البارت السابع

2414 Words

طلع النهار وزين صحى على صوت تليفونه قام بص فيه لقاه الحاج طلعت زين رد : الو ازيك ياحاج عامل ايه طلعت : الحمد لله انت عامل ايه دلوقت يابنى زين : الحمد لله احسن انت اخبارك ايه ياحاج طلعت ؛ اهى ماشيه من بعد الموضوع اياه والشغل بقى ضعيف مش زى الاول قولى يازين مش ناوى ترجع زين : انشاء الله ياحاج عندى مشكله اول ماتتحل هرجع على طول طلعت : خير يازين لو فى حاجه اقدر اعملها قولى وانا اساعدك زين : تسلم يارب الموضوع مش مستاهل وهيتحل قريب باذن الله طلعت : طيب انا مستنى رجوعك زين : تمام ياحاج انشاء الله طلعت : ماشى يازين لو احتاجت حاجه قولى يالا سلام زين : مع السلامه قفل زين معاه وقام يشوف ياسين صحى ولا لسه ويادوب هيطلع لقى ليليان فى وشه زين اتفاجأ : ايه ده لى لى عندنا يامرحب ليليان ضحكت : يامرحب بيك انت دا بيتى ولا نسيت زين ابتسم : انسى ازاى بس دى حاجه تتنسي !! عم حسن فين دلوقت ليليان بزعل : انا جايه علشان كده بابا باين عليه التعب يازين ولو فضل كده هيقع من طوله وانا مش عارفه اعمل ايه زين وقف قصادها : انا هحاول اقنعه معدش يبات فى المستشفى وكفايه عليه طول النهار ليليان بدموع : انا متشكره قوى يازين مش عارفه من غيرك كنت عملت ايه زين : متقوليش كده يارتنى فعلا اقدر اعمل حاجه تفوقى بيها ليليان : انا معتش عندى امل انى ممكن افوق تانى ياريت اموت علشان ابويا يرتاح من عذابه ده زين بسرعه : ماتقوليش كده انتى هتعيشى وهتبقى كويسه وهتتجوزى وهتكونى احلى ام فى الدنيا ليليان بصتله بحب باين جدا فى عنيها : تفتكر ده هيحصل يازين زين : انشاء الله انا عندى ثقه فى ربنا انك هتكونى بخير ليليان : يارب !! انا هرجع المستشفى ومتنساش تكلم بابا زين ابتسم: حاضر مش هنسى ياسين كان واقف ورى زين من اول حواره مع ليليان ويادوب زين بيلف لقاه واقف مربع ايده : مالك واقف كده ليه ياسين : انا لولا عارف الحوار كنت قولت عليك مجنون وانت واقف تكلم نفسك كده !! هى مشيت ؟ زين : اه رجعت المستشفى .. على فكره انا اسف لو اتعصبت عليك امبارح ياسين ابتسم وقرب منه : ولا يهمك مانا الحيطه المايله بتاعتك زين ضحك : لا يا راجل على اساس انك مراتى الى مزهقها فى عشتها ياسين رفع صوته زى الستات : والله لرفع عليك قضيه نفقه واشحطتك فى المحاكم ياظالم زين ضحك بصوته كله : يخرب شيطانك دانت عديت هبلى ياسين ضحك : البركه فيك من عاشر القوم (ياسين اتكلم بجد ) قولى يازين ناوى تعمل ايه مع ليليان زين : والله ماعارف اعمل ايه (بصله قوى وسكت شويه) انا حلمت بملك امبارح ياسين : حلمت بايه .. زين حكاله الحلم : بس مش فاهم كان قصدها ايه وايه الى فايدى اعمله علشان هى تفوق ياسين : سيبها للقدر يكمل لعبته معاك واكيد عنده الحل زين : تفتكر ياسين : بعد الى شوفته معاك افتكر قوى. المهم تعالا نفطر ونروح لعم حسن الراجل ده صعبان عليا قوى زبن : لسه ليليان بتقولى انه تعبان وعايزانى احاول معاه يرتاح ياسين : طيب يالا نفطر ونروح ******************* زين راح المستشفى هو وياسين وفعلا قدر يقنع عم حسن انه يروح كل يوم ينام ويستريح ويرجع الصبح تانى بعد يومين ياسين رجع القاهره تانى بس بيتصل يطمن على زين وليليان كل يوم عدى شهرين وهما لسه على نفس الحاله وفى ليله زين كان سهران فى البلكونه بيفكر فى ليليان الى بقاله كام يوم مش شايفها وفجاه لاقى ليليان قدامه زين بسرعه: ليليان انتى كنتى فين بقالك كام يوم مش شايفك ليليان : معرفش يازين زين استغرب : يعنى ايه متعرفيش !! ليليان : يعنى معرفش انا اخر حاجه فكرها لما كنا فى المستشفى تقريبا من تلات ايام زين قلق : انا مش عارف اعمل ايه علشان تفوقى وترجعى للدنيا تانى ليليان بحزن : الظاهر مافيش فايده يازين زين قلبه وجعه قوى وتخيل لو قام فجاه ومشفهاش تانى قبل مايقولها الى حاسس بيه راحلها ووقف قدمها : لى لى فى حاجه كنت عايز اقولهالك ليليان بصتله : قول يازين زين : من يوم ماشوفتك اول مره وانتى طلعتينى من حزنى معرفش ازاى لقيت نفسى كل تفكيرى فيكى وكل همى ازاى ارجعك للدنيا تانى مكنتش عارف السبب بس مع الوقت ولما غبتى عنى الكام يوم الى فاتوا رغم ان جسمك موجود فى المستشفى بس كنت حاسس ان ناقصنى حاجه والحاجه دى هى السبب انى عايش لحد دلوقت ليليان انااا زين سكت وليليان مستنيه يكمل : انت ايه يازين زين بصلها قوى: انا بحبك قوى يالى لى ليليان دموعها نزلت : تعرف ان كان نفسى اسمعها منك من يوم ماشوفتك رغم انى كنت بعاند فيك بس كنت حاسه انى من غيرك ماليش وجود زين : انا كل حلمى حاليا انى اللمسك واخدك فى حضنى ليليان :ياريت يازين انا حاسه انك لو قدرت تلمسنى بجد هفوق من كل ده زين بصلها : انا املى كبير فى ربنا وحاسس انك هتفوقى قريب قوى ليليان : يارب يازين يارب نفسى اكمل حياتى معاك زين قلبه وجعه وخاف يتحرم منها هى كمان بس حاول يطمن نفسه انها هتفوق وهتبقى كويسه : انشاء الله ياحبيبتى كل حاجه هتبقى كويسه ليليان كان نفسها تقوله انها هى كمان بتحبه بس معرفتش وخافت فسكتت ومتكلمتش ___________________________ سعيد دخل على الباشا الكبير يبلغه اخر اخبار شغلهم الباشا : عملت ايه ياسعيد فى البضاعه سعيد : تمام ياباشا كلها اتسلمت للتجار والفلوس اهى الباشا : كام دول سعيد : اربعه مليون ياباشا الباشا : ليه ياسعيد دول ناقصين مليون سعيد : مانت عارف ياباشا الدنيا بايظه من يوم الموضوع اياه والتجار خايفين يتعاملوا معانا فبتساهل معاهم فى السعر علشان مايروحوش بره الباشا بغيظ : يعنى مش كفايه الخساره الى خسرتها فى البضاعه الى اتمسكت لا وكمان افضل اخسر فى كل بضاعه اجبها سعيد : معلش ياباشا فتره وهتعدى وهنرجع زى الاول واحسن الباشا : مش باين ياسعيد المهم قولى اخر اخبار زين الكلب ايه سعيد : لسه عوف قافل معايا وقالى انه زى ماهو من المستشفى للبيت والع** الباشا : انا مش عارف مين الى لزقلها دى يعرفها منين على حسب معلوماتى انه ميعرفهاش سعيد : والله ياباشا انا مش عارف احنا مستنين ايه مانخلص عليه ونخلص الباشا : مش هينفع نفتح علينا العيون لو اتقتل وبان انها جريمة قتل مش هنخلص لكن لو كنا عملناها انتحار كانوا هيقولوا من زعلوا على مراته موت نفسه بس هقول ايه الكل شايفه بقى احسن ورجع زى الاول انا هتجنن سعيد : اصبر ياباشا ووقته هيجى هيجى الباشا : ادينى صابر اما اشوف اخرتها المهم عايزين نضبط العمليه الجايه البوص الى بره لسه مكلمنى وانا فى دماغى خطه جديده انما ايه تمام سعيد : ايوا كده ياباشا خلينا نعالى الدنيا من حوالينا ******************** عدى شهر كمان وكالعاده زين فى المستشفى مع عم حسن وروح ليليان الى مش بتفارق زين وقفه جنبه دخل عليهم الدكتور المسؤول عن حالة ليليان علشان يفحص ليليان عم حسن وقف جنبه وساله : مافيش جديد يادكتور ماجد ماجد باسف : والله ياعم حسن انا قولتلك من الاول ان جسمها سليم ومش عارفين سبب الغيبوبه ايه لحد دلوقت بس للاسف بدال عدى عليها كل الفتره دى ومافقتش يبقى لازم وسكت مكملش زين قرب عليه : لازم ايه يادكتور ماجد : لازم نفصل عنها الاجهزه ونشوف رد فعل جسمها ايه زين قلبه اتقبض : ولو مافقتش !! ماجد : يبقى للاسف ده نصيبها عم حسن بحزن: يعنى خلاص بنتى هتروح منى بعد كل ده زين بعصبيه : مش هيحصل ليليان هتبقى كويسه انا عارف (وبص ليليان الى وقفه مش عارفه مصيرها ايه ) ماجد : انا اسف بس فى دكتور جاى دلوقت مخ واعصاب هيكشف عليها قبل مانرفع جهاز التنفس عم حسن بص لزين بحزن:سيبهم يابنى يشوفوا شغلهم وكفايه نعذب فيها اكتر من كده زين بعصبيةقرب لعم حسن : هتبقى كويسه صدقنى متخفش ليليان هتبقى كويسه دكتور المخ والاعصاب دخل لقى الكل متوتر والخوف باين عليهم قرب من عم حسن الى دموعه نزله ووقف قدامه ولانه سمع من المستشفى عن الراجل الطيب ده الى مش بيفارق بنته من يوم ما دخلت وقف قصاده وقاله : مالك ياعم حسن انت راجل مؤمن والى سمعته عنك ان املك فى ربنا فوق كل حاجه عم حسن : ونعمه بالله ربنا رحمة واسعه وهوعالم بحالى وعارف انى ماليش غيرها فى الدنيا ليليان واقفه سامعه كلام ابوها وشايفه حالة زين الى قرب ينهار دموعها نزلت لان مافيش بايدها حاجه تعملها الدكتور قرب من جسم ليليان وفحص عنيها وقلبها وكل حاجه فيها وبص لدكتور ماجد : انا شايف ان كل حاجه كويسه يعنى فى امل كبير زين ابتسم : بجد يادكتور يعنى ممكن قلبها يفضل شغال من غير الجهاز الدكتور : انشاء الله ادعولها دكتور ماجد قرب من جسم ليليان وبدأ يرفع جهاز التنفس لحد ماخلص وبص على مؤشرات جهاز القلب لقى ان نبضات القلب بتقل بص للدكتور الى معاه : دكتور اسامه نبضات القلب بتقل اسامه قرب منها : استنى ممكن يكون اثر ماشلنا التنفس زين واقف قلبه هو الى هيقف وعنيه على جهاز القلب الى عمال يقل ويقل بص لليليان الى واقفه وقالها ودموعه نزله : اتمسكى ياحبيبتى علشان خاطرى ليليان بدأت تختفى : مش عارفه يازين زين : حاولى على قد ماتقدرى ليليان بصتله شويه : زين انا بحبك قوى وفجاه اختفت وجهاز القلب صفر ان قلبها وقف دكتور ماجد جرى عليها يعملها انعاش لما لقى مافيش استجابه وقف وبص لعم حسن بحزن ومش عارف يقوله ايه عم حسن قعد على اول كرسى قا**ه ومنطقش ودموعه نزله زى المطر زين جرى عليها زق الدكتور وقرب عليها مسك وشها : لا لا لا ليليان قومى ياحبيبتى مش هتسبينى انتى كمان لى لى قومى علشان خاطرى انا لسه عايز اقولك حاجات كتير قوى مش انتى قولتلى مش هتسيبنى لوحدى انا هموت من غيرك صدقنى ومره واحده قرب منها وباسها بكل الخوف الى جواه انها تسيبه يرجع تانى لقهرته دكتور ماجد حاول يبعد زين الى ماسك فى ليليان مش عايز يسبها : ارجوك مينفعش كده حرا ومكملش كلامه لما سمع صوت جهاز القلب رجع يشتغل تانى بص على الجهاز مش مصدق الى سمعه ليليان قلبها رجع ينبض زين بص لماجد بزهول : فى ايه ها !!! هى قلبها نبض ولا انا متهيألى دكتور ماجد قرب عليها : طيب قوم كده ابص عليها زين قام من جنبها وماجد قرب عليها لقى الجهاز فعلا متوصل للقلب يعنى الى بينبض ده قلبها شويه وليليان بدأت تحرك ايدها ورموشها بتتحرك بالراحه لحد مافتحت عنيها عم حسن مش مصدق نفسه ودموعه زادت ونزل سجد على الارض يشكر ربنا ليليان بصت حوليها والخوف ظهر على ملامحها وبدأت تتكلم بتقطيع : ااانا ف----ين ب---ابا ع---ايزه ب---ابا عم حسن جرى عليها يحاول يطمنها لما لقها مرعوبه : انا اهو ياقلب ابوكى معاكى وجنبك متخفيش ليليان حضنته قوى وبدات تعيط وتترعش : بابا ك----ونت فين ش---وفت ك--انوا عايزين يخ*فون------ى عم حسن : اهدى ياحبيبتى اهدى مافيش حد يقدر يقرب منك انا معاكى اهو ليليان بصت لقت الدكاتره واقفين خافت اكتر : بابا مين دول ابعدهم عنى عايزن منى ايه عم حسن بص لدكتور اسامه : هى مالها فى ايه دكتور اسامه : واضح انها عندها صدمه متاخره هديها حقنه تهديها علشان تحاول تستوعب الى حوليها كل ده وزين واقف مسهم مش عارف يفرح انها فاقت ولا يحزن على انهيارها الدكتور عطاها الحقنه وبدأت تهدا وتنام شويه بشويه عم حسن قام من جنبها وراح لدكتور اسامه : هى ليه عملت كده الموضوع عدى عليه اكتر من تسع شهور اسامه : بالنسبه لينا الموضوع عدى عليه تسع شهور لكن هى لسه الموضوع حاصل معاها من دقايق زين : ازاى ياعنى انت عايز تقول انها طول الفتره دى مش مستوعبه حاجه منها اسامه : اكيد هو لو حضرتك اخدت منوم ونمت يومين مثلا يعنى نمت السبت صحيت الاتنين هتحس باليومين الى عدوا حصل فيهم ايه ولا هتحس انهم عدوا عليك دقايق زين وعقله تايه وقلبه بدأ يخاف : لا مش هحس اكيد اسامه : هو ده بالضبط الى هى حاسه بيه كأن معداش عليها وقت ومهمتنا اننا نمهدلها الفتره الى عدت عليها يعنى نفهمها بالراحه انها كانت فى غيبوبه بقلها تسع شهور علشان ميحصلهاش صدمه ونخش فى متاهه تانيه عموما الحمد لله الى جت لحد كده والف حمدلله على سلامتها (وقرب من زين ) هو انت تقربلها ايه زين مش عارف يقوله ايه عم حسن لحقه : خطيبها !! بتسال ليه يادكتور اسامه ابتسم لزين : مش عارف اقولها ازاى بس واضح ان روحها متعلقه بيك فكرتنى بحكايه الاميره النائمه زين ابتسم وبص على ليليان : الظاهر كده يادكتور اسامه : حمد الله على سلامتها مره تانيه انا هروح مكتبى واول لما تفوق نادوا عليا هى قدمها حوالى ساعتين وتفوق عم حسن بفرحه : الله يسلمك ... الله يسلمك حاضر اول لما تفوق هنادى عليك الدكاتره مشيوا وعم حسن قرب من زين : انا مش مصدق ان ليليان اخيرا فاقت يازين حاسس انى بحلم زين : لا مش حلم ياعم حسن ليليان فاقت وهتبقى كويسه انشاء الله عم حسن رفع ايده للسما : يارب كمل شفاها على خير بص لزين : انا لحد دلوقت مش فاهم حاجه معقول تكون فعلا روحها كانت متعلقه بلمسه منك يازين زين بص لليليان الى نايمه زى الملاك :الظاهر كده ياعم حسن مكتبلى هى تخرجنى من حزنى وانا افوقها من نومها عم حسن : انت حبتها يازين ؟؟ زين بصله قوى وسكت شويه : مش عارف امتى ولا ازاى بس حبتها قوى مش عارف لو مكنتش فاقت كنت عملت ايه عم حسن طبطب على كتفه : ربنا يخليكم لبعض واضح ان هى كمان بتحبك زين افتكر لما قالتله قبل ماتختفى انها بتحبه وابتسم عم حسن راح اتوضأ وصلاه رجعتين شكر لله وزين قام صلى معاه خلصوا صلى عم حسن قعد يقرأ فى المصحف وزين خرج يكلم ياسين زين : الو ايوا ياياسو ياسين استغرب : ياسو لا دانت كده مبسوط قوى خير يارب زين : فرحان قوى ياسين ياسين : اوعى تقول !!!معقول ليليان فاقت زين ابتسم : اه الحمد لله فاقت ياسين فرح جدا : الف حمد وشكر ليك يارب انا كنت مرعوب الصراحه بس الحمد لله زين : انا عارف ياحبيبى انك كنت خايف يجرلها حاجه علشانى بس اهو الحمد لله فاقت هو بس واضح ان عندها صدمه ياسين : صدمه !!! ليه زين : اول لما فاقت ______(حكاله الى حصل والى الدكتور قاله ) بس وقال شويت وقت بس مش اكتر ياسين قلق : طيب ازاى هى مش المفروض كانت معاك على طول يعنى عارفه ان بقالها وقت كبير فى غيبوبه زين كان طول الوقت بيفكر فى الكلام ده بس مش لاقى رد : مش عارف ياياسين ممكن يكون اثر مافاقت وشويه وترجع زى ماكانت ياسين بقلق: يارب زين : هقفل معاك وهبقى اطمنك ياسين : ماشى سلام زين قفل معاه ودخل لقى عم حسن مش فى الاوضه عرف انه اكيد فى الحمام راح قعد جنب ليليان وملس على خدها وابتسم : لو كنت اعرف ان علشان تفوقى لازم ابوسك كنت بوستك من زمان بس هعوضك كل الوقت الى عدى علينا وانا مش عارف اللمسك شويه ولقى ليليان بدأت تفتح عنيها بالراحه بصلها وابتسم : حمد الله على السلامه يالى لى ليليان فضلت بصاله قوى وساكته وبعد شويه كتير قالتله : انت مين !!!!!!

Free reading for new users

Scan code to download app

App Store Google Play

Facebookexpand_more