالت ليها : انا اسمى رنا و سألت ساره طوالى بتدرسى فى سنه كم

ساره (اتذكرت المأسآة الكانت عايشه فيها و انو عايشه فى ملجأ و انو ما عندها ام و لا ابو و انها ما شافت المدرسه اصلا بعينها و اتذكرت مس نهله و معاملتها معاهم ) بعدها ردت على رنا : انا ما قاعده ادرس

رنا بي براءة قالت ليها : كيف ما قاعده تدرسي بطلى هظار ياخ

ساره قالت لى رنا : انا ما بهظر جاده معاك

رنا قالت ليها :لى ما بتدرسى

ساره ( كانت عايزه تحكى ليها بى البحصل ليهم فى الملجأ و انو ما بخلوهم يمشو يدرسوو بخلوهم يشتغلو فى البيوت بس تانى خافت من تحذيراتهم ليهم و اذا عرفوها كلمت زول ما بتسلم من عقابهم ) ردت عليها : ظروف ما خلتنى ادرس

رنا اتأثرت شديد بي ساره و قالت مع نفسها انا ما كنت احقق معاها كدا فى الأسئله هسه كدا بكون جرحتها و قررت تغير الونسه .. و فعلا اتعرفت ساره بي رنا و عرفت صحبات رنا كلهم و عرفت اهل رنا و رنا ظريفه و طيوبه حبت ساره و كمان ساره برضو حبت رنا .. و ساره خلصت شغلها و ادتها الهام الحساب تبع اليوم و طلعت منهم و مشت مبسوطه شديد منهم لانو لقت بنت طيوبه و ظريفه و محبوبه و فى نفس عمرها و عاملتها حلو و ما حسستها انها خدامه معاهم و لانو كل الناس الانت بتمش تشتغل معاهم كانو بنفرو منها عشان هى خدامه ما عدا رنا .. و رجعت الملجأ و هى مبسوطه و حكت لى صحبتها بي رنا و كانت مبسوطه ..

مرت الايام و كل يوم ساره بتمش لى ناس رنا تشتغل معاهم شغل اليوم و بتخلص مرات بدرى قبل رنا تجى من المدرسه و مرات بتخلص بعد رنا تجى من المدرسه و مرات بتنتظر رنا لما تجى .. فى البيت كانو عايشين رنا و الهام امها و ابوها مروان .. اما اخوهم سامى كان مسافر بره السودان شغال فى امريكا بجيهم كان فى الاجازات بهد فتره بسيطه نازل السودان عندو اجازه .. علاقة رنا و ساره كل يوم ماشه احلى من اليوم القبلو و اى واحده بقت تحب التانيه اكتر من الاولى ..

يلا يوم ام رنا الهام قالت لى رنا : رنا تعالى عايزه اتكلم معاك فى حاجه ..

رنا بهدوء جات لى امها و قالت ليها : نعم يا ماما

الهام قالت ليها : شايفاك الايام دى بقيتى مصاحبه شديد ساره البت الشغاله معانا ياتو يوم بتصاحبي الشغالات كدا

رنا قالت لى امها : يا ماما ساره طيبه شديد و بتتحب و انا حبيتها شديد

الهام قالت لى رنا : برضو يا رنا مفروض ما تتعمقى معاها البنات الشغالات ديل ما مضمونات هسه امكن تكون حراميه اعملى حسابك منها

رنا بتفهم قالت لى امها : حاضر يا ماما مع انو انا متأكده انو ساره دى كويسه ما حراميه

الهام قالت لي رنا :طيب تمام امشى زاكرى عشان امتحاناتك قربت و ما عايزه انا انك تجى التانيه عايزاك دائمآ تجى الاولى و ترفعى راسنا

رنا قالت لي امها :طيب ماشه و مشت تقرأ ..

و مرت الايام و ساره كان نفسها تعرف تقرأ و تكتب و نفسها تتعلم تكتب اسمها و بقت تجى تنق لى صحبتها المعاها فى الملجأ انو عايزه تقرأ و تكتب زى رنا ..

يوم ساره قاعده مع رنا .. ساره قالت لى رنا : يا رنا انا نفسي اتعلم زيك كدا و نفسي اكتب اسمى و اعرف الحروف

رنا قالت ليها : بعلمك طوالى بى العايزاهو بس بعد اخلص امتحاناتى الشهريه و تانى بفضى ليك و ببدأ ليك من الحروف

ساره قالت ليها : طيب تمام لما تمتحنى و بعدها نبدأ

و خلصت شغلها و اتحاسبت و مشت .. فى نفس اليوم دا جاتهم بتهم الكانت شغاله معاهم زمان بس الهام قالت ليها هسه معانا واحده لكن جارتى بي جنبي عايزه شغاله حا اتصل عليها و اخليها تجى تسوقك تشتغلى معاها و فعلا جات جارتهم و ساقتها معاها ..

و مرت الايام و رنا خلصت امتحاناتها و كانت فرحانه شديد انو خلصت الامتحانات و الضغطه الكانت مضغوطاها د*ك الفتره الفاتت د*ك انو خلصت خلاص

و ساره فرحت شديد بي انو رنا خلصت امتحانات و حا تبدأ تتعلم القرايه و الكتابه ..

بعدها رنا بدت تعلم ساره من الحروف و الاستهجاء و بعدها بدت فى كتابة الحروف و ساره كانت عشان ما متمرسه على الكتابه كانت لما تكتب بتحس بي صعوبه شديد و دى اكتر مشكله واجهتها هى الكتابه للحروف و بعد اتعلمت الكتابة تبع الحروف بدأت فى مرحلة تعليم الإملاء .. رنا تقول ليها الحرف و تكتبو ساره و كانت ساره بتتلخبط فى حروف كتيره زى السين و الشين و الحاء و الخاء و الجيم و الصاد و الضاد و الطاء و الظاء و العين و الغين لانهم شكل الحروف زى بعض بس بختلفو فى النقاط حكاية النقاط دى من أكتر الحاجات الكانت ملخبطاها شديد بس مع التكرار بقت تعرف و رنا ما زهجت منها و ما قصرت معاهم و ساره عشان عندها كان رغبه و عزيمه انها تتعلم كانت بتتعلم سريع و مجتهده شديد انها تتعلم و تعرف ..

احلى حاجه فى ساره انها من الشخصيات ذوات الإصرار رغم ظروفها الهى فيها الإ انها كان عندها إصرار و عزيمه شديده انها تتعلم رغم المصاعب المواجهاها دى

و بعد فتره بسيطه شديد ساره اتعلمت كل الحروف بالإنجليزى و بى العربي و بدأت رنا تعلم فيها فى ادخال الحروف و تكوين الكلمات عشان تعلمها كيف تكتب اسمها بس الكتابه صعبه شديد كانت ليها هى عرفت كتابة الحروف بس الغلبها كيف توصل الحروف مع بعضها عشان تكون الكلمات رنا اجتهدت معاها في الحته دى بس تانى رنا انشغلت بي مدرستها و قرايتها و خاصة انو الهام ام رنا كانت معترضه على الحاصل دا بس رنا كانت ما مقصره فى دراستها و ساره ما مقصره فى شغل بيت ناس الهام ..

مرت الايام و سامى و لد ناس الهام جاء نازل السودان اجازه و فى الفتره دى شغل ساره بقى مضاعف و اكتر من زمان لانو الضيوف داخله و طالعه عندهم و فى الفتره دى ساره وقفت القرايه مع رنا و ساره كان بترجع الملجأ منهكه و فترانه شديد و مس نهله كانت متكيفه شديد من ساره لأنها الوحيده البتجيب ليها قروش كويسه كل يوم بس زى ما بقولو هى ما عارفه المطره صابه بي وين و ما عارفه الحاصل مع ساره ساى .. يلا جات فترة الاجازه الصيفيه فى الفتره دى رنا خلصت الامتحانات و اتفرغت لى ساره عشان تعلمها و فعلا بدو شويه شويه و عملو مراجعات و ساره ما شاء الله زكيه ما نست شئ و برضو ساره كانت لما تكون ماشه فى الشارع كانت بتلاقيها كلمات كتيره زى اللافتات الفى الشواع و الفى الدكاكين و الفى الصيدليات كانت بتستهجأ الحروف و تنطقها حرف حرف زى و بعدها بتقدر تعرف الكلمه هى شنو الحاجه دى ساعدتها شديد فى ربط الحروف مع بعضها و قراءة الكلمه .

سبحان الله الطفل من هو صغير و عمرو يا داب اربعه سنه او خمسه سنه بسوقوهو اهلو الروضه بتعلم الحروف و لما يدخل المدرسه بتكون الحروف ساهله بالنسبه ليهو فكل ما الانسان اتعلم صغير كل ما فهم اسرع زى ما بقولو العلم فى الصغر كا النقش على الحجر .. يعنى التعليم لى الانسان الكبير من اصعب انواع التعليم بس ساره لا قرت روضه و لا مدرسه و لا اى شئ بى نسبة انها ما مرت بى المراحل الدراسيه قدرت تتعلم بي سرعه كبيره و دا يعتبر انجاز كبير عملتو فى حياتها ..

اخلى ليكم ساره تحكى ليكم الحصل ليها شنو و بي لسانها هى ..

السلام عليكم اعزائى القراء معاكم الدكتوره ساره متخصصه فى مجال التأهيل النفسي لى مدمنين الم**رات و المتعاطيين عفانا الله و إياكم .. حاليآ شغاله فى مركز دار الأمل لعلاج مرضى الإدمان .. و الإدمان فى الفتره الأخيره دى انتشر بي صوره زريعه شديد للاسف و بقى حاجه عاديه فى مجتمعنا العربي و توزيع الم**رات بكل انواعها و ترويجها بقى يتم بى صوره سهله و بسيطه شديد للاسف نسبة لعدم وجود الرقابه الكافيه من قبل المسؤولين و من قبل الأهل و بى خصوص الرقابه من قبل الاهل دى عدم متابعة الآباء لى ابنائهم و لى تصرفاتهم و سلوكهم و عدم توعيتهم دى من اهم الاسباب البتساعد فى انتشار ظاهرة الإدمان ..فإنت /إنتى كأب و كأم مسؤولين مسؤوليه كافيه عن اولادكم

فأنا كا طفله عمرى كان شهور امى و ابوى اتخلو عنى فى كرتونه و جدعونى فى الشارع قريب من الملجأ العشت فيو و كتبو ورقه و ختوها معاى فى البشكير الكنت ملفوفه بيو و الكلام الكان فى الورقه دا سبحان الله ناس الدار قروهو لى و ورونى بعد كبرت شويه كاتبين لى شنو فيو احتمال قروهو لى لأنهم حابين يغرسو فينى روح الكراهيه ضد اهلى و ضد الناس بس الحمد لله ما إتأثرت و كنت محبوبه شديد من قبل كل الناس الرساله المكتوبه تحتوى كانت على ..( بنتى انا امك اسفه شديد على العملتو فيك انى رميتك للكلاب فى الشارع انتى ضحية غلطه مع ابوكى و انا كمان كنت ضحيه فى الغلطه دى و ضحيه لى إدمان الم**رات للاسف اتربيت تربيه غلط و كنت بعانى من عدم مرقابه من قبل امى و ابوى كانو ادونى الحريه الكافيه جدآ و هم مشغولين بي اشغالهم و سمعتهم و مركزهم و ناسيين تعليم بنتهم و ابسط الحقوق ما كانو موفرنها لى من ناحية القروش و طلباتى اى شئ كان منفذ لى و متاح لى بس لا كنت بعرف الصلاه و لا كنت بعرف التعالييم الدينيه للاسف دخلت الجامعه و اتعرفت على اسوأ شله فى الجامعه و دى كانت سبب دمارى اتعلمت معاهم التأخير و الطلعات و شرب السجائر و بعدها الامور اتطورت و بقيت مدمنه للهيرويين فى البدايه عرضو على اجرب اشم البدره بس انا رفضت بس مع الاصرار منهم و انى انا ماشه معاهم طببعى اتأثر بيهم و الكان بروج الم**رات دى ابوكى للاسف كان بستغل الطلبه الجامعيين و ي**ب من وراهم قروش و اشياء تانيه .. فى يوم كنت عايزه جرعه من الم**ر و شلت كل القروش العندى و مشيت لى ابوك عشان يدينى بس للاسف المره دى استغلانى اسوأ استغلال و رفض يدينى الم**ر بي القروش و استخدم معاى اكعب طريقه و انا عشان كنت مجبوره انى عايزه جرعه من الهيروين و كان الصداع شاقى راسى وافقت و حصل الحصل و انتى بقيتى ضحية الأغلاط دى للاسف

و كانت لحظة ضعف لكن انا غلطانه شديد فى حقك انك تفتحى ما تلقى امك و لا ابوك جنبك انا حبيتك شديد مع انو لسه ما اتعلقت بيك بس انتى حته منى و بنتى بغض النظر عن الطريقه الجبتك بيها فى الدنيا فا زى ما انتى ضحية غلطه انا كمان كنت ضحيه و انا مقرره بعد ناس الملجأ يستلموك حا يربوك احسن تربيه و بتتعلمى احسن تعليم لكن انا ماشه انتقم من كل زول كان السبب فى الحصل دا بداية من ابوك لى الشله الكنت متابعاها و بوصيك انك تتعلمى احسن التعليم و تتعلمى الصلاه و اتفقهى فى التعاليم الدينيه و حافظى على نفسك و ابعدى من الشلل الما نافعه لانهم هم الوحيدين البفسدو و اذا ربنا اكرمك و اتزوجتى ربي اولادك احسن ترببه و راقبيهم و وعيهم و اصلك ما تغفلى عنهم و برضو ما تنسينى و اتذكرينى و ادعى لى بالرحمه و المغفره لأنى حا أموت حأموت و ما تفتشى عنى نهائى .. انا جبت ليك شهادة ميلادك و عملت ليك شهادة ميلاد بس دا ما اسم ابوك الحقيقى الفيها دا اسم واحد ممكن يكون اعز انسان بعد ربنا فى حياتى هو الوحيد الساعدنى فى الحصل لى بعد ما اهلى طردونى و اتخلو عنى بعد عرفو انى حامل موش عشان انا غلطت عشان كانو خايفين على سمعتهم وسط المجتمع الوهمى الهم عايشين فيو و الزول دا هو الاتزوجنى و سترنى ما بمنعك تفتشى عليو بعد لما تكبرى هو ما عايش فى السودان ان شاء الله لما تفتشى تلقيو فى السودان لانو متأكده هو بحبك شديد و ما بقصر منك و انا من اليوم ما حا اكون معاهو لانو مقرره الانتقام و هو ما عارف انى اتخليت عنك فى الملجأ انا متأكده هو حا يفتش علينا الاتنين بس انتى بعد تكبرى جائز تلقيو و تتعرفى بيو بس انا حا يلقانى ميته و الشهاده حقت الميلاد دى طلعتها ليك عشان تقدرى تتعلمى و ما تواجهك مشاكل تحياتى من قبل حنونه إلى بنتى ساره الغاليه على قلبي )

نقيف هنا نتلاقه فى الفصل القادم