في طرفة عين

مقل مليئة بالدمع

في طرفة عين

ما الذي بيني وبينك؟؟

هل هيا صداقة ..؟؟

ام هو عشق روح ....؟؟؟؟

ام انت صدفة ؟...في حياتي...!!!

ترسخت بداخلي....!!!

ام انك طيف ..يراودني...

في جميع اوقاتي...!

لم اكن انويك ...حبا...!!

فقد وقعت فيك ...سهوا..!!

فكيف اعدل الميزان...؟؟

وأنت ملئت الكفيين ...?

بقيت أيام الدمعه مافارگت مقلتي والغصه بروحي وبگلبي كرهت كل شي من حولي ..

مجنت فاهمه الوضع ابد ليش هيج ديصير بيه ليش شمروني هنا ومحد سأل عني ؟؟.

رحت المرت عمي كتلها اريد اشوف ابني

ششوفين منه يمه مات وشبع موت ودفنوو

لاتكولين يمه اني ماعندي ام ..واريد اشوف قبره

هي فوكها بعد اكلج يمه

مااريدج تشفقين ولاتعطفين علي ودوني الكبر ابني

المقبره بعيده كلش شيودينه

لعد شوفوني شهادة وفاته

ماعنده شهادة وفاة

ليش بالله

لان مانولد بالمستشفى

لاجذبين عليه لاجذبين كل واحد لازم اله شهادة وفاة

دوخررييي عني ابتليت بيج امج شمرتج واني ابتليت بيج ..

ظليت الوب مامطمئنه ممصدگه ابد لو شايفته بعيني ميت هم مااصدك جان يسبح سبح ابطني

صرت احاجي نفسي واحاجي بطني اكوللهه ليش مات مو يدري بيه احبه مويدري محتاجته اني ليش ليش

.

. بعدها بأيام وايام اجه عمار فرحت الجيته رغم حزني ..گلت يمكن اجه يواسيني ..جنت محضرتله كومه حجي كلت نروح لقبر ابنه وخليهم يشوفونه شهادة وفاته بسسس

جنت بغرفة بيبيتي ودخل هو من طب حسيت بشويه ارتياح اكو من راح يشاركني همي لان الي فقدناه ابنه اثنينه .. كعد بالارض ب**ت واني بداخلي كلي امل هو ملاذي الي محتاجته اشكو يمه حزني وألمي هو الوحيد ..

كال ..

ندى اني هم ضايج مثلج تره ومردته يموت وعلموده سافرت حتى ابدي من جديد واترك اصدقاء السوء واشتغل اله هو .. بس هسه راح بعد وماكو داعي نستمر سوه اني مااريدج وراح اطلكج واسافر واكيد عمامي وابوي مايقبلون راح اخذج اطلكج بدون مايعرفون ..

كتله كافي اطلع بره لاتكمل اطلع اطلع طردته وظليت ابجي ابجي . شكد جنت م**وره ومتأذيه قراره هذا **رني اشتات وأني بأمس الحاجه اله . هدمني خلاني اشك بان اني راح اعيش حياة طبيعيه بعدهه . وأيست منه فد نوب

صدك تطلكنه وماشفته ابد ..

ابوي عرف بطلاگي من اجه كلب الدنيا وتعارك وياهم وي عمامي وعمار ماكو ..

بس شيريد يسوي ابويه ميسوي شي وراها بكم يوم راح المرته ..

بقيت لازمه عده .. بعد فتره بيبي تخربطت كلش وصارت فد نوب كضتها كله مشتشفيات ..

وراحت الدار حقها .. راحت المراه الي احتضنتني وربتني صح جانت ضعيفه كدام الكل ومتكدر تحميني بس جان الها فضل بتربيتي .. احتضنتني واني طفله احتوتني بالوقت الي تخلوا عني اقرب الناس الي امي,ابويه.

انضاف يوم وفاتها الى اكثر الايام سوداويه بحياتي

بفاتحتهه جنت اتمنى اشوف عمار بس ماكو مشفته فص ملح وذاب ..

بعدها اجه ابويه وعمي ومرته كلوله اخذها انت ابوها احنه مانتحمل مسؤؤليتهه مطلكه ومو صاحيه تحجي بحدهه وتاكل كومه ومصرف الي تدزه كل كم شهر ميكفي ..

عاد ابويه گلي جهزي نفسج و اخذني ويا وطلعنا للمحافظه الي ساكن بيها ابويه .. بس مجنت مرتاحه جنت اعرف مرته ماتريدني .. واعرف حياتي مراح تصفى وتبقى ملبده بغيوم الأسى والحزن ..

وصلنه لبيت ابويه .. جانت مريم واكفه تنتظرنه شفت بعيونها عدم ارتياح بس جانت تحاول على كد ماتكدر تخفي هالشي بس اني لمحتها ..

جان البيت زغير يمكن 90متر ومريم ممخلفه لأبويه وهي اصغر منه بهواي وحيل تدلع عليه وهو يتبعها مثل الأعمى تگوله اي يعني تگوله لا خلص هي هيه لا بعني تجيبا منا وتودي منا بمزاجها .. جان شغل ابويه متعب كلش يروح عشر ايام ويرجع. هم يبقى عشر ايام بالبيت .. ماتأقلمت ويامريم ابد واني جنت اعاني من حاله نفسيه ومحتاجه احد يطلعني من هالجو بس مالگيت .. مرت الايام واحسها وضايجه مني واني مالي خلكها تكولي اشتغلي مابيه اشتغل نهاري كله كاعده ..

وحتى حجي مااحجي .. ضاجت مني كلش

وظلت تطلعلي مشاكل من جوه الكاع حتى تتعارك ويايه بس اني ساكته الها الحد ما كلش تعبت منها

لزمتها وكتلتهه لان صدك مجنت بوعيي طلعت الحركه بيهه حتى تكعد عني. من اجه ابويه رزلني و هي رادته يكتلني بس هو اكتفى برزاله .

وهي زعلت منه وراحت لأهلهه ظل محتار شون يرجعها .

رجع للبيت گلي تعاي احجي وياج

رحت كعدت يمه ب**ت بدون مأحجي وجهي كل علامات الغضب والحيره عليه

گال كعدتج هنا ماتسوي شي اكو ناس اقارب اهل مريم رجال جبير ومرته ويردوج يمهم تديرين بالج عليهم وينطوج فلوس مو احسن من كعدتج هنا

گتله يعني شنو أشتغل خدامه

مريم ماتقبل ترجع اذا انتِ بالبيت واني مااكدر بدونها وهالأيام راح اكعد من الشغل وين تردين اوديج ؟

ماقصرت يابه وين توديني وديني مابقى شي يهمني بهي الدنيه

هذول خوش ناس

قاطعته گتله اي بلكي يحنون عليه هالناس الغرب احسن منكم وكمت من يمه

جان يحجي وهو محتار احسن شي ا**ر الشر واروح الهم حتى لو خدامه واكيد راح الاقي نفس المعامله من كل الناس ..

مر اليوم والثاني اخذني ابويه ويا هو ماعنده سياره أجر ت**ي وصعدنه مشت السياره تقريبا تلث ارباع الساعه او اكثر حد ماوصلنه المنطقه كلش حلوه كلها محلات وراقيه حييل اباوع ع البنات يتمشن بحريه ومرتبات ومهتمات بنفسهم وملابس جينز او تنوره قصيره جنت اتخبل ع القصير احبه حييل أمنيتي بس رجليني ضخام مترهم ابد .. ابتعدنا عن المحلات وطبينه بفرع بي بيوت راقيه كلش .. بابا كال للسايق يوكف يم بيت ووكف السايق .. بيت حلو مرتب

نزلنه اني وابوي جنت لابسه تنوره طويله وقميص برتقالي حد الورك يلعب النفس كلما اتذكر ملابسي قبل تلعب نفسي واكره روحي وشعري شايلته كبايه

وبيدي جنطه كبيره خليت بيها ملابسي لأن راح ابقى هنا على ما ترضى ست مريم على بابا ..

وكفت ع صفحه كل مشاعر اليأس والاحباط متغلغله بأعماقي في حين بابا دك الباب طلعتله إمراه يجي عمرها بنهاية الأربعين .. ملابسها مرتبه تنووره وقميص مثل الكوستم وحجاب .. سلم عليها ابويه وعرفها عليه ودخلنه ..

كعدنه شويه ضيف*نه وكالت امشي ويايه رحت وراها دخلتني بغرفه بيها رجال متمدد ع سرير ومتغطي والكانيولا بأيده ..

كالت شنو اسمج

بتلعثم جاوبتها وبعد برهة سكوت گلت ندى

ليش خايفه ندى

لا مو خايفه ودنكت راسي

شكد عمرج ؟

هسه دخلت ب17سنه

ها تدرسين

لا

تعرفين تقرين

اي

الحد ياصف ومبطله

ثالث متوسط

تمام باعي نداوي هذا زوجي تعبان وصارله هوايه على هالحال واني بنتي دوم نطلع ونسافر ومنكدر ناخذه ويانه خليناله هنا ممرضه تجي تنطي العلاج بس يرادله مداراة اكثر والممرضه مو متفرغه اله هوايه عدها شغل . اني بس اريدج تديرين بالج عليه واني انطيج حقج اكيد.

هزيت راسي

وهي كلتلي اكعدي يمه خاف يحتاج شي ..

بقيت كاعده ع سرير فارغ مقابيل سريره وجنطتي بيدي ..

راحت كم دقيقه ورجعت كالت تعالي سلمي على ابوج راح يروح .. رحت وراها شفت ابويه مدنج وميباوع بوجهي خجلان مني لو مستنكف مااعرف بس عرفت بعد ما بوسني على راسي وطلع ..

نزلت دموعي بحرگه وألم ع شنو ؟ على كل شي

الكل يتخلى عني .. !!!

المراه والي اصيح الها الحجيه شوف*ني غرفه بصف غرفة الحجي كالت هنا خلي اغراضج هي الج الغرفه

كتلهه خوش

راحت واني بقيت اباوع للغرفه بيهه سرير ودولاب بابين خليت جنطتي ع السرير مفروش شرشف ازرك بي ورد ونضيف كلش ..

رجعت مره ثانيه المراه وكالت

اني طالعه معزومه ع العشا مااوصيح ع الحجي بعد

هزيت راسي وكتلها خوش

كالت عندج تليفون ؟

كتلها لا

ماشي من ارجع اجيب الج تليفون ..

ان شاءالله ..

شوف*ني الأكل مال الحجي كالت من يكعد ويريد انطيه اكل

وفرتني بالبيت كله ..

راحت واني بقيت بالغرفه جانت بيهه مرايه بدون ميز وكفت كبالهه واتأمل شكلي مثل كل مره انقهر وأوخر

لبست ملابس بيت تراك القميص مالته حد الركبه وبجامته عريضه من الغسل مسحوت سحت ..

ورحت يم الحجي شفته كاعد ظل يباوعلي مستغرب

توقعته جفل من شكلي خطيه مريض واني خرعته

دنگت تقربت منه واني مدنكه حتى يشمئز مني هيج اني احس .. كتله تريد شي عمو اني هنا حتى اساعدك

كال اريد مي لهاتي يبست

ان شاءالله

رحت جبت اله مي وشرب

كتله تريد شي بعد

اريد اروح للحمام اسنديني حتى اگوم

سندته وديته للحمام بنفس الغرفه .. وطلعت شويه وصاحني فتحت اله الباب .. وسندته ورجعته للسرير مالته ..

لليل بقيت يمه خاف يحتاج شي .. كال جوعان رحت جبت اله محلبيه مسويتها اله زوجته وانطيته ايده ترجف وتلف مللابسه بعد مااكل كم لقمه .. اخذت منه الخاشوكه وظليت اوكله ..

بعدهه اخذته غسل ورجعته لفراشه .. وبقبت كاعده يمه .. دقايق وسمعت صوت .. وانفتحت باب الغرفه ودخلت الحجيه ووياهه بنيه شابه طويله وبيضه شعرها ماي نازل ع اكتافهه لونه اسود وبي خصلات حمر لايك الها .. شفتهه تحسرت كلما اشوف وحده حلوه اتحسر اتمنى اني هم حلوه ..

هي من شاف*ني ضحكت ضحكه وصلت صداها الروحي حسيت تضحك على شكلي بس ليش ؟؟

حجت وهي تضحك

- هيه !!! واني خايفه لا علاء يباوع الها طلعت هي ؟؟

وظلت تضحك

جاوبتهه الحجيه كلتلهه ولج لا مو حجت النه مريم عليهه

وسكتتها .. دنجت راسي .. وروحي تقطعت اشلاء مااكدر المها ..

الحجيه عرف*ني عليها كلتلي هي بنتي رناوي بنتي الوحيده وهي عايشه ويانا ..

اكتفيت بالسكوت لأن جرحتني وماحجيت هي حست و تقربت مني كالت هلا بيج بينه البيت بيتج .. اعتبري نفسج وحده منا

ماعبرتها اني لأن كرهتهه كلش ..

وكلت للحجيه اني عشيته للحجي تردين مني شي بعد تعبانه من طول الطريق اگدر اروح ارتاح گالت

اي روحي

عفتهم ورحت للغرفه تمددت ع السرير .. تذكرت عمار حقه عمار ميشتهي يباوع بوجهي كل العالم تضحك عليه وتجفل مني .. بقيت اللتمس أعذار إله حتى لاأكرها مااريد هالحب يتلاشى بداخلي .. اريد احتفظ بأطلاله ..

دقايق ودخلت الحجيه

من شفتها كمت كعدت بس رجليه مدده ..

كعدت بصفي ..كالت نداوي لتزعلين من رنا هي جانت خايفه على رجلها منج .. لأن هو عايش ويانا ومن كتلهه عليج بعدج زغيره خافت على علاء بس تره هي قلبها طيب كلش ..

هزيت راسي

كالت انت قليلة الكلام كلش

كتلهه اي وسكتت

لعد يله كومي علاء جايب عشاا من بره امشي اكلي ويانه ..

لا حجيه اني مااريد

لا شنو ماتردين يله كومي

رحت وياهه امشي بيأس .. شنو فايدة حياتي اني ليش عايشه .. وصلت اني وياهه للمطبخ البارد وع طاولة الطعام كاعدين

رنا ووياهه رجل شاب وبنات اثنين كوه حجيت كلت سلام عليكم بتلعثم وارتباك .ردوا عليه . دنتلي الحجيه كرسي وكعدت الطاوله مليانه اكل مالذ وطاب من شفت الأكل وعرفت راح أكل منه ارتاحت نفسيتي واللتمعت عيوني شكد ضعيفه كدام الأكل ..

جان اكو بيتزا حجم كبير ومشاوي من كل الانواع و**ون حار وطرشي وببسي اويلي ..

كعدت أكل وياهم بشراهه حتى نسيت نفسي وحزني وألمي ..

كملنه أكل وشلت وياهم السفره .. مخلوني اغسل وحدي .. رنا مو مثل اول انطباع اخذته عنها شقيه وتضحك وتسولف . بعد ماغسلنه المواعين كعدنا بالمطبخ باوعت الوجهي كالت هي شصاير بي وجهج انت متهتمين بي ؟؟

استحيت ودنكت

لا تستحين العيب مو بوجهج العيب انت متحاولين تعالجي

بس مااعرف اعالجه

اهم شي تهتمين بنظافته يعني اول شي تغسلي بصابونه خاصه بوجهج ونوع بشرتج الصبح اول ماتكعدين وبالليل قبل ماتنامين ولازم تهتمين بنظافة

شرشف مخدتج دائما يبقى نضيف حتى من تنامين عليه لاتنتقل الجراثيم الي هي اصلا انتقلت من وجهج مره ثانيه ومن تنشفين وجهج نشفي بشي نظيف مو اي خاولي كدامج تنشفين بي لا استخدمي الكلين** افضل .. واني راح اجيبلج غسول ومقشر وسنبلوك وتونر وبعد كريمات تخلينه قبل لاتنامين حتى يصير وجهج مرايه ..

ضحكت وفرحت يعني راح يصير وجهي حلو

اي انت حلوه بس يراد تهتمين بنفسج اكثر ..

كتلهه ماشي ..

وصدك يوم ثاني جابتهم الي وكلتلي قللي اكل الدهن والتوابل الحاره هم تأثر ع وجهج ..

كلتلي هذا التونر تستخدمي ينضف بشرتج وسنبلوك و**ي الشمس يحميهه من اضرار اشعة الشمس ..

مرت الأيام وهم زينين ويايه واول ماصار الي شهر وياهم انطوني حق تعبي ويا الحجي فرحت كلش ورحت للمحل بالفرع اشتريت منه كومه حلويات وجبس .. فد مره بالليل وكالعاده جعت .. ورحت اخذت جبس ونزلت جوه بالمطبخ خليته ع الطاوله ميشبعني هذا طلعت الاكل الزايد مال العشا وكعدت اكل ..

جفلت على صوت علاء وبنته ليال اجو للمطبخ طب شايلهه مبينه حرارتها مرتفعه ..

گال هاا شعندج

شافني مبسطه وجاي اكل والساعه 12بالليل ..!!

ظل

يضحك گال انت ناقصج كرش وگاعده تاكلين بالليل

اني استغربت كلامه شنو علاقة الكرش بالاكل بالليل

كتله شله علاقه الكرش

مو اذا هالكد تاكلين بالليل يكبر كرشج ويوصل لراس الشارع

صفنت كتله هاا يعني الاكل بالليل يسمن

اي طبعا لان هسه انت راح تاكلين وترحين تنامين مراح تحركين السعرات الاكلتيهه فمتتحول طاقه وين تروح تصير كرش وشحوم زائده .. وهذا الجبس تره اذا اكلتي كانه شاربه بطل زيت كامل .. اضعفي اضعفي حتى خشمج يزغر هههههه والسمن موزين انت كلش سمينه موقصدي اعيب عليج بس السمن يسوي هواي امراض منها امراض القلب والشرايين والضغط ويأثر ع مفاصلج ..

جفلت حييل واني باليوم اكل كومه جبس وهي عادتي من سنين اكل وانام هم ..

شون راح اتخلى عن هي العاده مااعرف ..

رحت للغرفه باوعت الوجهي جاي يصفى ويصير حلو

اذا اعوف الاكل بالليل هم اضعف وينزل كرشي ..

من شفت وجهي جاي يصير حلو ع العنايه تحمست انزل وزن خاصة علاء گال خشمي يزغر هههه وهذا اهم شي ..

بهي الايام صار عندي امل وخاصة بعد ماشفت هالناس الغرب حنوا عليه ويكلولي اشيااء بصالحي

تحمست وقللت اكل وبالليل كطعته وبعد العشا امشي واتحرك .. واللتمست تغيير وزني وكف وملابسي ظلت تعرض عليه ..

فد يوم والمصادف خميس ..

رنا وعلاء يطلعون من الصبح رنا تروح للصالون مالتهه والحجيه مرات تطلع الصبح.

بهذا اليوم جانت ماطالعه .. كعدنا اني وياهه والحجي طلعنا بره وكعدنه بالحديقه .. دخلت رنا مستعجله سلمت وكالت لامها

ماما خو ماتطلعين اليوم ؟

لا مااطلع ليش؟

اريد ندى محتاجتهه بالصالون اليوم خميس واعراس وعندي هي البنيه التساعدني مموجوده راح اخذ ندى

اي ماشي اخذيهه مااحتاجهه اني يم ابوج ..

اني بدلت ورحتلها كالت يله امشي

طلعنه من الباب جان تكول الصالون ع الشارع خلي نروح مشي سيارتي علاء طلع بيها علما يشتري سياره جديده لان سيارته باعها ..

وظلت تطبطب على كتفي كالت المشي زين الج حتى تضعفين

باوعتلهه وضحكت كتلهه اي ان شاءالله

مشينه تقريبا عشرين دقيقه بس شنو تعبت كلش

وصلنا للصالون ودخلنه وبلشنه شغل طلبت من انضف الصالون نصفته وظلن يجن بنات اذا يحتاجن اجفف شعرهن او بيهن اغسله من الصبغ او اسحبه والي تحتاج خيط اخذ الها وهيج مر اليوم وبنهايته وبعد تعب انطتني فلوس على تعبي ..

كعدنا نسولف اني ورنا وام بنين صديقة رنا وتشتغل وياهه محترفه بشكل شغلها كلش حلو وعليهم رجل بالصالون لان شغلهم حلو وحديث ع الموديل

ظلت تباوعلي ام بنين ورنا راحت تخابر رجلهه يجي علينه ..

كلتلي ليش ممسويه سنج الم**ور هذا

كتلهه ليش هو يصير يتصلح

اي طبعا يترمم بس يرادلج كومه فلوس انت تشتغلين اي اشتغل

جمعيلج فلوس واني اخذج لطبيب الأسنان بعدل أسنانج كلها

فرحت كلش واتاملت خير بالايام الجايه

مرت الايام وبطلت اشتري حلويات وجبس وكعدت اجمع فلوس اسوي اسناني

ابويه جان كل فتره يجي وانقهر عليه واخلي بيده فلوس ..

بين فتره وفتره جنت اروح للصالون اشتغل واتقرب من ام بنين واتعلم منها

جانت رنا تدز عليه تخابرني تعاي اروح الها مشي حتى اضعف وصدك بديت انزل كطعت اكل الحلويات والمقالي والخبز الابيض وظليت اكل اكل صحي ..

وبعد اشهر جمعت الفلوس

جانت الحجيه تنطيني ورنا هم واضمهم

فد يوم رحت لام بنين وكلتلهه ع المبلغ كالت اذا نقصتي اني اكملهن الج واعتبريهن دين رحنه لطبيب الاسنان وحجزنا ونزلنه للسوك واخذت ملابس على قياسي الجديد لان نزلت اكثر من عشر كيلوات بأشهر صارت عندي اراده موطبيعيه حتى اغير كل شي بيه .. وفعلا بعد جلسات عند طبيب الأسنان اكتسبت اسنان حلوه ماعاد عندي اسنان مخربطه ولاسن م**ور وجسمي بالنازل وبعد عندي وزن زايد بس داحاول انزله واحتفلت بعيد ميلادي ال18وياهم وشكلي متغير مو مثل قبل ..

طول هالفتره عمار مانسيته جنت قبل لاانام افكر بي واتمنى اعرف اخباره .. بس ماعرفت ابد

جنت اتمنى يشوف شكلي الجديد وشون صرت احلى من قبل بس ماشفته ..

فد يوم تخربط الحجي وصار فد نوب كلش حالته ودخلوا مستشفى وهناك مات خطيه

انقهرت عليه جنت شكد اكعد يمه واداريه وهسه هو ماكو ..

تملكني الخوف بعد الحجي اني وين اروح اكيد راح ارجع ويا مريم وارجع للظيم بعد ماتنفست وتذوقت طعم الحياة...

يتبع ..

اسفه ع التاخير بنات

بارت طويل جدا

24/3/2018