الفصل التاسع عشر

2097 Words

تغيرت حياتى إلى بقلم :ريان عبدالعزيز محمد ابراهيم الفصل التاسع عشر الحمد لله كنت موفره لي قروش مشيت لي امى و كلمتها انى عايزه اشتغل فى مكنة الخياطه و عايزه اصلحها ..قالت لى : احسن ليك و الله من شغلة المنقه دى تكوني مرتاحه و قاعده فى بيتك معززه و مكرمه و انا حا اساعدك يا بتى و ادعمك ربنا يوفقك يا بتى ...اللهم امممين يا رب و يخليك لي يا ست الكل يلا يا امى لازم من بكره امش أصلحها ...امي قالت لى : انا عارفه لي زول فى السوق بعرف يصلحها و بعدين هي تقريبا ما خربانه بس عايزه ليها تزييت عشان كانت مركونه من زمن ...طيب لى بكره و ربنا كريم علينا ... اصبحت الواطه بى خيرها و شرها و صحتنى امى انا و رامى نصلي الصبح حاضر ،،،المهم صحينا و صلينا و رجعنا نمنا تانى و صحيت زى الساعه تمانيه و نص صباح لقيت امى صاحيه بترمي ليها فى لقيمات صبحت عليها و مشيت عملت الشاي و رامى برضو صحى و قعدنا كلنا شربنا الشاي بى اللقيمات و قلت لي امي بعد كدا ارح علي السوق ...مشينا السوق و جبنا الراجل البصلح و ما شاء الله فى دقايق صلحها و فعلا هي ما كانت خربانه بس دى الركنه .. يلا بعد اتصلحت انا بقيت محتاره شديد كيف اجيب الزبائن و كيف حا يعرفوني اني بخيط و خلاص حسيت بي الدنيا بدت تصر لي تاني بعد ما بدت تضحك لي... سبحان الله اثناء ما بفكر كدا و شايله هم الدنيا كلو فوق رأسي بابنا بتاع الشارع دق لبست توبي مشيت افتحو هو اصلا كان مقفول بي طوبه كبيره زحيتها و لقيتها دى روان بت خالتى سعديه بتتذكروها سلمت عليها و دخلتها و اتونست معانا مسافه و قالت لينا عرس اسراء أختها فضل ليو خمسة عشر يوم (تتذكروها المشيت خطوبتها ) و الايام جرت شديد و هي ما جهزت حاجه لي العرس طوالي انا سألتها انتى عايزه تشترى شنو قالت لي عايزه اشترى لي فستان لكن فساتين السوق سعرها غالى بس اسراء قالت لي الا نلبس شباين انا و انتى و بنات اهلي القدرنا قلت ليها طيب انا عندي ليك فكره رهيييبه قالت اها قولي قلت ليها انتى عارفاني انا من زمان بحب مجال التطريز و التصميم و انا الايام دى ما شغاله و فكرت انى اخيط فستانين و الحاجات و ماف زول عارفنى اني بعرف فا عشان كدا انا حا أقص ليك و لي بنات اهلك و انتو اختارو القصه و وروني ليها و انا بعملها ليكم و كدا الناس حا تشوف القصه و تعلق عليها و انا طبعا واثقه من نفسى حا تعجب الناس رأيك شنو قالت : ياخ ربنا يخليك لي اقسم بى الله انا كنت ما عارفه اعمل شنو و بعدين انا بعرفك جنك الشغل دا حا أكلم اسرا و اكلم بنات اهلي و بنجيب ليك القماش و القصه العاوزنها و من هسه نتفق فى سعر الفستان ...قلت ليها : روان يا حبيبتى نحن اكتر من اخوات و بينا اكل ملح و ملاح ما عايزه لا قرش لا تعريفه منكم و انتى بى المناسبه كدا خدمتينى انا المفروض أشكرك ما انتى لانك حا تجيبى لى الزبائن قالت لى : لا ما ينفع الشغل شغل و لو ما حا تشيلى قروش من هسه وريتك ما بجيك ...قلت ليها : طيب حا أشيل منكم بس بى شرط ...قالت لي : اشرطي ...قلت ليها : حا أعمل ليكم تخفيض ..قالت لي :خلاص تمام موافقه طبعا روان دى سهلت علي شديد يلا يوم بكره مشيت لي ناس خالتي سعديه معاهم امي و ناس من اهلهم قاعدين يخبزو لي العرس قعدت اساعد فيهم و جات اسرا العروس اتونست معانا و بعد شويه جات رؤي و قعدت جنبي و قالت لي بكره حا أمش اجيب ليك القماش مفروض امش الليله بس بنات خالتى العايزين يلبسو معاي قالو لي بكره ..قلت ليها :طيب ماف اى مشكله ،،زكرتيني عايزه اسألك المعاك كم بت ؟ قالت لي : تلاته بنات قلت ليها : كويس تلاته بنات كان كنتو اكتتر من كدا كنت ما حا ألحق اخلصهم فى وقتهم و ديل هسه بحاول انجز ليكم فيهم ...فى واحده من النسوان القاعدات من نسوان اهلهم قالت لي انتى بتشتغلي خياطه ؟ قلت ليها : اى قالت لى : بتعرفي تطريز قلت ليها : اى بعرف ليو قالت لي : عندى توب جديد ساده و عايزه اعمل فيو شغل بس ما عارفه كنت اوديو لي منو قلت ليها :جيبى لي انا و جيبى الكُلف الانتى عاوزاها من السوق و بعملها ليك فيو ..قالت لي : طيب يا بتى بكره بجيبو ليك ...و سألتنى ساكنه وين قلت ليها جنب ناس خالتو سعديه قالت لي :خلاص بجيبو ليك عند ناس سعديه و معاو الكُلف انتى تعالى شيلي منهم قلت ليها :ان شاء الله ..قالت لي : اها بكم ؟ قلت ليها : ما بنختلف يا خالتو قالت لي : طيب التسليم متين عشان انا عايزه لي العرس دا ...قلت ليها بعد اسبوع ان شاء الله ..خالتو سعديه قالت لي: و الله ما شاء الله يا ريم يا ست الحريم بقيتى مصممه كبيره قلت ليها : شوفتى كيف يا خالتو قالت لي : انا عندى توب برضو ساده جابو لي فى شيلة اسرا عايزاك تشتغلي لي شغل راقى يليق بى أم العروس و كدا قلت ليها :حاضر من عيوني ديل قالت لي : تسلمي لي يا بتى .. اسراء قالت : و انا كمان عايزاك تقصى لي فستانى بتاع الجرتق قلت ليها ؛ من العين دي قبل العين دى قالت لي : تسلمي يا رب وانا واثقه من شغلك عشان كدا ما حا اودى لي خياطه تانيه قلت ليها : تسلمي يا حبيبتى ....روان قالت لى: عشان تعرفي انا بت بركه شايفه الزبائن كيف بقو ما شاء الله .. قلت ليها: اى و الله كلو بى فضلك انتى متخيلين معاى العرس فضل ليو اربعة عشر يوم و انا بى إعتبارى باديه يا دوب فى المجال دا حا يأخد معاى زمن كتير انا كنت شايله هم فى حكاية اني اخلصهم قبل الزمن و شايله هم فى اني ما أتقنهم على أتم وجه و اخربهم بس كانت جواى طاقه ايجابيه كدا حفزتنى و شجعتنى اني حا أنجح فيهم و حا تعجبهم و عندى دافع اقوي من الهواجس الجاتنى فجأه دى و عندى ثقه في ربنا انو حا يقيف معاى و اكون قدر الثقه دى #**ره عايزه اقول ليكم حاجه اصلا الدنيا دي يوم ليك و يوم عليك ..فى اليوم الليك ما تنسى اليوم العليك ..و فى اليوم العليك ماتنسى اليوم الليك ..ركزو معاي فى الحته دى ...انا يوم كنت خايفه ما ألقى الزبائن و كدا فوضت امرى لي الله و وثقت فيو و سبحان الله ما خذلنى نهائي عشان كدا يا جماعه لازم نخلي ثقنا في ربنا تكون قويه و لازم نصبر علي الدنيا سواء بى خيرها و له سواء بشرها و اصلو ربنا ما بخزلنا المهم فى يومى داك بعد رجعت من ناس خالتى سعديه مشيت السوق اشتريت لي خيوط كتيره جميع الألوان و اشتريت مقصين و اشتريت متر عشان اقيس بيو... بكره من الصباح جاتنى روان و جابت لي الاقمشه و جابت معاهم الكلف و جابت معاها بنات خالتها ...اخدت مقاسهم و وروني قصاتهم اى واحده اختارت قصتها براها الا روان قالت لي قصى لي على ذوقك ما عارفه لي قصه معينه و سألوني من مواعيدهم متين قلت ليهم ما عارفه و الله متين حا أخلصهم بس ان شاء الله بحاول انجزها ليكم ... #**ره: هم اصلا شباين نفس القماش و اللون بس قصة كل واحده مختلفه .. يعنى حكايه اى قصة اى واحده براها دى متعبه شديد لو كانو نفس القصه كان حا تكون اخف قدر لكن حكاية الاختلاف دى بتجبرنى اني لازم اطلع لي أى واحده قصتها بنفس الطريقه العايزاها و متخيلين معاي انهم اختارو قصاتهم من التلفون و انا شوفت القصه و رسمتها ،،،ما كان اصلا عندى تلفون بقيت بفكر اني احتمال اكون رسمتها غلط يعنى بى الجد كنت محبطه شديد و فى حاجه جواي بتقول لي خلي ثقتك بربنا قويه و اكيد ما حا يخزلك ..طوالى فى لحظتى د*ك بديت أشتغل بى فستاتين بنات خالة روان اثناء ما أنا شغاله كدا باب الشارع ضرب امى فتحتو ...سمعت صوت خالتى سعديه بعد شويه جاتنى جوه الغرفه سلمت علي و جابت لي توبها و توب المره ...و ورتنى عايزنهم كيف خليتهم على جنب و واصلت فساتين البنات .. بقيت مواصله كدا فتره طويله بقوم وقت الصلاه بس بتوضى و اصلي و اشرب لي مويه ...امي تجينى كل دقيقه تجيب لي اكل بقول ليها بعد اخلص فى النهايه زهجت منى و جات قالت لي حريقه فى الشغل دا صحتك اهم عندى من الدنيا و ما فيها عايزه تشتغلي و بدون اكل عايزه تموتي لي بس الشغل ...طوالى قمت مشيت المطبخ اكلت لي **ره بى ملاح مع اني كنت شبعانه حماس و طاقه ايجابيه مرت خمسه ايام وخلصت التلاته فساتين ما حا اقول ليكم طلعو كيف حا اخلي ليكم اسيادهم يقولو رأيهم فيهم و طوالى بديت اشتغل التياب بتاعت خالتو سعديه و المره و الحمد لله قدرت اخلصها فى يومين لقيت شغلها ساهل ما صعب و مسلي شديد (اصلا دى هوايتى)ما زي شغل القص متعب و صعب شديد ...و بي كدا السبعه يوم الوعدتها لي المره خلصت و مفروض تجي تشيل توبها ....يلا فضل لي فستان روان يلا حاليا ما كان عندي اي افكار و ما عارفه اعملو ليها كيف فى النهايه قلت كدي احسن احاول ارسم لي رسمه سبحان الله مسكت القلم كدا لقيت نفسي برسم كأني عارفه الرسمه العايزه ارسمها و بعد شويه لقيتها ابداع الرسمه عايزه ابدأ ارسم كدا بابنا بتاع الشارع ضرب امى كانت ما فى البيت كانت مع ناس خالتى سعديه مشيت فتحت الباب طلعت دى روان ..سلمت عليها و دخلتها البيت جوه و ضيفتها و وريتها فساتين بنات اهلها عجبوها شديد و وريتها توبها و توب المره قريبتها .. قالت لى روان : و الله يا ريم طلعتى مبدعه شديد ما قايلاك خطيره كدا ربنا يحفظك ان شاء الله قلت ليها : هسه انا مبتدئه لكن لما امارس الخياطه و التطريز بشكل مستمر و كتير حا أظبط اكتر و ببدع ان شاء االله روان قالت لي : والله صراحه هسه شغلك ما فيو كلمه .. روان كانت شايله معاها كيس فيو قماش مدتو لى و قالت لى : دا قماش ليك انتى هديه من اسراء اختى عشان عايزاك تلبسي معانا نفس لون فساتينا و دا قماش اسراء حق فستانها بتاع الجرتق الحا تلبسو مع توب الجرتق قالت ليك عشان هى محبوسه ما حا تقدر تجيك عشان محبوسه لو فضيتى تعالى ليها فى بيتنا عشان تشيلى المقاس حق فستانها قلت لى روان : والله ما كان اسراء تتعب نفسها و تجيب لى قماش بالغت و الله كدا انا بزعل منها .. و بي خصوص فستانها حا امش ليها هسه اشيل المقاس و اظبطو ليها روان قالت لى : يا بت انتى هبله انتى زى اختنا و اكتر كمان و اسراء اشترت لى و اشترت ليك ما ت**فيها و شيلى و ابدى قصى لى نفسك الوقت ما بكفى قلت لى روان : كتر خيركم و الله مهما عملت ما بقدر اجازيكم و الله و وريت روان فساتين بنات اهلها عجبوها شديد و وريتها الرسمه المن خيالى عملتها و عايزه اقص ليها بيها الفستان عجبتها شديد و اتحمست تشوف الفستان حا يكون كيف بعد شويه امى جات من ناس خالتى سعديه قعدت اتونست معانا و بعدها كلمت امى انو ماشه لى ناس خالتى سعديه عايزه اخد المقاس من اسراء و ادى خالتى سعديه توبها و توب المره المعاها و اديت روان فساتين البنات .. بعد مشينا بيت ناس خالتى سعديه لقيت اسراء كانت نايمه صحت يا دوب من النوم سلمت عليها و اتونست معاها و شكرتها على القماش الهدتو لى و شلت القلم و الكراس و المتر معاى و سألتها من القصه حقت الفستان عايزاها كيف ورتنى القصه طوالى رسمتها فى الكراس و شلت المتر أخدت مقاسها و سجلتو فى الكراس و اتونست شويه وخالتى سعديه عجبها التوب شديد و شكرتنى و بعدها مشيت على البيت كان وقت صلاة العصر اتوضيت و مشيت صليت و امى كانت فى المطبخ بتعمل فى الغداء و رامى كان نايم جاء من المدرسه و نام طوالى مشيت ساعدت امى و اتجمعنا كلنا فى الغداء و اتغدينا و عملت شاى احمر بي نعناع يظبط لينا راسنا و مشيت على شغلى .. بديت طوالى فى فستان روان اصلا قصتو كان ما صعبه شديد الفستان كلو ساده فيو نفشه فى النص و معاها ت**ير للقماش من الخصر لى نهاية الفستان بشكل كبير بس دى كل القصه بسيط و راقى شديد كنت متحمسه شديد فى قصتو و اظبطو ليها زى .. اجتهدت شديد فى اليوم دا و انجزت شغل كتير فى فستان روان بكره ان شاء الله بخلصو ليها و احلى حاجه مخليانى اشتغل بي سرعه هو الحماس كنت متحمسه و متفائله شديد انو ربنا حا يوفقنى فى الشغل دا .. قال تعالى : ( تفاؤلو بالخير تجدوه ) صدق الله العظيم من هنا حابه اوصل ليكم رسالة انو تكونو متفائلين ابعدو من اليأس و ابعدو من الان**ار و عدم التفاؤل لانو اليأس بيؤدى الى اليأس اى انسان بجذب الحاجه الهو بفكر فيها فعشان كدا فكرو فى السمح و الحلو عشان ربنا يجذبو ليكم و نقيف هنا نتلاقه فى الفصل القادم

Free reading for new users

Scan code to download app

App Store Google Play

Facebookexpand_more