- ARTHUR -
AFTER kong makausap si Kristen at malamang narito rin daw si Chantal sa Amerika ay nagmadali na akong puntahan siya. Malapit lang ang ospital na kinaroroonan ng kapatid ni Chantal sa Condo na tinitirahan ko. Kaya wala pang isang oras narating ko ang ospital.
Nakasalubong ko si Tita Allie na palabas na ng hospital. Halatang nagulat siya ng makita ako.
"Hi po Tita Allie. Kamusta po?" bati ko kay Tita Allie. Mabait ang Mommy ni Chantal tulad din ng Daddy niya. Lagi akong welcome sa bahay nila noon kapag dinadalaw ko si Chantal. Madalas pa nga na doon ako kumakain ng tanghalian hanggang hapunan kapag Linggo. Iyon kasi ang araw na madalas kung bisitahin si Chantal kasi wala akong trabaho maghapon.
"Oh Arthur, ikaw pala iyan! Nakalimutan kong narito ka rin nga pala sa Amerika."
