ISANG LINGGO ANG nakalipas at nailibing na rin ang Itay ni Rosallia. Dahil doon, kailangan na niyang bumalik sa mansiyon ng mga Del Valle para muling manilbihan na agara naman niyang ginawa. Imbis na magluksa pa sa pagkamatay ng butihin niyang Itay, mas pinili na lang niyang magtrabaho. Masakit pero unti-unti na rin niyang natatanggap ang nangyari sa Itay niya dahil kung iyon talaga ang nakatadhana rito, wala na siyang magagawa pa.
Malalim na napahinga si Rosallia saka ipinagpatuloy ang pagpupunas ng lamesa sa kusina. Kakatapos lang nilang kumain ng gabihan kaya naglilinis na siya habang ang si Janine at Mean naman ay naghuhugas ng plato samantalang si Annie ay nagwawalis ng marmol na sahig.
"Nga pala, napansin niyo bang parang hindi na umuuwi si Sir. Nate?" mayamaya pa'y tanong ni Janin
