"GIA, PLEASE wake up."
Unti-unting nagmulat ng mga mata si Gia nang marinig ang desperadong pagtawag sa kanya kasabay ng pagpisil sa kamay niya. Sumalubong sa kanya si Jeremy na puno ng pag-aalala ang mukha habang nakatingin sa kanya. Sinubukan niyang tumayo, pero ayaw gumalaw ng kanyang katawan. Matigas at malamig ang kinahihigaan niya, pero nararamdaman niya ang mainit na sa sapin sa ilalim. Jacket ba iyon? "Nasaan tayo, Jeremy?"
"Nandito tayo sa loob ng mausoleo mo," mabilis na sagot ni Jeremy, hawak pa rin ang kamay ni Gia. Naka-lotus position ang lalaki sa gilid niya at halatang walang balak na bitiwan siya. "Binayaran ko 'yong mga guard at caretaker para makapasok tayo dito sa sementeryo nang ganitong oras. Mabuti na lang at binigyan ako ni Vincent ng duplicate key nitong mausoleo.
